অসম বিজেপিৰ সভাপতি দিলীপ শইকীয়াই ২৫ জুনত ১৯৭৫ চনত জৰুৰীকালীন অৱস্থাক লৈ কংগ্ৰেছক চোকা আক্ৰমণ চলাই কেৱল ৰাজনৈতিক ক্ষমতা অক্ষুণ্ণ ৰাখিবলৈহে কংগ্ৰেছ জাপি দিয়া বুলি অভিযোগ উত্থাপন কৰে।
জৰুৰীকালীন অৱস্থাৰ ৫১ সংখ্যক বাৰ্ষিকী উপলক্ষে ভাৰতীয় জনতা পাৰ্টীয়ে সমগ্ৰ দেশতে ২৫ জুন দিনটো “ক’লা দিৱস” হিচাপে পালন কৰে। অসমতো ভাৰতীয় জনতা পাৰ্টীয়ে এই ক’লা দিৱস পালন কৰে। এই অনুষ্ঠানত মুখ্যমন্ত্ৰী ড° হিমন্ত বিশ্ব শৰ্মা, অসম বিজেপিৰ সভাপতি দিলীপ শইকীয়া, অসম বিধানসভাৰ অধ্যক্ষ ৰঞ্জিত কুমাৰ দাস, মন্ত্ৰী নীলমণি সেন ডেকা আৰু কৌশিক ৰায়কে ধৰি দলটোৰ কেইবাগৰাকীও জ্যেষ্ঠ নেতা আৰু জনপ্ৰতিনিধি উপস্থিত থাকে।
এই অনুষ্ঠানত অসম বিজেপিৰ সভাপতি দিলীপ শইকীয়াই ১৯৭৫ চনত জৰুৰীকালীন অৱস্থা জাৰি কৰাক লৈ কংগ্ৰেছক তীব্ৰ আক্ৰমণ কৰে। তেওঁ ইয়াক ভাৰতৰ গণতান্ত্ৰিক ইতিহাসৰ অন্যতম ক’লা অধ্যায় বুলি অভিহিত কৰাৰ লগতে কেৱল ৰাজনৈতিক ক্ষমতা ধৰি ৰাখিবলৈকে এই জৰুৰীকালীন অৱস্থা জাপি দিয়া হৈছিল বুলি গুৰুতৰ অভিযোগ উত্থাপন কৰে।
বিজেপিৰ ৰাজ্যিক মুখ্য কাৰ্যালয় অটল বিহাৰী বাজপেয়ী ভৱনৰ পৰা জাৰি কৰা এক বিবৃতিত শইকীয়াই কয় যে ১৯৭৫ চনত ২৫ জুনত জৰুৰীকালীন অৱস্থা ঘোষণা কৰা কাৰ্যই কংগ্ৰেছ নেতৃত্বই ক্ষমতাত টিকি থাকিবলৈ কি পৰ্যায়লৈ যাব পাৰে তাকেই প্ৰতিফলিত কৰিছিল। সভাপতি গৰাকীয়ে কয়, “জৰুৰীকালীন অৱস্থাৰ ঘোষণা যিকোনো মূল্যৰ বিনিময়ত ক্ষমতাত খামুচি ধৰি ৰাখিবলৈ কংগ্ৰেছ দলৰ দৃঢ়তাৰ এক অন্যতম নিকৃষ্ট উদাহৰণ।” সেই সময়ছোৱাত গণতান্ত্ৰিক প্ৰতিষ্ঠান আৰু সাংবিধানিক নীতি-নিয়মসমূহক ভৰিৰে মোহাৰি পেলোৱা হৈছিল বুলিও তেওঁ অভিযোগ কৰে।
তেওঁ উল্লেখ কৰে যে তৎকালীন প্ৰধানমন্ত্ৰী ইন্দিৰা গান্ধীৰ পৰামৰ্শ মতে এই জৰুৰীকালীন অৱস্থা জাপি দিয়া হৈছিল আৰু সেই সময়ৰ ৰাষ্ট্ৰপতি ফকৰুদ্দিন আলী আহমেদে ইয়াক আনুষ্ঠানিকভাৱে ঘোষণা কৰিছিল। দিলীপ শইকীয়াৰ মতে, এই ২১ মহীয়া জৰুৰীকালীন সময়ছোৱাত নাগৰিক স্বাধীনতাৰ ওপৰত কঠোৰ নিষেধাজ্ঞা, বিৰোধী ৰাজনৈতিক পক্ষক দমন আৰু সংবাদ মাধ্যমৰ স্বাধীনতা খৰ্ব কৰা হৈছিল।
বিজেপি নেতাজনে অভিযোগ কৰে যে জৰুৰীকালীন অৱস্থাৰ সময়ছোৱাত এক লাখতকৈও অধিক বিৰোধী নেতা আৰু ৰাজনৈতিক কৰ্মীক গ্ৰেপ্তাৰ কৰি কাৰাগাৰত ভৰোৱা হৈছিল, আনহাতে গণতান্ত্ৰিক প্ৰতিবাদ আৰু ভিন্নমত পোষণ কৰা কণ্ঠসমূহক প্ৰণালীবদ্ধভাৱে দমন কৰা হৈছিল। ৰাষ্ট্ৰীয় স্বয়ংসেৱক সংঘ (RSS)ৰ দৰে সংগঠনসমূহক নিষিদ্ধ কৰা হৈছিল আৰু তদানীন্তন ভাৰতীয় জনসংঘৰ কেইবাজনো শীৰ্ষ নেতা যেনে অটল বিহাৰী বাজপেয়ী আৰু লাল কৃষ্ণ আদৱানীক জেলত ভৰোৱা হৈছিল।
জৰুৰীকালীন অৱস্থাৰ পূৰ্বৰ ৰাজনৈতিক পৰিস্থিতিৰ কথা উল্লেখ কৰি দিলীপ শইকীয়াই এলাহাবাদ উচ্চ ন্যায়ালয়ৰ সেই ৰায়দানৰ কথা সোঁৱৰাই দিয়ে যাৰ জৰিয়তে ইন্দিৰা গান্ধীৰ নিৰ্বাচন অবৈধ ঘোষণা কৰা হৈছিল। তেওঁ অভিযোগ কৰে যে গণতান্ত্ৰিক পৰম্পৰা অনুসৰি পদত্যাগ কৰাৰ পৰিৱৰ্তে ইন্দিৰা গান্ধীয়ে ক্ষমতাত টিকি থাকিবলৈ জৰুৰীকালীন অৱস্থা জাৰি কৰাৰ পথ বাছি লৈছিল।
তেওঁ দৃঢ়তাৰে কয় যে যেতিয়া সাংবিধানিক মূল্যবোধ আৰু গণতান্ত্ৰিক নীতিৰ ওপৰত ৰাজনৈতিক স্বাৰ্থক অগ্ৰাধিকাৰ দিয়া হয়, তেতিয়া কি ভয়ংকৰ বিপদৰ সৃষ্টি হ’ব পাৰে তাৰে এক সোঁৱৰণি হিচাপে কাম কৰে এই জৰুৰীকালীন অৱস্থাই।
লগতে পঢ়ক: ১৯৭৫-ৰ জৰুৰীকালীন অৱস্থা গণতন্ত্ৰৰ ‘ক’লা অধ্যায়’ : মুখ্যমন্ত্ৰী ড০ হিমন্ত বিশ্ব শৰ্মা
