ମୁମ୍ବାଇ ୧୬: ‘ବିମଲ୍’ ବିଜ୍ଞାପନକୁ ନେଇ ବଲିଉଡ୍ ର ତିନି ଚର୍ଚ୍ଚିତ ଅଭିନେତା ଶାହରୁଖ ଖାନ, ଅଜୟ ଦେବଗନ ଓ ଟାଇଗର ଶ୍ରଫଙ୍କ ପାଇଁ ବଢ଼ିଲା ଅଡୁଆ। ମହାରାଷ୍ଟ୍ର ଫୁଡ୍ ଆଣ୍ଡ ଡ୍ରଗ୍ ଆଡମିନିଷ୍ଟ୍ରେସନ୍ (FDA) ଏହି ତିନି ଅଭିନେତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛି। FDAର ଅଭିଯୋଗ ଅନୁଯାୟୀ, ‘ବିମଲ’ ନାଁରେ କେବଳ ଇଲାଇଚିକୁ ପ୍ରମୋଟ୍ କରାଯାଉନି, ବରଂ ବିଜ୍ଞାପନ ମାଧ୍ୟମରେ ରାଜ୍ୟରେ ପାନ ମସଲା ବ୍ରାଣ୍ଡକୁ ପରୋକ୍ଷରେ ପ୍ରଚାର କରାଯାଉଛି। ପାନ ମସଲା ଓ ଗୁଟଖା ମହାରାଷ୍ଟ୍ରରେ ସଂପୂର୍ଣ୍ଣ ଭାବେ ନିଷିଦ୍ଧ।
ଇଲାଇଚି ନାଁରେ ପାନ ମସଲାର ପ୍ରଚାର?
ଆମେ ପ୍ରାୟତଃ ଟିଭିରେ ପ୍ରସିଦ୍ଧ ତାରକାମାନଙ୍କୁ ଏକ ଇଲାଇଚି ବ୍ରାଣ୍ଡକୁ ସମର୍ଥନ କରୁଥିବାର ଦେଖିଥାଉଛି। ଯେତେବେଳେ କି ସମାନ ନାଁରେ ବଜାରରେ ଗୁଟଖା ବା ପାନ ମସଲା ବିକ୍ରି ଅଛି। ଏହି ଅଭ୍ୟାସକୁ ସରୋଗେଟ୍ ବିଜ୍ଞାପନ କୁହାଯାଏ। ରିପୋର୍ଟ ଅନୁଯାୟୀ, ତୁକାରାମ ମୁଣ୍ଢେ ଏକ ନଅ ପୃଷ୍ଠାର ନୋଟିସରେ ସ୍ପଷ୍ଟ କରିଛନ୍ତି ଯେ ‘ବିମଲ ଏଲାଇଚି’ର ବିଜ୍ଞାପନ ସିଧାସଳଖ ‘ବିମଲ ପାନ ମସଲା’ର ବ୍ରାଣ୍ଡିଂକୁ ପ୍ରୋତ୍ସାହିତ କରେ। ଖାଦ୍ୟ ସୁରକ୍ଷା ଏବଂ ମାନକ (FSS) ଆଇନ, 2006 ଅନୁଯାୟୀ ଏପରି ଭ୍ରାମକ ବିଜ୍ଞାପନ ସମ୍ପୂର୍ଣ୍ଣ ବେଆଇନ।
ନୋଟିସରେ କ’ଣ ରହିଛି?
ରିପୋର୍ଟ ଅନୁସାରେ, FDA ଅଭିନେତାମାନଙ୍କୁ ବିଜ୍ଞାପନ ସମ୍ପର୍କିତ ତଥ୍ୟ ଦେବାକୁ କହିଛି। ଏହା ସହ ବିଜ୍ଞାପନରେ ସେମାନଙ୍କ ଭୂମିକା ଏବଂ ପ୍ରଚାରିତ ବ୍ରାଣ୍ଡର ପ୍ରକୃତ ସ୍ୱରୂପ ସମ୍ପର୍କରେ ମଧ୍ୟ ପ୍ରଶ୍ନ ଉଠାଯାଇଛି। FDA ଏହି ବିଜ୍ଞାପନକୁ ପ୍ରଥମ ଦୃଷ୍ଟିରେ ନିଷିଦ୍ଧ ପାନ ମସଲା ବ୍ରାଣ୍ଡର ପରୋକ୍ଷ ପ୍ରଚାର ଭାବେ ଦେଖୁଛି। ତେବେ ନୋଟିସ୍ ଜାରି ହେବା ଅର୍ଥ ଅଭିନେତାମାନେ ଦୋଷୀ ପ୍ରମାଣିତ ହୋଇଯାଇଛନ୍ତି ବୋଲି ନୁହେଁ। ସେମାନଙ୍କ ଜବାବ ଏବଂ ତଦନ୍ତ ପରେ ପରବର୍ତ୍ତୀ ଆଇନଗତ ପଦକ୍ଷେପ ନିଆଯିବ।
ପୂର୍ବରୁ ମଧ୍ୟ ବିବାଦରେ ଥିଲା ବିମଳ ବିଜ୍ଞାପନ
‘ବିମଳ ଇଲାଇଚି’ ବିଜ୍ଞାପନକୁ ନେଇ ବିବାଦ ନୂଆ ନୁହେଁ। ୨୦୨୨ରେ ଶାହରୁଖ ଖାନ ଓ ଅଜୟ ଦେବଗନଙ୍କ ସହ ଅକ୍ଷୟ କୁମାର ମଧ୍ୟ ଏହି ବିଜ୍ଞାପନରେ ନଜର ଆସିଥିଲେ। ଏହାକୁ ନେଇ ସୋସିଆଲ ମିଡିଆରେ ଅକ୍ଷୟଙ୍କୁ ତୀବ୍ର ସମାଲୋଚନାର ସମ୍ମୁଖୀନ ହେବାକୁ ପଡ଼ିଥିଲା। ପରେ ସେ ପ୍ରଶଂସକଙ୍କୁ କ୍ଷମା ମାଗିବା ସହ ତମାଖୁକୁ ସମର୍ଥନ କରିନଥିବା କହିଥିଲେ ଏବଂ ବିଜ୍ଞାପନ ସହିତ ନିଜର ସମ୍ପର୍କ ଶେଷ କରିଥିଲେ।
ଏବେ ମହାରାଷ୍ଟ୍ର FDAର ନୋଟିସ୍ ପରେ ପୁଣିଥରେ ‘ବିମଳ’ ବିଜ୍ଞାପନ ଏବଂ ସେଲିବ୍ରିଟି ଏଣ୍ଡୋର୍ସମେଣ୍ଟକୁ ନେଇ ଚର୍ଚ୍ଚା ଜୋର ଧରିଛି। ଏହି ମାମଲାରେ ଅଭିନେତାମାନଙ୍କ ଜବାବ ଆସିବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ସ୍ପଷ୍ଟ ହେବ।
