অহা ১ জুলাইৰ পৰা দেশজুৰি আৰম্ভ হ’ব কেন্দ্ৰৰ অভিলাষী ‘VB-GRAMG’ আঁচনি। এই আঁচনিৰ বাবে জনতা ভৱনত এক উচ্চস্তৰীয় বৈঠকত মিলিত হয়।
অসম চৰকাৰে গঠন কৰা কেবিনেট উপ-সমিতিয়ে ৰাজ্যজুৰি গ্ৰামোন্নয়ন খৰতকীয়া কৰাৰ উদ্দেশ্যে কেন্দ্ৰৰ অভিলাষী ‘VB-GRAMG’ আঁচনিৰ ৰূপায়ণৰ প্ৰস্তুতি পৰ্যালোচনা কৰিবলৈ জনতা ভৱনত এক উচ্চস্তৰীয় বৈঠকত মিলিত হয়।
অসমৰ পঞ্চায়ত আৰু গ্ৰামোন্নয়ন, আবকাৰী, অসম চুক্তি ৰূপায়ণ আৰু সীমান্ত সুৰক্ষা ও উন্নয়ন মন্ত্ৰী অতুল বৰাৰ অধ্যক্ষতাত বৈঠকত কেইবাগৰাকীও জ্যেষ্ঠ কেবিনেট সতীৰ্থ আৰু চৰকাৰৰ শীৰ্ষ বিষয়াসকল উপস্থিত থাকে।
বৈঠকত আঁচনিখনৰ সময়মতে আৰু কাৰ্যকৰী ৰূপায়ণ নিশ্চিত কৰাৰ বাবে প্ৰয়োজনীয় বিভাগীয় একত্ৰীকৰণ, অগ্ৰাধিকাৰ প্ৰাপ্ত খণ্ড, প্ৰাতিষ্ঠানিক ব্যৱস্থা আৰু কৌশলসমূহৰ বিষয়ে বিশদভাৱে আলোচনা কৰা হয়।
‘VB-GRAMG’ আঁচনিয়ে গ্ৰাম্য অসমৰ আন্তঃগাঁথনি শক্তিশালী কৰা, যোগাযোগ ব্যৱস্থাৰ উন্নতি সাধন কৰা, জীৱিকাৰ সুযোগ সম্প্ৰসাৰণ কৰা আৰু আৰ্থ-সামাজিক উন্নয়ন বৃদ্ধি কৰাত গুৰুত্বপূৰ্ণ ভূমিকা পালন কৰিব বুলি আশা কৰা হৈছে। এই আঁচনি ৰূপায়ণৰ বাবে ৰাজ্যখনে প্ৰাৰম্ভিকভাৱে ১,৯২৯.৭০ কোটি টকাৰ অন্তৱৰ্তীকালীন আবণ্টন লাভ কৰিব আৰু ইয়াৰ বিপৰীতে অসম চৰকাৰে প্ৰায় ২০০ কোটি টকাৰ বৰঙণি আগবঢ়াব।
মন্ত্ৰীগৰাকীয়ে কয় যে এই আঁচনিয়ে গ্ৰামোন্নয়নৰ পদক্ষেপসমূহলৈ এক বৃহৎ গতিশীলতা আনিব আৰু ৰাজ্যখনৰ গাঁওসমূহৰ জীৱন ধাৰণৰ মানদণ্ড উন্নত কৰিব।
বৈঠকত অহা ১ জুলাইৰ পৰা দেশজুৰি আৰম্ভ হ’বলগীয়া এই অভিলাষী কাৰ্যসূচী ৰূপায়ণৰ পদক্ষেপ গ্ৰহণ কৰাৰ বাবে প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গ্ৰামোন্নয়ন মন্ত্ৰী শিৱৰাজ সিং চৌহানৰ ভূমিকাকো শলাগ লোৱা হয়।
লগতে পঢ়ক: অম্বুবাচী মেলাক লৈ যান-বাহন আৰক্ষীৰ বিশেষ নিৰ্দেশনা; ভক্তৰ বাবে থাকিব বিশেষ সুবিধা
