ନୂଆଦିଲ୍ଲୀ: ଭାରତ ସରକାର ଟେଲିଭିଜନ ଚ୍ୟାନେଲଙ୍କ ନିମନ୍ତେ ଆଡଭର୍ଟାଇଜମେଣ୍ଟ ଅବଧି ଉପରେ ଲଗାଇଥିବା ୧୨ ମିନିଟ୍ ସମୟ ସୀମାକୁ ପ୍ରତ୍ୟାହାର କରିବା ଲାଗି ନିଷ୍ପତ୍ତି ନେଇଛନ୍ତି। ସରକାର ଶୁକ୍ରବାର ଏ ସମ୍ପର୍କିତ ଆଦେଶ ମଧ୍ୟ ଜାରି କରିଛନ୍ତି। ସରକାର ଟେଲିଭିଜନ ନିମନ୍ତେ ଆଡଭର୍ଟାଇଜମେଣ୍ଟ ସମୟସୀମା ୨୦୦୬ ମସିହାରେ କେବୁଲ ଟେଲିଭିଜନ ନେଟୱାର୍କ ନିୟମ ୧୯୯୪ ଅନୁସାରେ ଲାଗୁ କରିଥିଲେ। ସେବେଠାରୁ ଏ ପର୍ଯ୍ୟନ୍ତ ଟିଭି ବ୍ରଡକାଷ୍ଟିଂ ସେକ୍ଟରରେ ଅନେକ ପରିବର୍ତ୍ତନ ହୋଇ ସାରିଲାଣି।
୨୦୦୬ ମସିହାରେ ଦେଶରେ ମାତ୍ର ୬୨ଟି ଟେଲିଭିଜନ ଚ୍ୟାନେଲ ଥିଲେ। ଏବେ ଦେଶରେ ମୋଟ ୯୦୦ଟି ଟେଲିଭିଜନ ଚ୍ୟାନେଲ କାର୍ଯ୍ୟ କରୁଛନ୍ତି। ସେତେବେଳେ ଟେଲିଭିଜନ ଚ୍ୟାନେଲ ଦେଖିବାର ମୁଖ୍ୟ ମାଧ୍ୟମ କେବୁଲ ଟେଲିଭିଜନ ଥିଲା। ଏହା ଏକ ଆନାଲଗ ମାଧ୍ୟମ। ଏହାର କ୍ଷମତା ସୀମିତ ଥିଲା। ଏଥିରେ କଷ୍ଟମରଙ୍କ ନିକଟରେ ଖୁବ କ୍ୱଚିତ ବିକଳ୍ପ ରହୁଥିଲା। ଏବେ କେବୁଲ ଟିଭି ସେକ୍ଟର ସମ୍ପୂର୍ଣ୍ଣ ଡିଜିଟାଲ ହୋଇ ସାରିଲାଣି।
ଏବେ ଡିଟିଏଚ, କେବୁଲ ଟିଭି, ଆଇପିଟିଭି ଓ ଏଚଆଇଟିଏସ ଭଳି ଟେଲିଭିଜନ ଡିଷ୍ଟ୍ରିବ୍ୟୁସନ ପ୍ଲାଟଫର୍ମ ଡିଜିଟାଲ ହୋଇଯାଇଛି। ଏହି ସବୁ ପ୍ଲାଟଫର୍ମ ଏବେ ୩୦୦ରୁ ୫୦୦ ବା ଏହାଠୁ ଅଧିକ ଚ୍ୟାନେଲ ଦେଖାଉଛନ୍ତି। ଏଥିରୁ ଗ୍ରାହକଙ୍କ ଅଲଗା ଅଲଗା ଆବଶ୍ୟକତା ପୂରଣ ହେଉଛି। ଏହା ଛଡା ଦର୍ଶକଙ୍କୁ ଅଧିକ ବିକଳ୍ପ ମଧ୍ୟ ମିଳୁଛି। ମାର୍କେଟରେ କମ୍ପିଟେସନ ଏବେ ଢେର ବଢି ଯାଇଛି। ଟିଭି ବ୍ରଡକାଷ୍ଟିଂ ସେକ୍ଟରରେ ଆସିଥିବା ପରିବର୍ତ୍ତନ କାରଣରୁ ଆଡଭର୍ଟାଇଜମେଣ୍ଟ ଟାଇମଲାଇନ ସମ୍ପର୍କିତ ନିୟମ କୁ ପୁଣି ବିଚାର କରିବାକୁ ଜରୁରି ଅନୁଭବ କରାଗଲା।
