Nagaon Lok Sabha by-election: নগাঁও লোকসভা উপ-নিৰ্বাচনত বিজেপিৰ জয়ক লৈ আত্মবিশ্বাসী মুখ্যমন্ত্ৰী

Nagaon Lok Sabha by-election: নগাঁওত বিজেপিৰ জয়ক লৈ আত্মবিশ্বাসী হিমন্ত, দেৱাশীষ শৰ্মাৰ বাবে কৰিলে ডাঙৰ দাবী।

মুখ্যমন্ত্ৰী ড০ হিমন্ত বিশ্ব শৰ্মাই মঙলবাৰে দাবী কৰে যে ৬ অক্টোবৰত অনুষ্ঠিত হ’বলগীয়া নগাঁও লোকসভা উপ-নিৰ্বাচনত বিজেপিয়ে ২.৫ লাখৰ পৰা ৩ লাখ ভোটৰ ব্যৱধানত জয়লাভ কৰিব (Nagaon Lok Sabha by-election)।

আজি নিৰ্বাচনী প্ৰচাৰৰ দ্বিতীয় দিনা ড০ শৰ্মাই চামগুৰি, মৰিগাঁও আৰু ধিঙত তিনিখন বৃহৎ নিৰ্বাচনী সভাত অংশগ্ৰহণ কৰে। অহা কেইটামান দিনত নগাঁও লোকসভা সমষ্টিৰ অন্তৰ্গত বিধানসভা সমষ্টিসমূহত তেওঁ মুঠ ১৬খন নিৰ্বাচনী সভাত অংশ লোৱাৰ কথা আছে তেওঁ (Nagaon bypoll 2026)।

মৰিগাঁও বিধানসভা সমষ্টিত দ্বিতীয়খন নিৰ্বাচনী সভাত ভাষণ দিয়াৰ পাছত সাংবাদিকৰ সৈতে বাৰ্তালাপ কৰি মুখ্যমন্ত্ৰী ড০ শৰ্মাই কয় যে ৰাইজে এনডিএৰ প্ৰাৰ্থী দেৱাশীষ শৰ্মাৰ পক্ষত ভোটদান কৰিব আৰু তেওঁ প্ৰায় ৩ লাখ ভোটৰ ব্যৱধানত জয়ী হ’ব (Himanta Biswa Election Campaign)।

মুখ্যমন্ত্ৰী ড০ শৰ্মাই কয়, “ৰাইজ বিজেপিৰ সৈতে আছে। মই আশা কৰোঁ দেৱাশীষ শৰ্মাই ২.৫ লাখৰ পৰা ৩ লাখ ভোটৰ ব্যৱধানত জয়লাভ কৰিব। এই বিষয়ে মই যথেষ্ট আত্মবিশ্বাসী।”

কংগ্ৰেছ প্ৰাৰ্থী শিৱামণি বৰা সন্দৰ্ভত মুখ্যমন্ত্ৰী ড০ শৰ্মাই কয় যে পূৰ্বৰ বিধানসভাত বটদ্ৰৱা সমষ্টিৰ বিধায়ক হিচাপে পাঁচ বছৰ কাৰ্যনিৰ্বাহ কৰাৰ সময়ছোৱাত তেওঁ বিধানসভাত কোনো বিষয় উত্থাপন কৰা দেখা নাছিল।

ড০ শৰ্মাই কয়, “শিৱামণি বৰাক কোনোবাই ভোট দিবনে? তেওঁ যেতিয়া বিধায়ক আছিল, তেতিয়া তেওঁৰ সমষ্টিৰ ৰাইজৰ সৈতে জড়িত কোনো বিষয় অসম বিধানসভাত উত্থাপন কৰা মই কেতিয়াও দেখা নাছিলোঁ। তেওঁ জ্যোতিপ্ৰসাদ আগৰৱালাৰ ‘নিমাতী কইনা’ৰ চৰিত্ৰৰ দৰে।”

ইফালে, চামগুৰি বিধানসভা সমষ্টিত কালি আৰু আজি দুয়োটা দিনতে দুখনকৈ বৃহৎ নিৰ্বাচনী সভাত অংশ লোৱা মুখ্যমন্ত্ৰী ড০ শৰ্মাই কংগ্ৰেছ সাংসদ ৰকিবুল হুছেইনক আক্ৰমণ অব্যাহত ৰাখি তেওঁক “বকাসুৰ” বুলি অভিহিত কৰে।

কংগ্ৰেছ দলে ৰাইজৰ উন্নয়নৰ বাবে কাম নকৰাৰ অভিযোগ উত্থাপন কৰি মুখ্যমন্ত্ৰীগৰাকীয়ে দলটোক সমালোচনা কৰে।

লগতে পঢ়ক: Nagaon Lok Sabha by-election: ‘নিমাতি কইনা’ শিৱামণি বৰাঃ মুখ্যমন্ত্ৰীৰ তীব্ৰ কটাক্ষ