ଇସ୍ଲାମାବାଦ: କକ୍ରୋଚ୍ ପାର୍ଟି ପାକିସ୍ତାନ (ସିପିପି) ନାମରେ ଏକ ନୂଆ ଅନଲାଇନ ରାଜନୀତି ସମୂହ ଏବେ ସୋସିଆଲ ମିଡିଆରେ ସମସ୍ତଙ୍କ ଧ୍ୟାନ ଆକର୍ଷଣ କରୁଛି। ଏହାକୁ ଭାରତର କକ୍ରୋଚ ଜନତା ପାର୍ଟି (ସିଜେପି) ସହ ଲୋକେ ତୁଳନା କରୁଛନ୍ତି। ପାକିସ୍ତାନରେ ଏହି ସମୂହ ଇଂଷ୍ଟାଗ୍ରାମରେ ୧.୧୨ଲକ୍ଷରୁ ଅଧିକ ଫଲୋଅର୍ସ ହାସଲ କରିଥିବା ବେଳେ ଏହା ନିଜକୁ ଭ୍ରଷ୍ଟାଚାର, ବଂଶବାଦ ରାଜନୀତି ଓ ରାଜନୈତିକ ବିଶେଷାଧିକାର ବିରୋଧରେ ଯୁବକମାନଙ୍କ ନେତୃତ୍ୱର ଆନ୍ଦୋଳନ ବୋଲି ଦାବି କରୁଛି।
ସାଧାରଣ ଭାବେ ଉପଲବ୍ଧ ସୂଚନା ଅନୁସାରେ ଏହାକୁ ନ୍ୟୁୟର୍କରେ ରହି ପଢୁଥିବା ପାକିସ୍ତାନୀ ଯୁବକ ସଲମାନ ତରାର ଆରମ୍ଭ କରିଛନ୍ତି। ଇଂଷ୍ଟାଗ୍ରାମରୁ ମିଳୁଥିବା ସୂଚନା ଅନୁସାରେ ସିପିପିର ଆକାଉଣ୍ଟ ମେ ମାସରେ ଖୋଲା ଯାଇଥିଲା, ଏହାକୁ ଏବେ କାନାଡାରୁ ଚଳା ଯାଉଛି ଓ ଏହାକୁ ଚଳିତମାସ ପ୍ରାରମ୍ଭରେ ଭେରିଫିକେସନ ମିଳିଛି। କକ୍ରୋଚ ପାର୍ଟି ପାକିସ୍ତାନର କହିବା କଥା ହେଉଛି ଏହାର ଉଦ୍ଦେଶ୍ୟ ପାରଦର୍ଶି ଶାସନ ଓ ଭଲ ରାଜନୈତିକ ନେତୃତ୍ୱକୁ ପ୍ରୋତ୍ସାହନ ଦେବା। ନିଜ ଘୋଷଣାପତ୍ରରେ ଗ୍ରୁପ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଜୋର ଦେଇଛି।
ଏଥିରେ ଦୁର୍ନୀତି ବିରୋଧରେ କାର୍ଯ୍ୟାନୁଷ୍ଠାନ, ପରିବାରବାଦ ଓ ବିଶେଷାଧିକାର ଆଧାରିତ ରାଜନୀତିକୁ ଦେଶରୁ ସମାପ୍ତ କରିବା, ରୋଜଗାରର ଅବସର ସୃଷ୍ଟି କରିବା, ଶିକ୍ଷା ବ୍ୟବସ୍ଥାର ସୁଧାର, ଶକ୍ତି ସଂକଟର ସମାଧାନ, ଜଳାଭାବର ମୁକାବିଲା ଓ ଆର୍ଥିକ ଏବଂ ରାଜନୈତିକ ସ୍ଥିରତା ସୁନିଶ୍ଚିତ କରିବା ଆଦି ରହିଛି। ସିପିପି ସୋସିଆଲ ମିଡିଆରେ ଏବେ ସକ୍ରିୟ ଅଛି ଓ ରାଜନୈତିକ ଏବଂ ସାମାଜିକ ପ୍ରସଙ୍ଗରେ ପୋଷ୍ଟ ସେୟାର କରୁଛି। ଏହାର କିଛି ପୋଷ୍ଟରେ ପାକିସ୍ତାନ ଅଧିକୃତ ଜମ୍ମୁ-କାଶ୍ମୀର (ପିଓକେ) ସମ୍ପର୍କିତ ଚିନ୍ତା ଓ ସେଠାରେ ରହୁଥିବା ଲୋକଙ୍କ ପରିସ୍ଥିତିକୁ ମଧ୍ୟ ଉଜାଗର କରିଛି। ନିକଟରେ ଏହି ଗ୍ରୁପ ସଙ୍ଗଠନର ଅଲଗା ଅଲଗା ପଦପଦବୀ ପାଇଁ ଆବେଦନ ମଧ୍ୟ ମଗାଇଥିଲା।
ସିପିପି ସାମ୍ନାକୁ ଆସିବା ପରେ ପାକିସ୍ତାନ ଅନଲାଇନରେ ଏବେ ଚର୍ଚ୍ଚା ଆରମ୍ଭ ହୋଇଗଲାଣି। ଖାସ କରି ସେବେଠାରୁ ଯେବେ ଭାରତରେ ସିଜେପିର ବିରୋଧ ପ୍ରଦର୍ଶନ ସୀମା ସେପାରର ଲୋକଙ୍କ ଧ୍ୟାନ ଆକର୍ଷଣ କରିଛି। ସେତେବେଳେ କିଛି ପାକିସ୍ତାନୀ ସୋସିଆଲ ମିଡିଆ ୟୁଜର ଟିପ୍ପଣୀ କରିଥିଲେ ଯେ ଭାରତର ଗଣତାନ୍ତ୍ରିକ ପରିବେଶ କାରଣରୁ ସେଠାରେ ଏପରି ରାଜନୈତିକ ଅଥବା ବ୍ୟଙ୍ଗାତ୍ମକ ଅଭିଯାନ ଚଳି ପାରେ। ହେଲେ ପାକିସ୍ତାନରେ ଏପରି କିଛି କଲେ ଲୋକଙ୍କୁ ଆଇନଗତ କାର୍ଯ୍ୟାନୁଷ୍ଠାନ ଓ ଗୁରୁତର ପରିଣାମର ସମ୍ମୁଖୀନ ହେବାକୁ ପଡିବ। ସୋସିଆଲ ମିଡିଆରେ ଏହି ଟିପ୍ପଣୀ ସେୟାର କରାଯାଇଥିବା ବ୍ୟକ୍ତିଗତ ମନ୍ତବ୍ୟକୁ ଦର୍ଶାଉଛି।
