ডিব্ৰুগড়ৰ মুখ্যমন্ত্ৰী সচিবালয়ৰ পিছফালে থকা পল্টন বজাৰত সোমবাৰে জিলা প্ৰশাসনে এক উচ্ছেদ অভিযান চলায় ।
অবৈধ দখলৰ বিৰুদ্ধে এক্সন মুডত ডিব্ৰুগড় জিলা প্ৰশাসন । সোমবাৰে জিলা প্ৰশাসনে মুখ্যমন্ত্ৰীৰ সচিবালয়ৰ পিছফালে থকা পল্টন বজাৰত এক বৃহৎ উচ্ছেদ অভিযান চলাই । এই উচ্ছেদ অভিযানত প্ৰশাসনে ব্ৰহ্মপুত্ৰ নদীৰ পাৰত থকা প্ৰায় ৯ বিঘা মাটি বেদখল মুক্ত কৰে । কোনো বাধা অবিহনেই শান্তিপূৰ্ণভাৱে এই উচ্ছেদ সমাপন কৰে প্ৰশাসনে ।
ডিব্ৰুগড় জিলা প্ৰশাসনে জনোৱা মতে উচ্ছেদিত এই মাটিখিনিত দীৰ্ঘদিনৰ পৰা প্ৰায় ৬০ টা পৰিয়ালে অবৈধভাৱে বাস কৰি আছিল । উচ্ছেদৰ পূৰ্বে এই পৰিয়ালসমূহলৈ স্থান খালী কৰিবলৈ জাননীও প্ৰেৰণ কৰিছিল প্ৰশাসনে ।
আৰক্ষীৰ সহযোগত চলোৱা এই উচ্ছেদ অভিযানত কোনো ধৰণৰ বাধা বা অপ্ৰীতিকৰ পৰিস্থিতিৰ সৃষ্টি নহয় তাৰ বাবে কটকটীয়া নিৰাপত্তা ব্যৱস্থা গঢ়ি তোলা হয় । প্ৰশাসনে জনোৱা মতে অকৰ্তৃত্বশীলভাৱে দখল কৰি থকা চৰকাৰী মাটি উদ্ধাৰৰ বাবে এই উচ্ছেদ অভিযান চলোৱা হয় । প্ৰশাসনে এক্সেভেটৰ আৰু অন্যান্য যন্ত্ৰ-পাতি ব্যৱহাৰ কৰি অবৈধ নিৰ্মাণসমূহ উচ্ছেদ কৰে ।
উল্লেখ্য যে, এই অঞ্চলটো ডিব্ৰুগড়ৰ মাইজান অঞ্চলৰ সমীপৱৰ্তী নদীৰ পাৰৰ অংশ, য’ত প্ৰশাসনে পূৰ্বেও ৰাজহুৱা ভূমি দখলক লৈ উদ্বেগ প্ৰকাশ কৰিছিল । ইফালে চৰকাৰী ভূমি বেদখল হৈ থকা ডিব্রুগড়ৰ অন্যান্য প্ৰান্ততো অনাগত দিনত অনুৰূপ অভিযান চলোৱাৰ সম্ভাৱনা আছে বুলি ইংগিত দিয়ে প্ৰশাসনে ।
লগতে পঢ়ক : গুৱাহাটীবাসী সাৱধান! দুৰ্যোগ প্ৰশমন বিভাগৰ জৰুৰী সতৰ্কবাণী!
