ବାଗେଶ୍ୱର ମହାରାଜଙ୍କ ଭାଇ ଶାଳିଗ୍ରାମ ଗର୍ଗ ଗୁଣ୍ଡାଗର୍ଦ୍ଦି କରି ଗିରଫ, ଜମି ବିବାଦରେ ଗୁଳି ମାରିଥିବା ଅଭିଯୋଗ
ଇନ୍ଦୋର : ମଧ୍ୟପ୍ରଦେଶର ଛତରପୁରସ୍ଥିତ ପ୍ରସିଦ୍ଧ ବାଗେଶ୍ୱର ଧାମ ସହିତ ଜଡ଼ିତ ଏକ ବଡ଼ ଖବର ସାମ୍ନାକୁ ଆସିଛି । ପୋଲିସ ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରି ବାଗେଶ୍ୱର ଧାମର ପୀଠାଧୀଶ୍ୱର ପଣ୍ଡିତ ଧୀରେନ୍ଦ୍ର କୃଷ୍ଣ ଶାସ୍ତ୍ରୀଙ୍କ ଭାଇ ଶାଳିଗ୍ରାମ ଗର୍ଗ ଏବଂ ତାଙ୍କ ସହଯୋଗୀ ଅଙ୍କିତ ମିଶ୍ରାଙ୍କୁ ଗିରଫ କରିଛି ।
ପୋଲିସ ଦୁଇ ଅଭିଯୁକ୍ତଙ୍କୁ ରାଜନଗର କୋର୍ଟରେ ହାଜର କରିଛି । ଅନ୍ୟପଟେ, ଏହି ମାମଲାରେ ସମ୍ପୃକ୍ତ ଥିବା ଆଉ ଜଣେ ଅଭିଯୁକ୍ତକୁ ପୋଲିସ ଖୋଜୁଛି। ଏହି ଗୁଳିକାଣ୍ଡରେ ଗୁରୁତର ଭାବେ ଆହତ ହୋଇଥିବା ମୋତିଲାଲ କୁଶୱାଙ୍କୁ ଚିକିତ୍ସା ପାଇଁ ଗ୍ୱାଲିୟରର ସରକାରୀ ଟ୍ରମା ସେଣ୍ଟରରେ ଭର୍ତ୍ତି କରାଯାଇଛି । ଡାକ୍ତରୀ ଦଳ ମୋତିଲାଲଙ୍କ ଦେହରୁ ଗୁଳିକୁ ବାହାର କରିବା ପାଇଁ ଅପରେସନ ପ୍ରସ୍ତୁତି ଚଳାଇଛନ୍ତି ।
ପୀଡ଼ିତ ମୋତିଲାଲ କୁଶୱା, ଶାଳିଗ୍ରାମ ଗର୍ଗଙ୍କ ବିରୋଧରେ ଅନେକ ଗୁରୁତର ଅଭିଯୋଗ ଆଣିଛନ୍ତି । ମୋତିଲାଲଙ୍କ କହିବା ଅନୁଯାୟୀ, ଶାଳିଗ୍ରାମ ନିଜ ସହଯୋଗୀମାନଙ୍କ ସହ ତାଙ୍କ ଜମିକୁ ବେଆଇନ ଭାବେ କବଜା କରିବାକୁ ଆସିଥିଲେ । ଯେତେବେଳେ ସେ ଏହାକୁ ବିରୋଧ କଲେ, ଶାଳିଗ୍ରାମ ଏବଂ ତାଙ୍କ ସହଯୋଗୀମାନେ ପ୍ରଥମେ ବାଡ଼ିରେ ତାଙ୍କ ମୁଣ୍ଡକୁ ଆକ୍ରମଣ କରିଥିଲେ । ପରେ ତାଙ୍କ ଉପରକୁ ଗୁଳି ଚଳାଇଥିଲେ । ମୋତିଲାଲଙ୍କ କହିବା ଅନୁସାରେ, ଗୋଟିଏ ଗୁଳି ତାଙ୍କ ଛାତିରେ ବାଜିଥିଲା ଏବଂ ଅନ୍ୟ ଗୋଟିଏ ଗୁଳି ତାଙ୍କ କାନକୁ ବାଜି ଚାଲିଯାଇଥିଲା ।
ପୀଡ଼ିତ ଜଣକ ଏହା ମଧ୍ୟ ଅଭିଯୋଗ କରିଛନ୍ତି ଯେ ଶାଳିଗ୍ରାମ ସ୍ଥାନୀୟ ଅଞ୍ଚଳରେ ନିଜର ଦବଙ୍ଗଗିରି ଦେଖାନ୍ତି ଏବଂ ଲୋକଙ୍କ ଜମି ଜବରଦଖଲ କରନ୍ତି । ପଣ୍ଡିତ ଧୀରେନ୍ଦ୍ର କୃଷ୍ଣ ଶାସ୍ତ୍ରୀଙ୍କ ବୟାନ ଉପରେ ପ୍ରଶ୍ନ ଉଠାଇ ପୀଡ଼ିତ କହିଛନ୍ତି ଯେ, ଯଦି ମହାରାଜଙ୍କର ତାଙ୍କ ଭାଇଙ୍କ ସହ କୌଣସି ସମ୍ପର୍କ ନାହିଁ, ତେବେ ଶାଳିଗ୍ରାମ ଏତେ ବିଳାସପୂର୍ଣ୍ଣ ଜୀବନ କିପରି ବିତାଉଛନ୍ତି ? ଜୀବନ ପ୍ରତି ବିପଦ ଥିବାରୁ ପୀଡ଼ିତ ଜଣକ ଛତରପୁର ବଦଳରେ ଗ୍ୱାଲିୟରରେ ଚିକିତ୍ସିତ ହେଉଛନ୍ତି ।
