Benjamin Netanyahu: ଅକ୍ଟୋବର ୨୭ରେ ହେବ ଇସ୍ରାଏଲ ପ୍ରଧାନମନ୍ତ୍ରୀ ନେତାନ୍ୟାହୁଙ୍କ ଭାଗ୍ୟ ନିର୍ଦ୍ଧାରଣ !

ନୂଆଦିଲ୍ଲୀ: ଇସ୍ରାଏଲରେ ଆସନ୍ତା ଅକ୍ଟୋବର ୨୭ ତାରିଖରେ ସାଧାରଣ ନିର୍ବାଚନ ଅନୁଷ୍ଠିତ ହେବ। ଦେଶର ଆଇନ ଅନୁଯାୟୀ ଏହା ହେଉଛି ନିର୍ବାଚନ ପାଇଁ ନିର୍ଦ୍ଧାରିତ ସମୟ ସୀମା। ରବିବାର ଦିନ ଇସ୍ରାଏଲ୍ ସଂସଦ ପକ୍ଷରୁ ଏହି ଆନୁଷ୍ଠାନିକ ଘୋଷଣା କରାଯାଇଛି। ଗାଜା ଯୁଦ୍ଧ ଆରମ୍ଭ ହେବା ପରଠାରୁ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ନେତୃତ୍ବ ଏବଂ ତାଙ୍କ ସରକାରୀ ନୀତି ଉପରେ ଏହି ନିର୍ବାଚନ ଏକ ବଡ଼ ‘ଜନମତ ସର୍ଭେ’ସଦୃଶ ହେବ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।

ଇସ୍ରାଏଲ୍ ସଂସଦ ପକ୍ଷରୁ ଜାରି କରାଯାଇଥିବା ଏକ ବିବୃତ୍ତିରେ ସ୍ପଷ୍ଟ କରାଯାଇଛି ଯେ, ବର୍ତ୍ତମାନର ସଂସଦ ନିଜର ସମ୍ପୂର୍ଣ୍ଣ କାର୍ଯ୍ୟକାଳ ପୂରଣ କରିବାକୁ ଯାଉଛି। ବ୍ୟବସ୍ଥା ଅନୁଯାୟୀ, ପରବର୍ତ୍ତୀ ସାଧାରଣ ନିର୍ବାଚନ ପାଇଁ ଆଇନଗତ ଭାବେ ଅକ୍ଟୋବର ୨୭ ତାରିଖ ପୂର୍ବରୁ ହିଁ ନିର୍ଦ୍ଧାରିତ ହୋଇସାରିଛି। ସଂସଦର କାର୍ଯ୍ୟକାଳକୁ ହ୍ରାସ କରିବା ପାଇଁ କୌଣସି ପ୍ରସ୍ତାବ ନଥିବାରୁ, ସାଧାରଣ ପରିସ୍ଥିତି ଭଳି ଏଠାରେ କୌଣସି ‘ସଂସଦ ଭଙ୍ଗ ଆଇନ’  ପ୍ରଣୟନ କରିବାର ଆବଶ୍ୟକତା ନାହିଁ।

ନେତାନ୍ୟାହୁଙ୍କ ପାଇଁ ଅଗ୍ନିପରୀକ୍ଷା

ଗାଜା ଷ୍ଟ୍ରିପରେ ଚାଲିଥିବା ସାମରିକ ଅଭିଯାନ ଏବଂ ସୁରକ୍ଷା ବ୍ୟବସ୍ଥାକୁ ନେଇ ଇସ୍ରାଏଲ୍ ଜନସାଧାରଣଙ୍କ ମଧ୍ୟରେ ମିଶ୍ରିତ ପ୍ରତିକ୍ରିୟା ରହିଛି। ଏହି ନିର୍ବାଚନ ସ୍ପଷ୍ଟ କରିବ ଯେ, ଦେଶର ନାଗରିକମାନେ ଯୁଦ୍ଧ ସମୟରେ ନେତାନ୍ୟାହୁଙ୍କ ରଣନୀତିକୁ ସମର୍ଥନ କରୁଛନ୍ତି କି ନାହିଁ। ଦୀର୍ଘ ସମୟ ଧରି ଇସ୍ରାଏଲ୍ ଶାସନ ଗାଦିରେ ଥିବା ନେତାନ୍ୟାହୁଙ୍କ ପାଇଁ ଏହି ନିର୍ବାଚନ ତାଙ୍କ ରାଜନୈତିକ ଭାଗ୍ୟ ନିର୍ଦ୍ଧାରଣ କରିବ। ବିରୋଧୀ ଦଳଗୁଡ଼ିକ ଯୁଦ୍ଧ ପରବର୍ତ୍ତୀ ସ୍ଥିତି ଏବଂ ଆଭ୍ୟନ୍ତରୀଣ ସୁରକ୍ଷା ବିଫଳତାକୁ ମୁଦ୍ଦା କରି ନେତାନ୍ୟାହୁଙ୍କୁ ଘେରିବାକୁ ପ୍ରସ୍ତୁତ ହେଉଛନ୍ତି।