‘ ସୁଯୋଗ ମିଳିଲେ ମୋଦିଜୀଙ୍କ ପାଦ ଧୋଇ ପାଣି ପିଇବି: ପ୍ରଧାନମନ୍ତ୍ରୀଙ୍କୁ ଭଗବାନ ବିଷ୍ଣୁଙ୍କ ଅବତାର କହିଲେ ଅଭିନେତା ସୁଦେଶ ବେରୀ

ମୁମ୍ବାଇ: ବଲିଉଡ୍ ଅଭିନେତା ସୁଦେଶ ବେରୀଙ୍କ ଏକ ବୟାନକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି। ଏକ ପଡ୍କାଷ୍ଟରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ‘ଭଗବାନ ବିଷ୍ଣୁଙ୍କ ଅବତାର’ ବୋଲି କହିବା ସହ ସୁଯୋଗ ମିଳିଲେ ତାଙ୍କ ପାଦ ଧୋଇ ପାଣି ପିଇବେ ବୋଲି କହିଛନ୍ତି। ଏହା ସହ ସେ କକ୍ରୋଚ ଜନତା ପାର୍ଟିର ଆନ୍ଦୋଳନକୁ ମଧ୍ୟ ସମାଲୋଚନା କରିଛନ୍ତି।

ଜୁଲାଇ ୨୮ରେ ପ୍ରକାଶିତ ‘ଏକମ୍ପାନୀ ଅକ୍କି’ ପଡ୍କାଷ୍ଟରେ ସୁଦେଶ ବେରୀ କହିଥିଲେ ଯେ ସେ CJP ବିଷୟରେ ବିଶେଷ କିଛି ଜାଣିନାହାନ୍ତି। ତାଙ୍କ ମତରେ, ଏଭଳି ସଂଗଠନ ଦେଶକୁ ଆଗକୁ ନେବା ବଦଳରେ ପଛକୁ ଟାଣୁଛି।

ସେ କହିଥିଲେ, “ଏହି ଲୋକମାନଙ୍କର ଦେଶ ପାଇଁ କୌଣସି କାମ ନାହିଁ। ଯଦି ସତରେ ସମାଜସେବା କରିବାକୁ ଚାହୁଁଛନ୍ତି, ତେବେ ପିଲାମାନଙ୍କ ପାଇଁ ପାର୍କ ତିଆରି କରନ୍ତୁ, ବୃଦ୍ଧମାନଙ୍କ ପାଇଁ ବୃଦ୍ଧାଶ୍ରମ ନିର୍ମାଣ କରନ୍ତୁ ଏବଂ ଗରିବ ଲୋକଙ୍କ ଚିକିତ୍ସାର ବ୍ୟବସ୍ଥା କରନ୍ତୁ। କେବଳ ଜନ୍ତର ମନ୍ତରରେ ବସି ଆନ୍ଦୋଳନ କଲେ କିଛି ହାସଲ ହେବ ନାହିଁ।”

CJPର ନାମକୁ ନେଇ ମଧ୍ୟ ସେ କଟାକ୍ଷ କରି କହିଥିଲେ, “ଏମାନେ ଏକ ଅଜବ ଜୀବର ନାଁରେ ଦଳ ଗଠନ କରିଛନ୍ତି। ତା’ପରିବର୍ତ୍ତେ ହାଇନା ପାର୍ଟି କାହିଁକି ଗଠନ କରୁନାହାନ୍ତି?”

ପ୍ରଧାନମନ୍ତ୍ରୀ ମୋଦୀଙ୍କ ପ୍ରଶଂସା କରି ସୁଦେଶ ବେରୀ କହିଥିଲେ, “ନରେନ୍ଦ୍ର ମୋଦୀ କ’ଣ ଭୁଲ କରିଛନ୍ତି? ସେ ଚା’ ବିକ୍ରି କରୁଥିଲେ, ନିଜ ପରିଶ୍ରମ ବଳରେ ଆଜି ସାରା ବିଶ୍ୱରେ ଭାରତର ନାମ ଉଜ୍ଜ୍ୱଳ କରିଛନ୍ତି।”

ସେ ଆହୁରି କହିଥିଲେ, “ମୁଁ ପୂର୍ବରୁ ମୋ ମା’ଙ୍କ ପାଦ ଧୋଇଥିଲି। ସୁଯୋଗ ମିଳିଲେ ମୁଁ ମୋଦୀଜୀଙ୍କ ପାଦ ମଧ୍ୟ ଧୋଇ ସେହି ପାଣି ପିଇବି। ମୁଁ ତାଙ୍କୁ କେବେ ବ୍ୟକ୍ତିଗତ ଭାବେ ଭେଟିନାହିଁ। ଯେପରି ଆମେ ଭଗବାନଙ୍କୁ ନ ଦେଖି ମଧ୍ୟ ପୂଜା କରୁ, ସେହିଭଳି ମୁଁ ମୋଦୀଜୀଙ୍କୁ ସମ୍ମାନ କରେ।”

ସୁଦେଶ ବେରୀ ସ୍ପଷ୍ଟ କରିଛନ୍ତି ଯେ ତାଙ୍କ ସମ୍ମାନ କୌଣସି ରାଜନୈତିକ ଦଳ ପାଇଁ ନୁହେଁ, ବରଂ ଜଣେ ବ୍ୟକ୍ତି ଭାବେ ନରେନ୍ଦ୍ର ମୋଦୀଙ୍କ ପ୍ରତି ଅଛି। ଏହା ସହ ସେ ଦେଶରେ ‘ରାମ ରାଜ୍ୟ’ ଆସିଯାଇଛି ବୋଲି କହିବା ସହ କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ଏବଂ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ କାର୍ଯ୍ୟର ମଧ୍ୟ ପ୍ରଶଂସା କରିଥିଲେ।

ଉଲ୍ଲେଖଯୋଗ୍ୟ, ସୁଦେଶ ବେରୀ ସମ୍ପ୍ରତି ‘Border 2’ (୨୦୨୬) ଫିଲ୍ମରେ ଏକ କ୍ୟାମିଓ ଭୂମିକାରେ ଅଭିନୟ କରିଥିବା ଦେଖିବାକୁ ମିଳିଥିଲା। ଏହାପୂର୍ବରୁ ଅଭିନେତ୍ରୀ ତଥା ସାଂସଦ କଙ୍ଗନା ରଣାୱତ ମଧ୍ୟ CJPର ଆନ୍ଦୋଳନକୁ ସମାଲୋଚନା କରିଥିଲେ, ଯାହାକୁ ନେଇ ସୋସିଆଲ ମିଡିଆରେ ବିଭିନ୍ନ ପ୍ରତିକ୍ରିୟା ଦେଖିବାକୁ ମିଳିଥିଲା।