ଭୁବନେଶ୍ୱର ୦୧।୦୭ : ରାଜ୍ୟରେ ମୌସୁମୀ ଜନିତ ବର୍ଷା ଆରମ୍ଭ ହୋଇଛି । ତାପୂର୍ବରୁ ସରକାର ଆଗୁଆ ପଦକ୍ଷେପ ନେଇଛନ୍ତି । ରାଜ୍ୟରେ ଥିବା ସମସ୍ତ ବ୍ରିଜ୍ ଏବଂ ପୋଲର ଢାଞ୍ଚାଗତ ସୁରକ୍ଷା ଏବଂ ସ୍ଥିତି ଯାଞ୍ଚ କରାଯିବ ।
ଦେଶର ବିଭିନ୍ନ ସ୍ଥାନରେ ପୁରୁଣା ବ୍ରିଜ୍ ଗୁଡ଼ିକ ଭୁଶୁଡିବା ଘଟଣାକୁ ନେଇ ବଢ଼ୁଥିବା ଚିନ୍ତାରେ ଓଡ଼ିଶା ସରକାର । ରାଜ୍ୟର ସମସ୍ତ ବ୍ରିଜର ଢାଞ୍ଚାଗତ ସୁରକ୍ଷା ଆକଳନକୁ ଗୁରୁତ୍ୱ ଦେଇଛନ୍ତି। ପୂର୍ତ୍ତ ବିଭାଗ ଅଧୀନ ରାସ୍ତା ଓ ଜାତୀୟ ରାଜପଥରେ ଥିବା ସମସ୍ତ କ୍ଷୁଦ୍ର, ମଧ୍ୟମ ଓ ବଡ଼ ବ୍ରିଜର ବର୍ତ୍ତମାନ ସ୍ଥିତି ସମ୍ପର୍କିତ ସମନ୍ୱିତ ରିପୋର୍ଟ ସହ ମରାମତି ଏବଂ ପୁନର୍ନିର୍ମାଣ ଆବଶ୍ୟକ ବ୍ରିଜ୍ ଗୁଡ଼ିକର ବିବରଣୀ ୪ ଜୁଲାଇ ସୁଦ୍ଧା ଦାଖଲ କରିବାକୁ ପୂର୍ତ୍ତ ବିଭାଗ ନିର୍ଦ୍ଦେଶ ଦେଇଛି।
ପୂର୍ତ୍ତ ବିଭାଗର ଇଞ୍ଜିନିୟର-ଇନ୍-ଚିଫ୍-ତଥା-ସ୍ୱତନ୍ତ୍ର ସଚିବ ଲକ୍ଷ୍ମୀକାନ୍ତ ପାଢ଼ୀ ମୁଖ୍ୟ ଯନ୍ତ୍ରୀ (ପୋଲ-୧ ଓ ୨) ଏବଂ ମୁଖ୍ୟ ଯନ୍ତ୍ରୀ (ଜାତୀୟ ରାଜପଥ-୧ ଓ ୨)ଙ୍କୁ ଏନେଇ ପତ୍ର ଲେଖିଛନ୍ତି। ଏଥି ସହିତ ମୁଖ୍ୟ ସଚିବଙ୍କ କାର୍ଯ୍ୟାଳୟ, ପୂର୍ତ୍ତ ବିଭାଗର ପ୍ରମୁଖ ସଚିବ, ସଡ଼କ ପରିବହନ ଓ ରାଜପଥ ମନ୍ତ୍ରଣାଳୟର ଆଞ୍ଚଳିକ କାର୍ଯ୍ୟାଳୟ, ଭାରତୀୟ ଜାତୀୟ ରାଜପଥ ପ୍ରାଧିକରଣ (ଏନ୍ଏଚ୍ଏଆଇ), ସମସ୍ତ ମୁଖ୍ୟ ନିର୍ମାଣ ଯନ୍ତ୍ରୀ ଓ ଅଧୀକ୍ଷଣ ଯନ୍ତ୍ରୀଙ୍କୁ ପଠାଯାଇଛି।
ଚିଠିରେ ଉଲ୍ଲେଖ କରାଯାଇଛି ଯେ, ୧ ଅଗଷ୍ଟ ୨୦୨୫ରେ ପୂର୍ତ୍ତ ବିଭାଗ “ପୂର୍ତ୍ତ ବିଭାଗ ସଡ଼କରେ ଥିବା ପୋଲଗୁଡ଼ିକର ପରିଦର୍ଶନ ଓ ରକ୍ଷଣାବେକ୍ଷଣ ସମ୍ପର୍କିତ ନିର୍ଦ୍ଦେଶାବଳୀ” ଜାରି କରିଥିଲା। ସେହି ନିର୍ଦ୍ଦେଶାବଳୀରେ ବ୍ରିଜ୍ ଗୁଡ଼ିକର ବର୍ଗୀକରଣ ଅନୁଯାୟୀ ନିୟମିତ ପରିଦର୍ଶନ (ରୁଟିନ୍ ଇନ୍ସପେକ୍ସନ୍), ପ୍ରମୁଖ ପରିଦର୍ଶନ (ପ୍ରିନ୍ସିପାଲ୍ ଇନ୍ସପେକ୍ସନ୍) ଓ ସ୍ୱତନ୍ତ୍ର ପରିଦର୍ଶନ (ସ୍ପେସିଆଲ୍ ଇନ୍ସପେକ୍ସନ୍) ପାଇଁ ସମୟସୀମା, ପଦ୍ଧତି ଏବଂ ବିଭାଗୀୟ ଅଧିକାରୀଙ୍କ ଦାୟିତ୍ୱ ସ୍ପଷ୍ଟ କରାଯାଇଥିଲା।
ବିଭାଗ କହିଛି, ନିର୍ଦ୍ଦେଶାବଳୀର ଧାରା-୪ ଅନୁଯାୟୀ କ୍ଷେତ୍ରସ୍ତରୀୟ ଅଧିକାରୀମାନେ ନିର୍ଦ୍ଦିଷ୍ଟ ସମୟ ବ୍ୟବଧାନରେ ବ୍ରିଜ୍ ପରିଦର୍ଶନ କରି ରିପୋର୍ଟ ମୁଖ୍ୟ ଯନ୍ତ୍ରୀ (ବ୍ରିଜ୍)ଙ୍କ ନିକଟକୁ ପଠାଇବା ବାଧ୍ୟତାମୂଳକ। ପରିଦର୍ଶନ ସମୟରେ ସାମାନ୍ୟ ତ୍ରୁଟି ଚିହ୍ନଟ ହେଲେ ବିଭାଗୀୟ ଅଧିକାରୀ ତୁରନ୍ତ ତାହାର ପ୍ରତିକାର କରିବେ। କିନ୍ତୁ କୌଣସି ବ୍ରିଜରେ ଗୁରୁତର ତ୍ରୁଟି କିମ୍ବା ଢାଞ୍ଚାଗତ ଦୁର୍ବଳତା ଦେଖାଦେଲେ ତୁରନ୍ତ ସମ୍ପୃକ୍ତ ମୁଖ୍ୟ ଯନ୍ତ୍ରୀଙ୍କୁ ଅବଗତ କରାଯିବ। ଆବଶ୍ୟକ ପଡ଼ିଲେ ଡିଜାଇନ୍ ନିର୍ଦ୍ଦେଶାଳୟ କିମ୍ବା ଡିଜାଇନ୍ ପରାମର୍ଶଦାତାଙ୍କ ସହ ପରାମର୍ଶ କରି ସ୍ୱତନ୍ତ୍ର ବୈଷୟିକ ପରୀକ୍ଷା କରାଯିବ। ପୋଲର ସଂରଚନାଗତ କ୍ଷମତା ଉପରେ ସନ୍ଦେହ ସୃଷ୍ଟି ହେଲେ ଏହାର ଭାର ବହନ କ୍ଷମତା (ଲୋଡ୍ କ୍ୟାରିଂ କ୍ୟାପାସିଟି) ମଧ୍ୟ ମୂଲ୍ୟାଙ୍କନ କରାଯିବ।
Also Read:-ଗାଡ଼ିରେ ଯାଉଥିଲା ୫୦ ପେଟି ମଦ, ପୋଲିସ ଖୋଜୁଛି ମାଲିକ କିଏ ?
ସରକାର ରାଜ୍ୟର ସମସ୍ତ ପୂର୍ତ୍ତ ବିଭାଗ ଓ ଜାତୀୟ ରାଜପଥ ଅଧୀନ ପୋଲଗୁଡ଼ିକର କଣ୍ଡିସନ୍ ଆସେସମେଣ୍ଟ ରିପୋର୍ଟ ମାଗିଛନ୍ତି। ଏଥିସହ ମରାମତି କିମ୍ବା ପୁନର୍ନିର୍ମାଣ ଆବଶ୍ୟକ ବ୍ରିଜ ଗୁଡ଼ିକର ତାଲିକା ଏବଂ ସେଥିପାଇଁ ନିଆଯାଇଥିବା କାର୍ଯ୍ୟାନୁଷ୍ଠାନର ସ୍ଥିତି ରିପୋର୍ଟ ମଧ୍ୟ ମାଗିଛନ୍ତି। ବିଭାଗ ପକ୍ଷରୁ ନିର୍ଦ୍ଦେଶ ରହିଛି ଯେ, ମୁଖ୍ୟ ଯନ୍ତ୍ରୀ (ପୋଲ-୧ ଓ ୨) ରାଜ୍ୟର ସମସ୍ତ କ୍ଷେତ୍ରରୁ ତଥ୍ୟ ସଂଗ୍ରହ କରି ଆନେକ୍ସଚର-ଏରେ ନିର୍ଦ୍ଧାରିତ ଫର୍ମାଟ୍ ଅନୁଯାୟୀ ଏକ ସମନ୍ୱିତ ରିପୋର୍ଟ ପ୍ରସ୍ତୁତ କରି ୪ ଜୁଲାଇ ୨୦୨୬ ସୁଦ୍ଧା ପୂର୍ତ୍ତ ବିଭାଗକୁ ପଠାଇବେ। ଏହା ପରେ ରିପୋର୍ଟକୁ ମୁଖ୍ୟ ସଚିବଙ୍କ କାର୍ଯ୍ୟାଳୟକୁ ଅନୁମୋଦନ ଓ ପରବର୍ତ୍ତୀ ପଦକ୍ଷେପ ପାଇଁ ପ୍ରେରଣ କରାଯିବ। ଏହି ନିର୍ଦ୍ଦେଶରୁ ସ୍ପଷ୍ଟ ହୋଇଛି ଯେ, ବର୍ଷା ଋତୁରେ ବ୍ରିଜ ଗୁଡ଼ିକର ସୁରକ୍ଷା ଓ ଯାତାୟାତ ସୁନିଶ୍ଚିତ କରିବା ଲକ୍ଷ୍ୟରେ ସରକାର ସମଗ୍ର ରାଜ୍ୟର ବ୍ରିଜ ଗୁଡ଼ିକର ସ୍ଥିତି ସମ୍ପର୍କରେ ଏକ ବିସ୍ତୃତ ଡାଟାବେସ୍ ପ୍ରସ୍ତୁତ କରିବାକୁ ତତ୍ପରତା ପ୍ରକାଶ କରିଛନ୍ତି।
