ସରକାରୀ ବାହନ ଉପରେ କଟକଣା ଲାଗୁ କଲେ ଫଡନବୀଶ ସରକାର, ଅଧିକାରୀଙ୍କୁ ମିଳିବନି ଫ୍ୟାନସି ନମ୍ବର ବାବଦ ଖର୍ଚ୍ଚ

ମୁମ୍ବାଇ: ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀଶ ସରକାରୀ ବିଭାଗ ଓ ଅଧିକାରୀଙ୍କ ଲାଗି ବାହନ କ୍ରୟ ସମ୍ପର୍କିତ ନିୟମ କଡ଼ାକଡ଼ି କରିଛନ୍ତି। ସରକାର ସ୍ପଷ୍ଟ କରିଦେଇଛନ୍ତି ଯେ ସରକାରୀ ବାହନ ଲାଗି ଭିଆଇପି ଅଥବା ଆରଟିଓ ନମ୍ବର କ୍ରୟ କରାଗଲେ ରାଜକୋଷରୁ ଅର୍ଥ ବ୍ୟୟ ହେବ ନାହିଁ। ନୂଆ ନିର୍ଦ୍ଦେଶ ଅନୁସାରେ ସରକାରୀ ବିଭାଗ, ମନ୍ତ୍ରୀ ଅଥବା ଅଧିକାରୀ କୌଣସି ବାହନ ଲାଗି ନିଜ ପସନ୍ଦର ଅଥବା ଖାସ ନମ୍ବର ନେଲେ ଏଥି ପାଇଁ ଯେଉଁ ପୈଠ ହୁଏ ତାହା ସରକାର ଆଉ ବହନ କରିବେ ନାହିଁ।

ଯଦି ମନ୍ତ୍ରୀ, ଅଧିକାରୀ ଅଥବା ବିଭାଗ ଏପରି ନମ୍ବର ନିଅନ୍ତି ପରେ ଏ ବାବଦ ଖର୍ଚ୍ଚ ସରକାର ରାଜକୋଷରୁ ଦେବେ ନାହିଁ। ସରକାରଙ୍କ ଏହି ନିଷ୍ପତ୍ତି ସରକାରୀ ଧନ ଉପଯୋଗରେ ପାରଦର୍ଶିତା ଓ ଫାଲତୁ ଖର୍ଚ୍ଚ ଉପରେ ରୋକ ଲଗାଇବା ଉଦ୍ଦେଶ୍ୟରେ ନିଆଯାଇଛି। ଏବେ ସରକାରୀ ବାହନଙ୍କ ଲାଗି ସ୍ୱଭାବିକ ପ୍ରକ୍ରିୟାରେ ନମ୍ବର ଆବଣ୍ଟିତ ହେବ ଓ କୌଣସି ଖାସ ନମ୍ବର ପାଇଁ ଅତିରିକ୍ତ ସରକାରୀ ଖର୍ଚ୍ଚ ପାଇଁ ଅନୁମତି ମିଳିବ ନାହିଁ। ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ବିଭାଗ ଓ ଅଧିକାରୀ ଗାଡ଼ି କିଣିବା ବେଳେ ଏହି ନିୟମକୁ କଡ଼ାକଡ଼ି ପାଳନ କରିବାକୁ କୁହାଯାଇଛି।

ସରକାରଙ୍କ କହିବା କଥା ହେଉଛି ସରକାରୀ ଧନର ଉପଯୋଗ କେବଳ ଜରୁରି ଓ ନିର୍ଦ୍ଧାରିତ ଖର୍ଚ୍ଚ ପାଇଁ କରାଯିବା ଉଚିତ। ମୁଖ୍ୟମନ୍ତ୍ରୀଙ୍କ ଏହି ନିଷ୍ପତ୍ତି ପରେ ସରକାରୀ ବାହନରେ ଭିଆଇପି ନମ୍ବର ଲଗାଇବା ପାଇଁ ଅତିରିକ୍ତ ଖର୍ଚ୍ଚ କରିବାର ପ୍ରବୃତ୍ତି ରୋକ ଲାଗିବ ବୋଲି ଆଶା କରାଯାଉଛି। ଏହା ସହିତ ମନ୍ତ୍ରୀ ଓ ଅଧିକାରୀ ନିଜ ପସନ୍ଦର ନମ୍ବର ପାଇଁ ବ୍ୟକ୍ତିଗତ ଭାବେ କରୁଥିବା ବ୍ୟୟକୁ ସରକାରୀ ଖାତାରେ ଦର୍ଶାଇ ପରେ ପଇସା ଫେରସ୍ତ ନେବାର ରାସ୍ତା ବନ୍ଦ ହୋଇଯାଇଛି।