Jaspal Rana’s Mother Passes Away: ଜସପାଲ ରାଣାଙ୍କ ଦେହାନ୍ତର ୪ ଦିନ ପରେ ମା’ ଶ୍ୟାମା ଦେବୀଙ୍କ ପରଲୋକ
ନୂଆଦିଲ୍ଲୀ: ୪ ଦିନ ତଳେ ପୁଅ ଜସପାଲ ରାଣାଙ୍କ ଦେହାନ୍ତ ହୋଇଥିଲା। ଆଉ ଏବେ ମାଆ ଶ୍ୟାମା ଦେବୀ ବି ଚାଲିଗଲେ ଆରପାରିକୁ। କିମ୍ବଦନ୍ତୀ ସୁଟର ତଥା ପ୍ରଶିକ୍ଷକ ଜସପାଲ ରାଣାଙ୍କ ପରିବାରକୁ ଯେମିତି ଦୁଃଖ ପିଛା ଛାଡ଼ୁନି। ଜଶପାଲ ରାଣାଙ୍କ ମାଆ ଶ୍ୟାମା ଦେବୀ ଦୀର୍ଘଦିନ ହେଲା ଅସୁସ୍ଥ ଥିଲେ। ଦିଲ୍ଲୀର ମ୍ୟାକ୍ସ ହସ୍ପିଟାଲରେ ତାଙ୍କର ଚିକିତ୍ସା ଚାଲିଥିଲା। ହେଲେ ମଙ୍ଗଳବାର ତାଙ୍କର ବିୟୋଗ ହୋଇଛି।
ପରିବାର ସୂତ୍ରରୁ ମିଳିଥିବା ସୂଚନା ଅନୁଯାୟୀ,ଶ୍ୟାମା ଦେବୀ ଦୀର୍ଘ ଦିନ ଧରି ଅସୁସ୍ଥ ଥିଲେ ଏବଂ ଦିଲ୍ଲୀର ମ୍ୟାକ୍ସ ହସ୍ପିଟାଲରେ ଚିକିତ୍ସିତ ହେଉଥିଲେ। ଜୁନ୍ ୧୨ ତାରିଖରେ ନିଜ ପୁଅ ଜସପାଲ ରାଣାଙ୍କ ଅକାଳ ବିୟୋଗର ଖବର ତାଙ୍କ ସ୍ୱାସ୍ଥ୍ୟବସ୍ଥାକୁ ଅଧିକ ଗୁରୁତର କରିଦେଇଥିଲା। ଏଭଳି ଶକ୍ତ ଆଘାତକୁ ସେ ସହି ନପାରି ମଙ୍ଗଳବାର,ଜୁନ୍ ୧୬ ତାରିଖରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ଏହି ଗୋଟିଏ ସପ୍ତାହ ମଧ୍ୟରେ ପରିବାରରେ ଦୁଇଟି ମୃତ୍ୟୁ ଘଟଣା ସମଗ୍ର କ୍ରୀଡ଼ା ଜଗତରେ ଶୋକର ଛାୟା ଖେଳାଇ ଦେଇଛି।
Also Reading- ରେପ୍ ପରେ ବ୍ଲାକମେଲ୍; ‘ତୁମେ ମୁସଲମାନ ହୋଇଯାଇଛ’… IAF ଯବାନଙ୍କ ପତ୍ନୀଙ୍କ ସହ ପାଶବିକ ଆଚରଣ
ଭାରତୀୟ ସୁଟିଂ ଜଗତରେ ଶୂନ୍ୟତା
ଗତ ଜୁନ୍ ୧୨ ତାରିଖରେ ଜସପାଲ ରାଣାଙ୍କ ଦେହାନ୍ତ ହୋଇଥିଲା। ଜର୍ମାନୀର ମ୍ୟୁନିଖଠାରେ ଅନୁଷ୍ଠିତ ISSF ବିଶ୍ୱକପରେ ଭାରତୀୟ ପିସ୍ତଲ ଦଳକୁ ସଫଳତାର ସହ ମାର୍ଗଦର୍ଶନ କରିବା ପରେ ସେ ଭାରତ ଫେରିଥିଲେ। ଭାରତ ଫେରିବା ପରେ ତାଙ୍କ ସ୍ୱାସ୍ଥ୍ୟବସ୍ଥା ହଠାତ୍ ବିଗିଡ଼ି ଯାଇଥିଲା ଏବଂ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ତାଙ୍କ ମାର୍ଗଦର୍ଶନରେ ଭାରତୀୟ ଦଳ ମ୍ୟୁନିଖ ବିଶ୍ୱକପରେ ଦୁଇଟି ସ୍ୱର୍ଣ୍ଣ ଓ ଦୁଇଟି ରୌପ୍ୟ ପଦକ ହାସଲ କରିଥିଲା।
ଜସପାଲ ରାଣାଙ୍କ ଅବଦାନ
ଜସପାଲ ରାଣା କେବଳ ଜଣେ ପ୍ରଶିକ୍ଷକ ନୁହଁନ୍ତି,ବରଂ ଭାରତର ଜଣେ ଦକ୍ଷ ସୁଟର ଥିଲେ। ମନୁ ଭାକରଙ୍କ ଭଳି ଅଲିମ୍ପିକ୍ ପଦକ ବିଜେତାଙ୍କୁ ପ୍ରସ୍ତୁତ କରିବାରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଥିଲା। ନିଜର ସକ୍ରିୟ ସୁଟିଂ କ୍ୟାରିଅରରେ ସେ ଏସିଆନ୍ ଗେମ୍ସ ଏବଂ କମନୱେଲ୍ଥ ଗେମ୍ସରେ ଭାରତ ପାଇଁ ଅନେକ ପଦକ ଜିତି ଦେଶକୁ ଗର୍ବିତ କରିଥିଲେ। କମନୱେଲ୍ଥ ଗେମ୍ସରେ ୧୫ଟି ଏବଂ ଏସିଆନ୍ ଗେମ୍ସରେ ୮ଟି ପଦକ ଜିତି ସେ ଭାରତର ସର୍ବାଧିକ ପଦକ ବିଜେତା ସୁଟରଙ୍କ ମଧ୍ୟରେ ଅନ୍ୟତମ ହୋଇପାରିଥିଲେ।
