শুকুৰবাৰে অসমৰ ৰাজ্যপাল লক্ষ্মণ প্ৰসাদ আচাৰ্যই নলবাৰীত ৪৭ সংখ্যক আন্তঃজিলা এথলেটিকছ চেম্পিয়নশ্বিপ উদ্বোধন কৰে ।
আজিৰে পৰা নলবাৰীত আৰম্ভ হ’ল অসম এথলিট চেম্পিয়নশ্বিপ প্ৰতিযোগিতা।১১৫০ গৰাকী খেলুৱৈৰ অংশ গ্ৰহণৰে নলবাৰীত আন্তঃজিলা এথলেটিক চেম্পিয়নশ্বিপ আৰম্ভ।
অসমৰ ৰাজ্যপাল লক্ষ্মণ প্ৰসাদ আচাৰ্যই শুকুৰবাৰে নলবাৰীৰ সৰিয়হতলীস্থিত জিলা ক্ৰীড়া প্ৰকল্প চৌহদত ৪৭ সংখ্যক আন্তঃজিলা এথলেটিকছ প্ৰতিযোগিতা আনুষ্ঠানিকভাৱে উদ্বোধন কৰে।
উদ্বোধনী অনুষ্ঠানত অংশগ্ৰহণ কৰা মন্ত্ৰী জয়ন্ত মল্ল বৰুৱাই এক্স-ত এই তথ্য শ্বেয়াৰ কৰি কয় যে, এই প্ৰতিযোগিতাত ৰাজ্যৰ বিভিন্ন প্ৰান্তৰ পৰা অহা প্ৰায় ১,১৫০ গৰাকী জুনিয়ৰ আৰু চিনিয়ৰ এথলেটে অংশগ্ৰহণ কৰিছে, যিসকলে অহা তিনিদিন প্ৰতিযোগিতাত অৱতীৰ্ণ হ’ব।
মন্ত্ৰী গৰাকীয়ে লগতে কয় যে মুখ্যমন্ত্রী ড০ হিমন্ত বিশ্ব শৰ্মাৰ নেতৃত্বত আৰম্ভ কৰা ‘খেল মহাৰণ’ৰ দৰে পদক্ষেপে ক্ৰীড়াত অংশগ্ৰহণক অধিক উৎসাহিত কৰি সমগ্ৰ অসমতে এক জীৱন্ত ক্ৰীড়া সংস্কৃতি গঢ়ি তোলাত সহায় কৰিছে।
তেওঁ সকলো প্ৰতিযোগী এথলেটলৈ শুভেচ্ছা জ্ঞাপন কৰে আৰু আশা প্ৰকাশ কৰে যে এই প্ৰতিযোগিতাই উদীয়মান প্ৰতিভাসকলক নিজৰ দক্ষতা প্ৰদৰ্শন কৰাৰ লগতে উচ্চ পৰ্যায়ৰ প্ৰতিযোগিতাত শ্ৰেষ্ঠত্ব অৰ্জন কৰাৰ বাবে এক উপযুক্ত মঞ্চ প্ৰদান কৰিব।
এই অনুষ্ঠানত ক্ৰীড়া আৰু যুৱ কল্যাণ মন্ত্ৰী বিশ্বজিত দৈমাৰী, অসম এথলেটিকছ এছ’চিয়েশ্যন, নলবাৰী জিলা ক্ৰীড়া সন্থা আৰু জিলা প্ৰশাসনৰ বিষয়াসকলো উপস্থিত থাকে।
লগতে পঢ়ক: এছিয়ান গেমছ ২০২৬: ভাৰতীয় পুৰুষ ক্ৰিকেট দলৰ পোনপটীয়া এণ্ট্ৰি
