এছিয়াৰ আটাইতকৈ পুৰণি ফুটবল টুৰ্ণামেণ্ট ডুৰাণ্ড কাপৰ ১৩৫তম সংস্কৰণৰ কাউন্টডাউন আনুষ্ঠানিকভাৱে আৰম্ভ কৰি বৃহস্পতিবাৰে গুৱাহাটীত ট্ৰফী যাত্ৰাৰ শুভাৰম্ভ কৰা হয়
চলিত ফিফা বিশ্বকাপৰ মাজতে অসম তথা সমগ্ৰ উত্তৰ-পূব ভাৰতত ফুটবলৰ জ্বৰ পুনৰ আৰম্ভ হৈছে । ভাৰতৰ অতি মৰ্যাদাপূৰ্ণ তথা এছিয়াৰ আটাইতকৈ পুৰণি ফুটবল টুৰ্ণামেণ্ট ‘ডুৰাণ্ড কাপ‘ৰ ১৩৫তম সংস্কৰণৰ কাউন্টডাউন আনুষ্ঠানিকভাৱে আৰম্ভ কৰি বৃহস্পতিবাৰে গুৱাহাটীত ট্ৰফী যাত্ৰাৰ শুভাৰম্ভ কৰা হয় । চহৰৰ হোটেল তাজ ভিভান্তাত আয়োজিত এক গাম্ভীৰ্যপূৰ্ণ অনুষ্ঠানত এই ঐতিহাসিক টুৰ্ণামেণ্টখনৰ তিনিখনকৈ মূল ট্ৰফীক উষ্ম আদৰণি জনোৱা হয় । এই ট্ৰফীৰ আগমনে শতিকাজোৰা ক্ৰীড়া উৎকৰ্ষতাক উদযাপন কৰাৰ লগতে অসমৰ চহকী ফুটবল পৰম্পৰাক এক নতুন মাত্ৰা প্ৰদান কৰিছে ।
ক্ৰীড়া মন্ত্ৰী আৰু সেনা প্ৰধানৰ উপস্থিতি
উক্ত মৰ্যাদাপূৰ্ণ ট্ৰফী প্ৰদৰ্শনী অনুষ্ঠানত অসম চৰকাৰৰ ক্ৰীড়া আৰু যুৱ কল্যাণ বিভাগৰ মন্ত্ৰী বিশ্বজিৎ দৈমাৰীয়ে মুখ্য অতিথি হিচাপে অংশগ্ৰহণ কৰে । ৰাজ্যখনত ফুটবলৰ প্ৰসাৰ আৰু চৰকাৰৰ প্ৰতিশ্ৰুতিক প্ৰতিফলিত কৰি মন্ত্ৰীগৰাকীৰ সৈতে উপস্থিত থাকে ক্ৰীড়া আৰু যুৱ কল্যাণ বিভাগৰ বিশেষ সচিব কৌচৰ জামিল হিলালী (অৱসৰপ্ৰাপ্ত আই এ এছ), সঞ্চালক অংকুৰ ভৰালী (এ চি এছ) আৰু অসমৰ জনপ্ৰিয় যুৱ ফুটবলাৰ পাৰ্থিৱ সুন্দৰ গগৈ ।
গুৱাহাটী মহানগৰীত পৰিক্ৰমা কৰিব ট্ৰফীয়ে
হোটেল তাজ ভিভান্তাত ট্ৰফী প্ৰদৰ্শনীৰ পিছতেই ভাৰতীয় সেনাৰ এক আকৰ্ষণীয় সামৰিক বেণ্ডৰ সহিতে ‘ফ্লেগিং অফ’ কাৰ্যসূচী সম্পন্ন হয় আৰু ট্ৰফী যাত্ৰাৰ আনুষ্ঠানিক আৰম্ভণি ঘটে । জানিব পৰা মতে, অহা দুদিন ধৰি এই ঐতিহাসিক ট্ৰফীসমূহ গুৱাহাটী মহানগৰীৰ বিভিন্ন স্থানত পৰিক্ৰমা কৰোৱা হ’ব । ক্ৰীড়াপ্ৰেমী ৰাইজৰ প্ৰদৰ্শনৰ বাবে ট্ৰফী ক্ৰমে- নতুন বিধানসভা ভৱন, লাচিত বৰফুকনৰ প্ৰতিমূৰ্তি, আই আই টি গুৱাহাটী আৰু চিটি চেণ্টাৰ মলত স্থাপন কৰা হ’ব ।
লগতে পঢ়ক : ফুটবলপ্ৰেমীৰ বাবে সাৰে থাকিব মহানগৰী! কিন্তু কিয়?
