চলিত মাহৰ ২২ তাৰিখৰ পৰা আৰম্ভ হ’ব মহা অম্বুবাচী মেলা। অম্বুবাচী মেলাক লৈ মহানগৰ আৰক্ষীয়ে যান-বাহন চলাচলক লৈ বিশেষ নিৰ্দেশনা জাৰী কৰিছে।
পবিত্ৰ মা কামাখ্যা মন্দিৰত অনুষ্ঠিত হ’বলগীয়া মহা অম্বুবাচী মেলাৰ বাবে অসম চৰকাৰে ব্যাপক প্ৰস্তুতি চলাইছে। কৰ্তৃপক্ষই আশা প্ৰকাশ কৰিছে যে এইবাৰ অম্বুবাচীত প্ৰায় ৮, লাখ ভক্ত আৰু দৰ্শনাৰ্থীয়ে অংশগ্ৰহণ কৰিব। অম্বুবাচী উপলক্ষ্যে গুৱাহাটীৰ যান-বাহন শাখাৰ আৰক্ষী উপ-আযুক্ত (DCP) জয়ন্ত সাৰথি বৰাই অম্বুবাচীৰ বাবে যান-বাহন চলাচলক লৈ গুৰুত্বপূৰ্ণ ঘোষণা কৰিছে। তেওঁ জানিবলৈ দিয়ে যে জৰুৰীকালীন সেৱাৰ বাহিৰে আন কোনো বাহন ওপৰলৈ যাবলৈ দিয়া নহ’ব। খাদ্য সামগ্ৰী কঢ়িওৱা বাহনসমূহক কেৱল নিশা ১১:০০ বজাৰ পৰা পুৱা ৫:০০ বজাৰ ভিতৰতহে চলাচলৰ অনুমতি দিয়া হ’ব। জালুকবাৰীৰ দিশৰ পৰা অহা বাহন সমূহ মালিগাঁৱতে ৰখাব লাগিব। ভক্তসকলৰ যাতায়তৰ সুবিধাৰ্থে পাণ্ডু ঘাটৰ জৰিয়তে আৰু সোণাৰাম স্কুল খেলপথাৰৰ পৰা ফেৰীকাৰ সমূহ সোণাৰাম খেলপথাৰৰ পৰা উপলব্ধ হ’ব। কামাখ্যা ৰেলৱে ষ্টেচনৰ পৰা পাণ্ডু পৰ্টৰ দিশে যোৱা বাহনসমূহক আদাবাৰী হৈ ডাইভাৰ্ট (পথ সলনি) কৰা হ’ব, আনহাতে জালুকবাৰীৰ পৰা অহা বাহনসমূহক স্বাগতম হাস্পতালৰ পথটোৰে আগবাঢ়ি যাবলৈ দিয়া নহ’ব।
ৰাজহুৱা বাছসমূহক ফ্লাইঅভাৰখন ব্যৱহাৰ কৰাৰ অনুমতি দিয়া হ’ব, কিন্তু ফ্লাইঅভাৰৰ তলৰ চাৰ্ভিচ ৰোডত বাছ চলাচল কৰিব নোৱাৰিব। কৰ্তৃপক্ষই কেইবাটাও পাৰ্কিং স্থান নিৰ্ধাৰণ কৰিছে আৰু সতৰ্ক কৰি দিছে যে পথৰ কাষত পাৰ্কিং কৰাটো সম্পূৰ্ণৰূপে নিষিদ্ধ হ’ব। পৰ্যটন বিভাগৰ আয়ুক্ত তথা সচিব দিগন্ত বৰাই কয় যে ভক্তসকলক পুৱা ৫:০০ বজাৰ পৰা সন্ধিয়া ৬:০০ বজাৰ ভিতৰতহে কামাখ্যা মন্দিৰৰ দিশে যাবলৈ দিয়া হ’ব। ইয়াৰ উপৰিও তেওঁ সকীয়াই দিয়ে যে মদ্যপান বা নিচাযুক্ত সামগ্ৰী সেৱন কৰা অৱস্থাত বা মাদৱ দ্ৰব্য সেৱন কৰি মন্দিৰলৈ যোৱা যিকোনো লোকৰ বিৰুদ্ধে কঠোৰ ব্যৱস্থা গ্ৰহণ কৰা হ’ব। প্ৰশাসনৰ তৰফৰ পৰা নিৰ্দেশ দিয়া হৈছে যে ধৰ্মীয় স্থলীখনৰ পবিত্ৰতা ৰক্ষা কৰি কোনো ভক্তকে জোতা বা চেণ্ডেল পিন্ধি মন্দিৰ প্ৰাংগণৰ দিশে আগবাঢ়ি যাবলৈ দিয়া নহ’ব। নাৰ্চাৰী পইণ্টত থাকিব জোতা-চেণ্ডল ৰখাৰ ব্যৱস্থা। অম্বুবাচী লৈ অহা ভক্তসকলৰ বাবে কামাখ্যা ষ্টেচনৰ পৰা বিনামূলীয়া বাছৰ ব্যৱস্থা কৰা হৈছে।ৰাজপথৰ দুয়োপাৰে যান-বাহন ৰখাব নোৱাৰিব। সমগ্ৰ বিশ্বৰ পৰা লাখ লাখ তীৰ্থযাত্ৰী অহাৰ সম্ভাৱনা থকাৰ পৰিপ্ৰেক্ষিতত, এই ব্যাপক ব্যৱস্থাসমূহে এক সুৰক্ষিত, শৃংখলাবদ্ধ আৰু আধ্যাত্মিকভাৱে ফলপ্ৰসূ অম্বুবাচী মেলা ২০২৬ নিশ্চিত কৰিব বুলি কৰ্তৃপক্ষই আত্মবিশ্বাস প্ৰকাশ কৰিছে।
আনহাতে, অম্বুবাচী মেলাক লৈ সংবাদ মাধ্যমক সম্বোধন কৰি অসমৰ পৰ্যটন মন্ত্ৰী অজন্তা নেওগে কয় যে মেলাৰ সময়ত ভক্ত আৰু দৰ্শনাৰ্থীসকলৰ থকা-মেলাৰ বাবে তিনিটাকৈ ডাঙৰ শিবিৰ স্থাপন কৰা হৈছে। যোগাযোগ ব্যৱস্থা উন্নত কৰাৰ বাবে পথ পকীকৰণ আৰু মেৰামতিৰ কাম হাতত লোৱা হৈছে বুলি উল্লেখ কৰি তেওঁ কয় যে ভিৰ নিয়ন্ত্ৰণ আৰু তথ্য প্ৰচাৰৰ সুবিধাৰ বাবে এটা ৰাজহুৱা ঘোষণা প্ৰণালীৰ ব্যৱস্থাও কৰা হৈছে।
মন্ত্ৰীগৰাকীয়ে কয় যে মন্দিৰ প্ৰাংগণ আৰু ইয়াৰ আশে-পাশে থকা এলেকাসমূহত পৰিষ্কাৰ-পৰিচ্ছন্নতা আৰু অনাময় ব্যৱস্থাক সৰ্বোচ্চ অগ্ৰাধিকাৰ দিয়া হৈছে। জ্যেষ্ঠ নাগৰিক আৰু বিশেষভাৱে সক্ষম সকলৰ বাবেও এক সুচল তীৰ্থযাত্ৰাৰ অভিজ্ঞতা নিশ্চিত কৰিবলৈ বিশেষ ব্যৱস্থা কৰা হৈছে। জনস্বাস্থ্য সুৰক্ষিত কৰাৰ বাবে, অম্বুবাচীৰ সময়ছোৱাত খাদ্যৰ গুণগত মান আৰু সুৰক্ষাৰ মানদণ্ড তীক্ষ্ণভাৱে নিৰীক্ষণ কৰিবলৈ খাদ্য পৰিদৰ্শকসকলক নিয়োগ কৰা হৈছে। অসমৰ ক্ৰমবৰ্ধমান পৰ্যটন খণ্ডৰ ওপৰত আলোকপাত কৰি অজন্তা নেওগে কয় যে ৰাজ্যখনে এতিয়ালৈকে প্ৰায় ৮৫ লাখ ঘৰুৱা পৰ্যটক আৰু প্ৰায় ৪২,০০০ বিদেশী পৰ্যটকক আদৰণি জনাইছে।
লগতে পঢ়ক: স্কুল বেগৰ ওজনক লৈ মহানগৰীৰ বিদ্যালয়লৈ শিক্ষা বিভাগৰ নিৰ্দেশনা
