ନୂଆଦିଲ୍ଲୀ: ଭାରତ ଏବଂ ଇଂଲଣ୍ଡ ମଧ୍ୟରେ ଟି-୨୦ ସିରିଜ୍ର ପ୍ରଥମ ମ୍ୟାଚ୍ ବୁଧବାର ଚେଷ୍ଟର-ଲେ-ଷ୍ଟ୍ରୀଟ୍ର ରିଭରସାଇଡ୍ ଗ୍ରାଉଣ୍ଡରେ ଖେଳାଯିବ । ମ୍ୟାଚ୍ ପୂର୍ବରୁ ସବୁଠାରୁ ବଡ଼ ପ୍ରଶ୍ନ ଭାରତୀୟ ପ୍ଲେଇଙ୍ଗ-୧୧କୁ ନେଇ ରହିଛି । ଇଂଲଣ୍ଡ ନିଜ ଦଳ ଘୋଷଣା କରିସାରିଛି ଏବଂ ଫାଷ୍ଟ ବୋଲର ଜୋଫ୍ରା ଆର୍ଚ୍ଚରଙ୍କୁ ପ୍ରଥମ ମ୍ୟାଚରେ ବିଶ୍ରାମ ଦେଇଛି । ଏବେ ସମସ୍ତଙ୍କ ନଜର ଭାରତୀୟ ଅଧିନାୟକ ଶ୍ରେୟସ ଆୟରଙ୍କ ଉପରେ ରହିଛି ।
ଆୟର୍ଲ୍ୟାଣ୍ଡ ବିପକ୍ଷରେ ୦-୨ରେ ଟି-୨୦ ସିରିଜ୍ ହାରିବା ପରେ ଭାରତୀୟ ଦଳରେ ପରିବର୍ତ୍ତନ ହେବ କି ନାହିଁ, ସେ ନେଇ ଆଲୋଚନା ଚାଲିଛି । ସବୁଠାରୁ ଅଧିକ ଉତ୍ସୁକତା ୧୫ ବର୍ଷୀୟ ବ୍ୟାଟର ବୈଭବ ସୂର୍ଯ୍ୟବଂଶୀଙ୍କ ଡେବ୍ୟୁକୁ ନେଇ ରହିଛି ।
ଏହାରି ଭିତରେ ଭାରତର ପୂର୍ବତନ ଅଧିନାୟକ ତଥା ୧୯୮୩ ମସିହା ୱାର୍ଲ୍ଡ କପ୍ ବିଜେତା କୃଷ୍ଣମାଚାରୀ ଶ୍ରୀକାନ୍ତ ନିଜର ପସନ୍ଦର ଭାରତୀୟ ପ୍ଲେଇଙ୍ଗ-୧୧ ବାଛିଛନ୍ତି । ସେ ଓପନିଂ ପାଇଁ ଅଭିଷେକ ଶର୍ମା ଏବଂ ସଞ୍ଜୁ ସାମସନଙ୍କୁ ରଖିଛନ୍ତି । ତୃତୀୟ ସ୍ଥାନରେ ଇଶାନ କିଷାନ ଏବଂ ଅଧିନାୟକ ଶ୍ରେୟସ ଆୟର ଚତୁର୍ଥ ସ୍ଥାନରେ ଅଛନ୍ତି । ମିଡିଲ୍ ଅର୍ଡରରେ ତିଲକ ବର୍ମା ଏବଂ ଶିବମ ଦୁବେଙ୍କୁ ସ୍ଥାନ ଦେଇଛନ୍ତି । ଅଲରାଉଣ୍ଡର ଭାବେ ଅକ୍ଷର ପଟେଲଙ୍କୁ ସାମିଲ କରିଛନ୍ତି । ବୋଲିଂ ଡିପାର୍ଟମେଣ୍ଟରେ ବରୁଣ ଚକ୍ରବର୍ତ୍ତୀ, ହର୍ଷିତ ରାଣା, ପ୍ରିନ୍ସ ଯାଦବ ଏବଂ ଅର୍ଶଦୀପ ସିଂଙ୍କୁ ଭରସା କରିଛନ୍ତି ।
‘ବୈଭବଙ୍କୁ ଆୟର୍ଲ୍ୟାଣ୍ଡରେ ସୁଯୋଗ ମିଳିବା ଉଚିତ ଥିଲା’
ଶ୍ରୀକାନ୍ତଙ୍କ ମତରେ ବୈଭବ ସୂର୍ଯ୍ୟବଂଶୀଙ୍କୁ ଆୟର୍ଲ୍ୟାଣ୍ଡ ବିପକ୍ଷ ଦ୍ୱିତୀୟ ଟି-୨୦ ମ୍ୟାଚରେ ଖେଳାଯିବାର ଥିଲା । ତାଙ୍କ କହିବା ଅନୁସାରେ, ପ୍ରଥମ ମ୍ୟାଚରେ ଅଭିଷେକ ଶର୍ମା ଚମତ୍କାର ଅର୍ଦ୍ଧଶତକ ହାସଲ କରିଥିଲେ, ତେଣୁ ଦ୍ୱିତୀୟ ମ୍ୟାଚରେ ତାଙ୍କୁ ଆରାମ ଦେଇ ବୈଭବଙ୍କୁ ସୁଯୋଗ ଦିଆଯାଇପାରିଥାନ୍ତା । ସେ କହିଛନ୍ତି ଯେ ଅଭିଷେକ ଶର୍ମା ଦଳର ନିୟମିତ ଖେଳାଳି ଏବଂ ତାଙ୍କ ସ୍ଥାନ ସୁରକ୍ଷିତ ଅଛି । ଏଭଳି ପରିସ୍ଥିତିରେ ଯଦି ବୈଭବଙ୍କୁ ସୁଯୋଗ ମିଳିଥାନ୍ତା, ତେବେ ସେ ଅନ୍ତର୍ଜାତୀୟ ସ୍ତରରେ ନିଜକୁ ପ୍ରମାଣିତ କରିପାରିଥାନ୍ତେ ।
ଇଂଲଣ୍ଡ ବିପକ୍ଷରେ ପରିବର୍ତ୍ତନ ଚାହୁଁନାହାନ୍ତି
ଶ୍ରୀକାନ୍ତ ଇଂଲଣ୍ଡ ସିରିଜ୍ ଆରମ୍ଭରେ ଓପନିଂ ଯୋଡ଼ି ସହ କୌଣସି ଅଦଳବଦଳ କରିବା ପକ୍ଷରେ ନାହାନ୍ତି । ତାଙ୍କ କହିବା କଥା ହେଉଛି, ଯେତେବେଳେ ବୈଭବଙ୍କୁ ଆୟର୍ଲ୍ୟାଣ୍ଡରେ ସୁଯୋଗ ଦିଆଗଲା ନାହିଁ, ତେବେ ଏବେ ଇଂଲଣ୍ଡ ଭଳି ଏକ ଶକ୍ତିଶାଳୀ ଦଳ ବିପକ୍ଷରେ ପ୍ରଥମ ଦୁଇଟି ଟି-୨୦ ମ୍ୟାଚ୍ରେ ତାଙ୍କୁ ଖେଳାଇବା ଠିକ୍ ନିଷ୍ପତ୍ତି ହେବ ନାହିଁ ।
