১১৭ বছৰীয়া মাজবাট ৰে’লৱে ষ্টেচনে পালে ন ৰূপ …

অসমৰ ওদালগুৰি জিলাৰ ঐতিহাসিক মাজবাট ৰেলৱে ষ্টেচনটো অমৃত ভাৰত ষ্টেচন আঁচনিৰ অধীনত পুনৰ উন্নিত কৰা হৈছে।

অসমৰ ওদালগুৰি জিলাৰ ঐতিহাসিক মাজবাট ৰে’লৱে ষ্টেচনটোৱে অমৃত ভাৰত ষ্টেচন আঁচনিৰ অধীনত পুনৰ্নিৰ্মাণ কৰা হৈছে। ইয়াৰ ফলত এই ১১৭ বছৰীয়া পুৰণি ৰে’লৱে ষ্টেচনটোৱে ইয়াৰ ঐতিহাসিক স্বকীয়তা ৰক্ষা কৰাৰ লগতে এক আধুনিক যাত্ৰীবাহী সুবিধালৈ ৰূপান্তৰিত হৈছে।

আনুমানিক ১০ কোটি টকা ব্যয় সাপেক্ষে পুনৰ নিৰ্মাণ কৰা এই ষ্টেচনটো অসমৰ ৫০টা ৰে’লৱে ষ্টেচনৰ ভিতৰত অন্যতম, যাক কেন্দ্ৰীয় চৰকাৰৰ ধ্বজাবাহী ষ্টেচন পুনৰ্নিৰ্মাণ কাৰ্যসূচীৰ অধীনত আধুনিকীকৰণ কৰা হৈছে। এই প্ৰকল্পটোৱে আঞ্চলিক সংযোগ ব্যৱস্থা সুদৃঢ় কৰাৰ লগতে যাত্ৰীৰ আৰাম, সুৰক্ষা, সুগমতা আৰু কাৰ্যক্ষমতা বৃদ্ধি কৰাৰ ওপৰত গুৰুত্ব আৰোপ কৰিছে।

এই পুনৰ্নিৰ্মাণৰ অধীনত ষ্টেচনৰ ভৱনটো নতুন ৰূপত সজাই তোলা হৈছে, প্ৰৱেশদ্বাৰখন নতুনকৈ ডিজাইন কৰা হৈছে, বাহন আৰু যাত্ৰীৰ সুচল চলাচলৰ বাবে চক্ৰাকাৰ এলেকা (circulating area) প্ৰসাৰিত কৰা হৈছে, সুনিয়ন্ত্ৰিত পাৰ্কিং ব্যৱস্থা আৰু খোজকাঢ়ি যোৱা লোকৰ বাবে সুকীয়া পথৰ ব্যৱস্থা কৰা হৈছে। যাত্ৰীসকলৰ অহা-যোৱা তথা উঠা-নমা কৰাৰ ব্যৱস্থা উন্নত কৰিবলৈ এটা সুপ্রশস্ত প্ৰৱেশ বাৰাণ্ডা (entrance porch) নিৰ্মাণ কৰা হৈছে।

যাত্ৰীসকলৰ বাবে উন্নত টিকট বুকিং কাউণ্টাৰ য’ত উন্নত শাৰী পাতি থিয় হোৱাৰ ব্যৱস্থা আছে, এটা বিশাল জিৰণি কোঠা (waiting hall), এটি সুকীয়া শিশু যত্ন কোঠা (baby care room) আৰু আধুনিক শৌচাগাৰ (দিব্যাংগসকলৰ বাবে বিশেষ সুবিধাসহ) অন্তৰ্ভুক্ত কৰি যাত্ৰী সেৱা লক্ষণীয়ভাৱে উন্নত কৰা হৈছে।

যাত্ৰীসকলৰ সুৰক্ষা আৰু সুবিধাৰ বাবে ষ্টেচনৰ প্লেটফৰ্মসমূহ উন্নত কৰা হৈছে। সামগ্ৰিক ভ্ৰমণৰ অভিজ্ঞতা অধিক সুখকৰ কৰিবলৈ নতুন যাত্ৰী তথ্য প্ৰণালী, ৰে’ল প্ৰদৰ্শন ব’ৰ্ড (train display boards), দবা নিৰ্দেশক প্ৰদৰ্শন ব’ৰ্ড (coach guidance displays) আৰু হাই-মাষ্ট লাইট স্থাপন কৰা হৈছে।

পুনৰ্নিৰ্মাণৰ ক্ষেত্ৰত বিশেষভাৱে সক্ষম ব্যক্তিসকলৰ সুগমতাৰ ওপৰত বিশেষ গুৰুত্ব দিয়া হৈছে। ভিন্নক্ষম ব্যক্তিসকলৰ বাধাহীন চলাচল নিশ্চিত কৰিবলৈ এতিয়া ষ্টেচনটোত ৰেম্প, টেকটাইল টাইলছ (tactile tiles), স্পষ্ট সংকেত ফলক আৰু সংৰক্ষিত পাৰ্কিং স্থানৰ ব্যৱস্থা কৰা হৈছে।

১৯০৯ চনত স্থাপিত হোৱা মাজবাট ৰে’লৱে ষ্টেচনটো উত্তৰ-পূব সীমান্ত ৰে’লৱেৰ ৰঙিয়া সংমণ্ডলৰ অধীনস্থ ৰঙিয়া-মুৰ্কংচেলেক ৰেল শাখাৰ অন্তৰ্গত। এশ বছৰৰো অধিক সময় ধৰি এই ষ্টেচনটোৱে অঞ্চলটোক সেৱা আগবঢ়াই আহিছে আৰু অসম তথা অৰুণাচল প্ৰদেশৰ কেইবাখনো চহৰ আৰু গাঁৱক সংযোগ কৰিছে। প্ৰধানমন্ত্ৰী নৰেন্দ্ৰ মোদীয়ে দেশজুৰি ৰে’লৱে ষ্টেচনসমূহৰ আধুনিকীকৰণ কৰাৰ লগতে যাত্ৰীসেৱা আৰু আঞ্চলিক সংযোগ উন্নত কৰাৰ উদ্দেশ্যে গ্ৰহণ কৰা ৰাষ্ট্ৰীয় প্ৰচেষ্টা ‘অমৃত ভাৰত ষ্টেচন আঁচনি’ৰ অংশ হিচাপে এই পুনৰ্নিৰ্মিত মাজবাট ৰে’লৱে ষ্টেচনটো দেশবাসীৰ বাবে উচৰ্গা কৰিছে।

লগতে পঢ়ক: “অসমত হ্ৰাস পাইছে দৰিদ্ৰতাৰ শতাংশ’; সদনত মুখ্যমন্ত্ৰীৰ উত্তৰ