‘ଏହା ତ କେବଳ ଟ୍ରେଲର୍, ସିନେମା ବାକି ଅଛି…’: ଶିବସେନାର ପ୍ରତିଷ୍ଠା ଦିବସରେ ଉଦ୍ଧବ ଠାକରେଙ୍କୁ ଟାର୍ଗେଟ କଲେ ଏକନାଥ ସିନ୍ଦେ
ମୁମ୍ବାଇ: ମହାରାଷ୍ଟ୍ର ରାଜନୀତିର ପ୍ରମୁଖ ଆଞ୍ଚଳିକ ଦଳ ‘ଶିବସେନା’ର ୬୦ତମ ପ୍ରତିଷ୍ଠା ଦିବସ ଅବସରରେ ଦଳର ଦୁଇଟି ଗୋଷ୍ଠୀ ପକ୍ଷରୁ ଭିନ୍ନ ଭିନ୍ନ ସ୍ଥାନରେ ଜନସଭାର ଆୟୋଜନ କରାଯାଇଛି। ଗୋଟିଏ ପଟେ ଉଦ୍ଧବ ଠାକରେଙ୍କ ଗୋଷ୍ଠୀ ନିଜର ଅସ୍ତିତ୍ୱ ବଞ୍ଚାଇବା ପାଇଁ ସଂଘର୍ଷ କରୁଥିବା ବେଳେ, ଅନ୍ୟପଟେ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଗୋଷ୍ଠୀ ବିଜେପି (BJP) ସହ ମିଶି ଶିବସେନା ଉପରେ ନିଜର ପ୍ରଭାବ ବଜାୟ ରଖିବାକୁ ଚେଷ୍ଟା ଚଳାଇଛି। ଏହି ଅବସରରେ କର୍ଯ୍ୟକର୍ତ୍ତାଙ୍କୁ ସମ୍ବୋଧିତ କରି ଏକନାଥ ସିନ୍ଦେ ବିରୋଧୀ ଗୋଷ୍ଠୀ ଉପରେ ତୀବ୍ର ଆକ୍ରମଣ କରିଛନ୍ତି। ସେ କହିଛନ୍ତି, ‘ଆପଣମାନଙ୍କ ସାମ୍ନାରେ ବାଘ (Tiger) ଛିଡ଼ା ହୋଇଛି। ବର୍ତ୍ତମାନ ଯାହା ଦେଖାଯାଉଛି ତାହା କେବଳ ଏକ ଟ୍ରେଲର୍, ପ୍ରକୃତ ସିନେମା ଏବେ ବି ବାକି ଅଛି।’
ଏକନାଥ ସିନ୍ଦେ ନିଜ ଭାଷଣରେ ଦାବି କରିଛନ୍ତି ଯେ, ସାଧାରଣ ଶିବସୈନିକମାନଙ୍କ କଠିନ ପରିଶ୍ରମ ଏବଂ ନିଷ୍ଠା ଯୋଗୁଁ ହିଁ ଆଜି ଶିବସେନା ମହାରାଷ୍ଟ୍ରର ଦ୍ୱିତୀୟ ସବୁଠାରୁ ବଡ଼ ରାଜନୈତିକ ଦଳ ଭାବେ ଉଭା ହୋଇପାରିଛି। ଏହା ସହିତ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଉଚ୍ଚ ପ୍ରଶଂସା କରି କହିଛନ୍ତି ଯେ, ଅଯୋଧ୍ୟାରେ ଭବ୍ୟ ରାମ ମନ୍ଦିର ନିର୍ମାଣ ଏବଂ ଜମ୍ମୁ-କାଶ୍ମୀରରୁ ଧାରା ୩୭୦ (Article 370) ହଟାଇବା ବାଲାସାହେବ ଠାକରେଙ୍କର ସ୍ୱପ୍ନ ଥିଲା, ଯାହାକୁ କେବଳ ମୋଦୀ ସରକାର ହିଁ ସାକାର କରି ଦେଖାଇଛନ୍ତି। ସେଥିପାଇଁ ସେ ସମସ୍ତ ଶିବସୈନିକଙ୍କୁ ପ୍ରଧାନମନ୍ତ୍ରୀ ମୋଦୀଙ୍କୁ ଅଭିନନ୍ଦନ ଜଣାଇବାକୁ ଆହ୍ୱାନ କରିଛନ୍ତି।
ଉଦ୍ଧବ ଠାକରେଙ୍କ ନାମ ନନେଇ ସିନ୍ଦେ ପରିବାରବାଦକୁ ନେଇ ତାଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, ‘କେବଳ ରକ୍ତର ସମ୍ପର୍କ ଥିଲେ କେହି ବାଲାସାହେବଙ୍କ ପ୍ରକୃତ ଉତ୍ତରାଧିକାରୀ ହୋଇଯାଏ ନାହିଁ। ଶିବସେନା କୌଣସି ଜମିର ଖଣ୍ଡେ ଟୁକୁଡ଼ା ନୁହେଁ ଯେ ଏହାକୁ ଉତ୍ତରାଧିକାର ସୂତ୍ରରେ ପାଇଯିବେ, ଏହା ଲକ୍ଷ ଲକ୍ଷ ଶିବସୈନିକଙ୍କ ହୃଦୟର ସ୍ପନ୍ଦନ। ଶିବସେନା କେବଳ ଏକ ଦଳ ନୁହେଁ, ଏହା ଏକ ଗେରୁଆ (ଭଗବା) ତୋଫାନ।’
ସିନ୍ଦେ ଅଭିଯୋଗ କରିଛନ୍ତି ଯେ, କେବଳ ମୁଖ୍ୟମନ୍ତ୍ରୀ ପଦ ଏବଂ କ୍ଷମତା ଲୋଭରେ ବାଲାସାହେବ ଠାକରେଙ୍କ ମୂଳ ଆଦର୍ଶ ଓ ବିଚାରଧାରାକୁ ଜଳାଞ୍ଜଳି ଦିଆଯାଇଛି। ଜୀବନସାରା ବାଲାସାହେବ ଯେଉଁମାନଙ୍କର ରାଜନୈତିକ ଏବଂ ବୈଚାରିକ ବିରୋଧ କରୁଥିଲେ, ଆଜି କ୍ଷମତା ପାଇଁ ସେହିମାନଙ୍କୁ ହିଁ ଆପଣେଇ ନିଆଯାଇଛି। ମାତ୍ର ତାଙ୍କ ନେତୃତ୍ୱରେ ଥିବା ପ୍ରକୃତ ଶିବସେନା ଆଜି ବି ବାଲାସାହେବଙ୍କ ହିନ୍ଦୁତ୍ୱବାଦୀ ଚିନ୍ତାଧାରାକୁ ଆଗକୁ ବଢ଼ାଇବା ପାଇଁ ନିରନ୍ତର କାର୍ଯ୍ୟ କରୁଛି।
ଶିବସେନାର ଏହି ୬୦ତମ ବର୍ଷପୂର୍ତ୍ତି ଉତ୍ସବରେ ଦୁଇ ଗୋଷ୍ଠୀ ମଧ୍ୟରେ ଚାଲିଥିବା ଏହି ଆରୋପ-ପ୍ରତ୍ୟାରୋପ ମହାରାଷ୍ଟ୍ର ରାଜନୀତିକୁ ପୁଣି ଉଷ୍ମ କରିଦେଇଛି। ଏକନାଥ ସିନ୍ଦେଙ୍କର ଏହି “ପିକ୍ଚର ଅଭି ବାକି ହୈ” ବୟାନରୁ ସ୍ପଷ୍ଟ ଜଣାପଡ଼ୁଛି ଯେ, ଆଗାମୀ ଦିନରେ ଦଳର ଅସଲି ମାଲିକାନା ଏବଂ ବାଲାସାହେବଙ୍କ ଉତ୍ତରାଧିକାରକୁ ନେଇ ଏହି ଲଢ଼େଇ ଆହୁରି ଜୋରଦାର ହେବ।
