মুখ্যমন্ত্ৰী ড০ হিমন্ত বিশ্ব শৰ্মাৰ সৈতে ফোনযোগে বাৰ্তালাপত মিলিত হয় জাপানৰ ৰাষ্ট্ৰদূত কেইচি অ’নো । কি কথা পাতিলে দুয়োজনে ?
ৰাজ্যৰ উদ্যোগ আৰু অৰ্থনৈতিক ক্ষেত্ৰৰ বাবে এক ডাঙৰ খবৰ । মুখ্যমন্ত্ৰী ড০ হিমন্ত বিশ্ব শৰ্মালৈ জাপানৰ ৰাষ্ট্ৰদূতৰ ফোন । জাপানৰ ৰাষ্ট্ৰদূত কেইচি অ’নোৰ সৈতে এক টেলিফোনিক বাৰ্তালাপ মিলিত হয় মুখ্যমন্ত্ৰী ড০ হিমন্ত বিশ্ব শৰ্মা । বৃহস্পতিবাৰে সামাজিক মাধ্যমযোগে এই কথা জানিবলৈ দিয়ে মুখ্যমন্ত্ৰীগৰাকীয়ে । মুখ্যমন্ত্ৰী ড০ শৰ্মাই বৃহস্পতিবাৰে জনোৱা অনুসৰি, এই বাৰ্তালাপত ৰাষ্ট্ৰদূতগৰাকীয়ে ভাৰতৰ ‘এক্ট ইষ্ট পলিচি’ৰ অধীনত অসমৰ সৈতে অংশীদাৰিত্ব শক্তিশালী কৰাৰ প্ৰতি জাপানে পুনৰ প্ৰতিশ্ৰুতি প্ৰদান কৰিছে ।
সামাজিক মাধ্যমৰ এটা পোষ্টযোগে মুখ্যমন্ত্ৰী ড০ শৰ্মাই কয় যে তেওঁ বৃহস্পতিবাৰৰ সন্ধিয়া ৰাষ্ট্ৰদূতগৰাকীৰ পৰা এটা ফোন কল লাভ কৰে আৰু সেই সময়ত দুয়োপক্ষই কেইবাটাও গুৰুত্বপূৰ্ণ খণ্ডত সহযোগিতা সম্প্ৰসাৰণৰ বিষয়ে আলোচনা কৰে ।
মুখ্যমন্ত্ৰীয়ে লগতে কয় যে দুয়োপক্ষই ইলেক্ট্ৰনিক্স, ছেমিকণ্ডাক্টৰ, আন্তঃগাঁথনি, নিৰ্মাণ আৰু উদ্যোগীতাৰ ক্ষেত্ৰত সহযোগিতা শক্তিশালী কৰিবলৈ সন্মত হৈছে । লগতে ৰাজ্যখনত বিনিয়োগ বৃদ্ধি আৰু অধিক অৰ্থনৈতিক সুযোগ সৃষ্টিৰ বাবে অসম আগন্তুক দিনবোৰত জাপানী প্ৰতিষ্ঠান আৰু সংস্থাৰ সৈতে জড়িত হ’বলৈ আগ্ৰহী বুলিও উল্লেখ কৰে তেওঁ ।
ফেচবুকত মুখ্যমন্ত্ৰীগৰাকীয়ে লিখিছে, “জাপানৰ মাননীয় ৰাষ্ট্ৰদূত কেইচি অ’নো ডাঙৰীয়াৰ সৈতে কালি ফোনযোগে এক আন্তৰিক আৰু ফলপ্ৰসূ বাৰ্তালাপ কৰোঁ । এই আলোচনা কালত তেখেতে ভাৰতৰ এক্ট ইষ্ট পলিচীৰ অধীনত অসমৰ সৈতে জাপান চৰকাৰৰ চলি থকা অংশীদাৰিত্ব আৰু সহযোগিতা অধিক সুদৃঢ় কৰাৰ প্ৰতিশ্ৰুতি পুনৰ ব্যক্ত কৰে ।
ইলেক্ট্ৰনিক্স, ছেমিকণ্ডাক্টৰ, আন্তঃগাঁথনি, উৎপাদন উদ্যোগ আৰু উদ্যমিতা আদি গুৰুত্বপূৰ্ণ ক্ষেত্ৰত পাৰস্পৰিক সহযোগিতা অধিক বিস্তৃত, গতিশীল আৰু ফলপ্ৰসূ কৰাৰ ক্ষেত্ৰত আমি উমৈহতীয়াভাৱে সহমত প্ৰকাশ কৰোঁ । অনাগত দিনসমূহত অসমৰ জনসাধাৰণৰ বাবে অধিক বিনিয়োগ, উদ্যোগ আৰু অৰ্থনৈতিক সুযোগ সৃষ্টি কৰাৰ লক্ষ্যৰে জাপানৰ উদ্যোগ আৰু প্ৰতিষ্ঠানসমূহৰ সৈতে অধিক নিবিড় সংযোগ আৰু সহযোগিতা বৃদ্ধি কৰিবলৈ অসম সদায়েই আশাবাদী ।”
উল্লেখ্য যে, জাপানৰ প্ৰধানমন্ত্ৰীৰ অসমলৈ হ’বলগীয়া প্ৰস্তাৱিত ভ্ৰমণ বাতিল হোৱাৰ কেইদিনমান পিছতেই এই দেশখনৰ ৰাষ্ট্ৰদূতে মুখ্যমন্ত্ৰী হিমন্ত বিশ্ব শৰ্মাৰ সৈতে ফোনযোগে বাৰ্তালাপত মিলিত হয় ।
লগতে পঢ়ক : আতিথ্য খণ্ডৰ প্ৰশিক্ষণ সম্পূৰ্ণ কৰিলে ২০০ লাখপতি বাইদেউৱে : প্ৰশংসা মুখ্যমন্ত্ৰীৰ
