‘ବସ୍ ଭଡ଼ା ପାଇଁ ଟଙ୍କା ନାହିଁ, କିନ୍ତୁ ପିଲା ପ୍ରାଇଭେଟ୍ ସ୍କୁଲରେ ପଢ଼ୁଛି’, ମହିଳାଙ୍କୁ ନେଇ ମନ୍ତ୍ରୀଙ୍କ ବିବାଦୀୟ ବୟାନ

ତିରୁଅନନ୍ତପୁରମ: ରାଜ୍ୟ ସରକାରଙ୍କ ମହିଳାମାନଙ୍କ ପାଇଁ ମାଗଣା ବସ୍ ଯାତ୍ରା ଯୋଜନା ଉପରେ କେରଳ ପରିବହନ ମନ୍ତ୍ରୀ ସି.ପି. ଜନ୍ଙ୍କ ମନ୍ତବ୍ୟ ଏବେ ବଡ଼ ବିବାଦ ସୃଷ୍ଟି କରିଛି । କେରଳ ବସ୍ ଟ୍ରାନ୍ସପୋର୍ଟ ସଂଘର ରାଜ୍ୟ ସମ୍ମିଳନୀରେ ମନ୍ତ୍ରୀ ରାଜ୍ୟର ଲୋକଙ୍କ ବ୍ୟବହାର ଓ ଖର୍ଚ୍ଚ କରିବାର ଶୈଳୀକୁ କଡ଼ା ସମାଲୋଚନା କରିଛନ୍ତି ।

ମନ୍ତ୍ରୀ ସି.ପି.ଜନ୍ କହିଛନ୍ତି, “କେରଳର ଲୋକଙ୍କ ବ୍ୟବହାର ଓ ସେମାନଙ୍କ ବ୍ୟବହାର-ବିଜ୍ଞାନକୁ ବୁଝିବା ଏବଂ ତାହା ଉପରେ କାର୍ଯ୍ୟକାରୀ କରିବା ସହଜ କାମ ନୁହେଁ । ଧନୀ ବ୍ୟକ୍ତି ଗରିବ କିମ୍ବା ନିଃସହାୟ ହେବାର ନାଟକ କରୁଛନ୍ତି, ନାଟକ କରିବା କୌଣସି ସାଧାରଣ କଥା ନୁହେଁ । କିନ୍ତୁ ଗୋଟିଏ କଥା ଯାହା ମୋ ବୁଝିବାର ବାହାରେ, ତାହା ହେଉଛି ଜଣେ ମହିଳା ଯାହାଙ୍କ ପାଖରେ ବସ୍ ଭାଡ଼ା ଦେବାକୁ ଟଙ୍କା ନାହିଁ, ସେ ତଥାପି ନିଜ ପିଲାମାନଙ୍କୁ ପ୍ରାଇଭେଟ୍ ସ୍କୁଲକୁ ପଠାଉଛନ୍ତି । ଅନ୍ୟପଟେ ସରକାରୀ ସ୍କୁଲଗୁଡ଼ିକରେ ସିଟ୍ ଖାଲି ପଡ଼ିଛି । ସରକାରୀ ସ୍କୁଲରେ କୌଣସି ଫି’ ନଦେଇ ମଧ୍ୟ ସିଟ୍ ଉପଲବ୍ଧ ରହୁଛି, ସେପଟେ ନିଜ ପିଲାଙ୍କୁ ଏପରି ପ୍ରାଇଭେଟ୍ ସ୍କୁଲକୁ ପଠାଉଛନ୍ତି ଯେଉଁଠି ମୋଟ ଫି’ ଲାଗୁଛି ।”

ମନ୍ତ୍ରୀ ଆହୁରି ମଧ୍ୟ କହିଛନ୍ତି, “ଯେତେବେଳେ ସ୍ୱାସ୍ଥ୍ୟସେବାର କଥା ଆସେ, ସେହି ମହିଳା ଜଣକ ନିଜ ବାପା କିମ୍ବା ସ୍ୱାମୀଙ୍କ ସହ ସରକାରୀ ଡାକ୍ତରଖାନାକୁ ଆସନ୍ତି ଏବଂ ଚିକିତ୍ସା ପାଇଁ ତଳେ ବି ଶୋଇପଡ଼ନ୍ତି । ପବ୍ଲିକ୍ ଟ୍ରାନ୍ସପୋର୍ଟ, ଶିକ୍ଷା ଓ ସ୍ୱାସ୍ଥ୍ୟସେବା କ୍ଷେତ୍ରରେ କେରଳର ଲୋକଙ୍କ ବ୍ୟବହାର ମୋତେ ସତରେ ଆଶ୍ଚର୍ଯ୍ୟ କରେ । ସେମାନେ ଗହଳିରେ ବି ସରକାରୀ ବସରେ ଯାତ୍ରା କରନ୍ତି, ନିଜ ପିଲାଙ୍କୁ ପ୍ରାଇଭେଟ୍ ସ୍କୁଲକୁ ପଠାନ୍ତି । କିନ୍ତୁ ଯେତେବେଳେ ସେମାନଙ୍କୁ ଚିକିତ୍ସାର ଆବଶ୍ୟକତା ପଡ଼େ, ସେମାନେ ପ୍ରାଇଭେଟ୍ ହସ୍ପିଟାଲକୁ ଯାଆନ୍ତି ନାହିଁ । କାରଣ ସେମାନଙ୍କୁ ହସ୍ପିଟାଲ ବିଲକୁ ଡର ଲାଗେ ।”

Also Read:ରାଜପଥରେ AI କ୍ୟାମେରାର କଡ଼ା ନଜର; ନିୟମ ଭାଙ୍ଗିଲେ କଟିଯିବ ଇ-ଚାଲାଣ

ମନ୍ତ୍ରୀଙ୍କ ଏହି ମନ୍ତବ୍ୟକୁ ନେଇ ସାଧାରଣ ଜନତା ଏବଂ ରାଜନୈତିକ ମହଲରେ ପ୍ରବଳ ସମାଲୋଚନା କରାଯାଉଛି । ଉଲ୍ଲେଖଯୋଗ୍ୟ, କେରଳ ସରକାର ‘ପ୍ରିୟଦର୍ଶିନୀ ଯୋଜନା’ ଆରମ୍ଭ କରିଛନ୍ତି, ଯାହା ଅଧୀନରେ ସମସ୍ତ ମହିଳା ଏବଂ ଟ୍ରାନ୍ସଜେଣ୍ଡର ବ୍ୟକ୍ତିମାନଙ୍କ ପାଇଁ ରାଜ୍ୟର ସରକାରୀ ସାଧାରଣ ବସଗୁଡ଼ିକରେ ମାଗଣା ଯାତ୍ରା ସୁବିଧା ଦିଆଯାଉଛି ।