ପାଟନା: ବାଙ୍କୀପୁର ବିଧାନସଭା ଉପନିର୍ବାଚନର ଭୋଟ୍ ଗଣତି ସୋମବାର, ଅଗଷ୍ଟ ୩ ତାରିଖରେ ପାଟନାର ଏଏନ୍ (AN) କଲେଜରେ ଅନୁଷ୍ଠିତ ହେବ। ସକାଳ ୮ଟାରୁ ଆରମ୍ଭ ହେବାକୁ ଥିବା ଏହି କାଉଣ୍ଟିଂ ପାଇଁ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ପ୍ରସ୍ତୁତି ଶେଷ ହୋଇଛି। ଗଣତି କେନ୍ଦ୍ର ଭିତରେ ସୁରକ୍ଷା ଓ ପ୍ରବେଶକୁ ନେଇ କଡ଼ା ନିୟମାବଳୀ ଜାରି କରାଯାଇଛି।
ଜିଲ୍ଲା ପ୍ରଶାସନର ସୂଚନା ଅନୁଯାୟୀ, ଗଣତି କେନ୍ଦ୍ର ଭିତରକୁ କେବଳ ବୈଧ ପ୍ରବେଶ ପାସ୍ ଥିବା ବ୍ୟକ୍ତିମାନଙ୍କୁ ହିଁ ଛଡ଼ାଯିବ। ଜଣେ ବ୍ୟକ୍ତିଙ୍କ ପାଇଁ କେବଳ ଗୋଟିଏ ପାସ୍ ମାନ୍ୟ ହେବ। କାଉଣ୍ଟିଂ ସେଣ୍ଟର୍ ଭିତରକୁ ମୋବାଇଲ୍ ଫୋନ୍ କିମ୍ବା କୌଣସି ପ୍ରକାରର ଆପତ୍ତିଜନକ ସାମଗ୍ରୀ ନେବା ଉପରେ ସମ୍ପୂର୍ଣ୍ଣ କଟକଣା ଲଗାଯାଇଛି।
ନିର୍ବାଚନ ଆୟୋଗଙ୍କ ନିୟମାନୁସାରେ, ପ୍ରାର୍ଥୀ ଏବଂ ତାଙ୍କର ଅନୁମୋଦିତ ପ୍ରତିନିଧିମାନେ ଏଏନ୍ କଲେଜର ଗେଟ୍ ନମ୍ବର-୧ ଦେଇ ପ୍ରବେଶ କରିବେ। ଅନ୍ୟପଟେ ଗଣତି କର୍ମଚାରୀ ଓ ଗଣମାଧ୍ୟମ ପ୍ରତିନିଧିଙ୍କ ପାଇଁ ଗେଟ୍ ନମ୍ବର-୨ ନିର୍ଦ୍ଧାରିତ କରାଯାଇଛି। ସ୍ୱତନ୍ତ୍ର ପୋଲିସ ସୁରକ୍ଷା ବଳଙ୍କ ଦ୍ୱାରା କଡ଼ା କଡ଼ି ଯାଞ୍ଚ ପରେ ହିଁ ଅଧିକାରୀ, ପ୍ରତିନିଧି ଓ କର୍ମଚାରୀଙ୍କୁ ଭିତରକୁ ଛଡ଼ାଯିବ।
ଗଣତି ସମୟରେ ଜନସାଧାରଣଙ୍କ ସୁବିଧା ଓ ସୁରକ୍ଷା ଦୃଷ୍ଟିରୁ ଏଏନ୍ କଲେଜ ଆଖପାଖ ଅଞ୍ଚଳରେ ଏକ ସ୍ୱତନ୍ତ୍ର ଟ୍ରାଫିକ୍ ରୁଟ୍ ପ୍ଲାନ୍ ଲାଗୁ କରାଯାଇଛି। ଜିଲ୍ଲା ନିର୍ବାଚନ ଅଧିକାରୀ କୁନ୍ଦନ କୁମାର ଓ ବରିଷ୍ଠ ପୋଲିସ ସୁପରିଣ୍ଟେଣ୍ଡେଣ୍ଟ କାର୍ତ୍ତିକେୟ କେ. ଶର୍ମା ସମସ୍ତ ଅଧିକାରୀ ଓ କର୍ମଚାରୀଙ୍କୁ ନିର୍ବାଚନ ଆୟୋଗଙ୍କ SOP ଅନୁସାରେ ନିଷ୍ଠାର ସହ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଛନ୍ତି।
ଜୁଲାଇ ୩୦ରେ ହୋଇଥିବା ଏହି ଉପନିର୍ବାଚନର ଫଳାଫଳ ଆସିବା ପରେ ବାଙ୍କୀପୁର ଆସନରେ ଜନତା କାହାକୁ ନିଜର ପ୍ରତିନିଧି ଭାବେ ବାଛିଛନ୍ତି, ତାହା ସ୍ପଷ୍ଟ ହୋଇଯିବ। ତେବେ ଏହି ଉପନିର୍ବାଚନ ମାଧ୍ୟମରେ ଜନ ସୂରାଜ ପାର୍ଟିର ପ୍ରତିଷ୍ଠାତା ପ୍ରଶାନ୍ତ କିଶୋର ଡେବ୍ୟୁ କରିଛନ୍ତି । ଏହି ଆସନରେ ମୋଟ ୨୬ ଜଣ ପ୍ରାର୍ଥୀ ନାମାଙ୍କନ ଭରିଥିଲେ । ବିଜେପିର ନୀରଜ କୁମାର ସିହ୍ନା ଏବଂ ଆରଜେଡିର ରେଖା ଗୁପ୍ତାଙ୍କ ଭାଗ୍ୟ ମଧ୍ୟ ଇଭିଏମରେ ସିଲ୍ ହୋଇଛି । ତେବେ କାଲି ଫଳ ଆସିବା ପରେ, କେଉଁ ଦଳର ପ୍ରାର୍ଥୀ ବିଜୟୀ ହେବେ ସ୍ପଷ୍ଟ ହୋଇଯିବ ।
