ଗ୍ଲାସଗୋ: ଗ୍ଲାସଗୋରେ ଚାଲିଥିବା କମନୱେଲଥ ଗେମ୍ସରେ ଭାରତୀୟ ବକ୍ସରମାନେ ଦମଦାର ପ୍ରଦର୍ଶନ କରିଛନ୍ତି। ‘ବକ୍ସିଂ ରିଂ’ରେ ଭାରତ ଏପର୍ଯ୍ୟନ୍ତର ସବୁଠାରୁ ଶ୍ରେଷ୍ଠ ପ୍ରଦର୍ଶନ କରିଛି। ଅନେକ ସ୍ୱର୍ଣ୍ଣ ପଦକ ନିଜ ନାଁରେ କରିଛି। ରିଂ ଭିତରେ ପଦକର ବର୍ଷା ହେଉଥିବା ବେଳେ, ରିଂ ବାହାରେ ଏକ ଅପ୍ରୀତିକର ଘଟଣା ଦେଖିବାକୁ ମିଳିଛି।
ଟୋକିଓ ଅଲିମ୍ପିକ୍ସରେ ବ୍ରୋଞ୍ଜ ପଦକ ଜିତିଥିବା ଷ୍ଟାର ବକ୍ସର ଲଭଲିନା ବୋରଗୋହେନ୍ ମହିଳା ୭୫ କେଜି ବର୍ଗରେ ନିଜର ପ୍ରଥମ କମନୱେଲଥ ଗେମ୍ସ ସିଲଭର ପଦକ ହାସଲ କରିଛନ୍ତି। ଫାଇନାଲରେ ସ୍ୱର୍ଣ୍ଣ ହାତଛଡ଼ା ହୋଇଥିବାରୁ ସେ ଅଳ୍ପ ଦୁଃଖ ପ୍ରକାଶ କରିଥିଲେ ବି ସମ୍ପୂର୍ଣ୍ଣ ଭାରତୀୟ ଦଳର ପ୍ରଦର୍ଶନକୁ ଉଚ୍ଚ ପ୍ରଶଂସା କରିଛନ୍ତି। ନିଜର ଏହି ସଫଳତାକୁ ଅସମର ବନ୍ୟା ପୀଡ଼ିତଙ୍କ ଉଦ୍ଦେଶ୍ୟରେ ସମର୍ପିତ କରିବା ସହ ଆଗାମୀ ଏସିଆନ୍ ଗେମ୍ସରେ ସ୍ୱର୍ଣ୍ଣ ଜିତିବାକୁ ସେ ସଂକଳ୍ପ ନେଇଛନ୍ତି।
ଖେଳ ସରିବା ପରେ ଭାରତୀୟ ଖେଳାଳିମାନେ ବିଜୟ ଉତ୍ସବ ପାଳନ କରିବା ପାଇଁ ଗ୍ଲାସଗୋର ପ୍ରସିଦ୍ଧ ଭାରତୀୟ ରେଷ୍ଟୋରାଣ୍ଟ ‘ମିଷ୍ଟର ସିଂହ ଇଣ୍ଡିଆ’ (Mr Singh’s India)କୁ ରାତ୍ରିଭୋଜନ ପାଇଁ ଯାଇଥିଲେ। ମାତ୍ର ସେଠାରେ ଟେବୁଲ ଉପରେ ରଖାଯାଇଥିବା ନାପକିନ୍କୁ ଦେଖି ମାହୋଲ ବିଗିଡିଯାଇଥିଲା।
ଷ୍ଟାର ବକ୍ସର ଲଭଲିନା ଲକ୍ଷ୍ୟ କରିଥିଲେ ଯେ, ରେଷ୍ଟୋରାଣ୍ଟ ନାପକିନ ଛପାଯାଇଥିବା ଭାରତ ନକ୍ସାରୁ ସମ୍ପୂର୍ଣ୍ଣ ‘ଉତ୍ତର-ପୂର୍ବ’ ଅଞ୍ଚଳ ଗାଏବ ଥିଲା। ଏହି ଗୁରୁତର ଅବହେଳାକୁ ନେଇ ସେ ଅସନ୍ତୋଷ ପ୍ରକାଶ କରିଛନ୍ତି। ଲଭଲିନା କହିଛନ୍ତି- ନାପକିନ୍ରେ ଥିବା ନକ୍ସାରୁ ଆମ ଉତ୍ତର-ପୂର୍ବ ଭାରତ ଗାୟବ ଅଛି। ଭାରତର ପ୍ରତ୍ୟେକଟି ଅଂଶ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ସବୁ ସ୍ଥାନରେ ଦେଶର ସଠିକ୍ ଓ ସମ୍ପୂର୍ଣ୍ଣ ନକ୍ସା ହିଁ ପ୍ରଦର୍ଶିତ ହେବା ଉଚିତ୍।
ଲଭଲିନାଙ୍କ ଏହି କଡ଼ା ପଦକ୍ଷେପକୁ ଭାରତୀୟ ବକ୍ସିଂ ମହାସଂଘ (BFI)ର ସଭାପତି ଅଜୟ ସିଂହ ସମ୍ପୂର୍ଣ୍ଣ ସମର୍ଥନ କରିଛନ୍ତି। ସେ ଦର୍ଶାଇଛନ୍ତି ଯେ, କେବଳ ଉତ୍ତର-ପୂର୍ବ ନୁହେଁ, ବରଂ ନକ୍ସାରେ ଜାମ୍ମୁ-କାଶ୍ମୀରକୁ ମଧ୍ୟ ସଠିକ୍ ଭାବେ ଦର୍ଶାଯାଇ ନଥିଲା। ସେ ତୁରନ୍ତ ସେହି ସମସ୍ତ ନାପକିନ୍ ହଟାଇବା ସହ ସଠିକ୍ ଭାରତୀୟ ନକ୍ସା ବ୍ୟବହାର କରିବାକୁ ରେଷ୍ଟ୍ରୁରାଣ୍ଟ ପ୍ରବନ୍ଧକଙ୍କୁ ଦାବି କରିଛନ୍ତି।
