କିଛି ମିନିଟ୍ରେ ବଦଳିଯାଏ ଜୀବନ’: KBC ନେଇ ଭାବବିହ୍ୱଳ ଅମିତାଭ ବଚ୍ଚନ
ମୁମ୍ବାଇ, : ଲୋକପ୍ରିୟ ଟେଲିଭିଜନ୍ କୁଇଜ୍ ଶୋ’ ‘କୌନ୍ ବନେଗା କରୋଡପତି’ (KBC)ର ୧୮ତମ ସିଜନ୍ ଜୋରଦାର ଭାବେ ଆଗକୁ ବଢ଼ୁଥିବା ବେଳେ ଶୋ’ର ହୋଷ୍ଟ ଅମିତାଭ ବଚ୍ଚନ ଏହା ସହ ଜଡ଼ିତ ନିଜ ଅନୁଭୂତି ବାଣ୍ଟିଛନ୍ତି। ନିଜ ବ୍ଲଗ୍ରେ ସେ କହିଛନ୍ତି, KBC କେବଳ ଏକ ଗେମ୍ ଶୋ’ ନୁହେଁ; ଏଠାରେ ପ୍ରତିଯୋଗୀଙ୍କ ସ୍ୱପ୍ନ, ସଂଘର୍ଷ ଓ ସଫଳତା ଲୋକଙ୍କୁ ଭାବବିହ୍ୱଳ କରିଥାଏ।
ଅମିତାଭ କହିଛନ୍ତି ଯେ ଶୋ’କୁ ପ୍ରକୃତରେ ପ୍ରତିଯୋଗୀ ଓ ଦର୍ଶକମାନେ ବିଶେଷ କରିଥାନ୍ତି। ସାଧାରଣ ପରିବାରରୁ ଆସିଥିବା ପ୍ରତିଯୋଗୀମାନେ ନିଜ ଜ୍ଞାନ ଓ ପ୍ରତିଭା ଜରିଆରେ ବଡ଼ ସ୍ୱପ୍ନ ପୂରଣ କରୁଥିବା ଦେଖିବା ତାଙ୍କ ପାଇଁ ଅତ୍ୟନ୍ତ ଭାବପ୍ରବଣ ମୁହୂର୍ତ୍ତ ବୋଲି ସେ ଉଲ୍ଲେଖ କରିଛନ୍ତି।
ତାଙ୍କ ମତରେ, KBCର ମଞ୍ଚରେ କେବଳ ଟଙ୍କା ଜିତିବାର ମୁହୂର୍ତ୍ତ ନୁହେଁ, ବରଂ ଏହା ପରିବାରର ସ୍ୱପ୍ନକୁ ନୂଆ ଦିଗ ଦେଇଥାଏ। ଜଣେ ପ୍ରତିଯୋଗୀଙ୍କ ଜୀବନ କେବେ କେବେ କିଛି ଘଣ୍ଟାରେ, ଆଉ କେବେ କେବେ ମାତ୍ର କିଛି ମିନିଟ୍ରେ ବଦଳିଯାଏ ବୋଲି ସେ କହିଛନ୍ତି। ଜ୍ଞାନ ଓ ଭାଗ୍ୟ ସହ ସମସ୍ତଙ୍କ ଜୀବନରେ ସୁଖଦ ଶେଷ ଆସୁ ବୋଲି ସେ ଆଶା ପ୍ରକାଶ କରିଛନ୍ତି।
ଏହାର ଏକ ଜ୍ୱଳନ୍ତ ଉଦାହରଣ ହେଉଛନ୍ତି ମୁମ୍ବାଇର ପ୍ରତିଯୋଗୀ ରୁଚିତା ଅଧାଲରାଓ। KBC-୧୮ରେ ସେ ୫୦ ଲକ୍ଷ ଟଙ୍କା ଜିତି ଚର୍ଚ୍ଚାକୁ ଆସିଥିଲେ। ରୁଚିତା SSC ପରୀକ୍ଷା ପାଇଁ ପ୍ରସ୍ତୁତି କରୁଥିଲେ , କିନ୍ତୁ ତାଙ୍କ ପରିବାରର ଆର୍ଥିକ ସ୍ଥିତି ଯୋଗୁଁ ବହି, କୋଚିଂ କିମ୍ବା ଅନ୍ୟାନ୍ୟ ପଢ଼ା ସାମଗ୍ରୀ କିଣିବା ସମ୍ଭବ ହେଉନଥିଲା। ସେ ସାର୍ବଜନୀନ ୱାଇ-ଫାଇ ବ୍ୟବହାର କରି ଇଉଟ୍ୟୁବ ରୁ ପାଠପଢ଼ା ସମ୍ବନ୍ଧୀୟ ଭିଡିଓ ଡାଉନଲୋଡ୍ କରି ଅଧ୍ୟୟନ କରୁଥିବା କଥା ମଧ୍ୟ କହିଥିଲେ। ଏପରିକି ଆର୍ଥିକ ଅସୁବିଧା କାରଣରୁ ପରିବାରରେ ଜନ୍ମଦିନ କିମ୍ବା ପର୍ବପର୍ବାଣୀ ମଧ୍ୟ ବଡ଼ ଭାବେ ପାଳନ ହେଉନଥିଲା।
KBCରୁ ମିଳିଥିବା ୫୦ ଲକ୍ଷ ଟଙ୍କା ତାଙ୍କ ଓ ପରିବାରର ସ୍ଥାୟୀ ଘରର ସ୍ୱପ୍ନ ପୂରଣ କରିବାର ରାସ୍ତା ଖୋଲିଦେଇଛି। ଏହି ଘଟଣାକୁ ଆଧାର କରି ଅମିତାଭ ବଚ୍ଚନଙ୍କ ‘କିଛି ମିନିଟ୍ରେ ଜୀବନ ବଦଳିଯାଏ’ ମନ୍ତବ୍ୟ KBCର ମୂଳ ଭାବନାକୁ ଆହୁରି ସ୍ପଷ୍ଟ କରୁଛି। KBC-୧୮ ଅଗଷ୍ଟ ୧୦ରେ ପ୍ରିମିୟର୍ ହୋଇଥିଲା। ଅମିତାଭ ବଚ୍ଚନ କ୍ରମାଗତ ୧୫ତମ ବର୍ଷ ପାଇଁ ଶୋ’ର ହୋଷ୍ଟ ଭାବେ ଫେରିଛନ୍ତି। ୨୦୦୦ରେ ପ୍ରଥମ ସିଜନ୍ଠାରୁ ସେ KBC ସହ ଜଡ଼ିତ ରହିଛନ୍ତି; କେବଳ ତୃତୀୟ ସିଜନ୍ରେ ଶାହରୁଖ ଖାନ୍ ଏହାର ହୋଷ୍ଟ ହୋଇଥିଲେ।
