অসমত হাজাৰ হাজাৰ বিদেশী চিনাক্ত, কিন্তু বহিষ্কাৰ হ’ল কেইজনমানহে! বিধানসভাত চৰকাৰৰ তথ্য ।
অসমত দীৰ্ঘদিন ধৰি চলি থকা বিদেশী সমস্যা আৰু অনুপ্ৰৱেশকাৰীৰ বহিষ্কাৰ প্ৰক্ৰিয়াক লৈ এক ডাঙৰ তথ্য পোহৰলৈ আহিছে । ২০২১ চনৰ পৰা বৰ্তমানলৈকে ৰাজ্যৰ বিদেশী ন্যায়াধিকৰণসমূহ (Foreigners Tribunals)-এ ৩৬,০০০ তকৈও অধিক লোকক বিদেশী বুলি ঘোষণা কৰিছে । কিন্তু আশ্বৰ্যজনকভাৱে, এই বৃহৎ সংখ্যাৰ বিপৰীতে এই সময়ছোৱাত মাত্ৰ ১৯৬ জন লোককহে বাংলাদেশলৈ প্ৰত্যাৱৰ্তন কৰা হৈছে । ৮ জুলাইত অসম বিধানসভাৰ মজিয়াত চৰকাৰে এই তথ্য সদৰী কৰে ।
বিদেশী ঘোষণাৰ বছৰভিত্তিক পৰিসংখ্যা
কংগ্ৰেছ বিধায়ক মহিবুৰ ৰহমানে উত্থাপন কৰা এক লিখিত প্ৰশ্নৰ উত্তৰত ৰাজ্যৰ সীমান্ত সুৰক্ষা আৰু উন্নয়ন মন্ত্ৰী অতুল বৰাই এই তথ্য প্ৰদান কৰে । মন্ত্ৰীগৰাকীৰ তথ্য অনুসৰি, ২০২১ চনৰ পৰা ২০২৬ চনৰ মে’ মাহৰ ভিতৰত মুঠ ৩৬,৩৫৮ জন লোকক বিদেশী ন্যায়াধিকৰণসমূহে ‘বিদেশী’ বুলি চিনাক্ত কৰিছে ।
মন্ত্ৰী অতুল বৰাই দাঙি ধৰা বছৰভিত্তিক খতিয়ান অনুসৰি, ২০২১ চনত ৭,১৫১ জন, ২০২২ চনত ৯,০২৮ জন, ২০২৩ চনত ৬,৮৫৯ জন, ২০২৪ চনত ৬,১৭৮ জন, ২০২৫ চনত ৫,১০৬ জন আৰু ২০২৬ চনত এতিয়ালৈকে ২,০৩৬ জন লোকক বিদেশী বুলি ঘোষণা কৰা হৈছে । এই বৃহৎ সংখ্যক বিদেশীৰ ভিতৰত কেৱল ১৯৬ জনকহে নিজ দেশলৈ ওভতাই পঠোৱা হৈছে ।
অসম চুক্তি আৰু আইনী প্ৰক্ৰিয়া
ঐতিহাসিক অসম চুক্তি (Assam Accord) অনুসৰি, ১৯৭১ চনৰ ২৫ মাৰ্চ বা তাৰ পিছত অবৈধভাৱে অসমত প্ৰৱেশ কৰা বিদেশীসকলক চিনাক্ত কৰা, ভোটাৰ তালিকাৰ পৰা তেওঁলোকৰ নাম কৰ্তন কৰা আৰু পৰৱৰ্তী সময়ত তেওঁলোকক বহিষ্কাৰ কৰাটো বাধ্যতামূলক ।
অসমৰ বৰ্তমানৰ আইনী কাঠামো অনুসৰি, কেৱল বিদেশী ন্যায়াধিকৰণসমূহৰহে এজন ব্যক্তি বিদেশী হয় নে নহয় তাৰ সিদ্ধান্ত লোৱাৰ আইনী কৰ্তৃত্ব আছে । অৱশ্যে, ন্যায়াধিকৰণৰ ৰায়ত অসন্তুষ্ট হোৱা যিকোনো ব্যক্তিয়ে এই নিৰ্দেশক উচ্চ ন্যায়ালয় বা উচ্চতম আদালতত প্ৰত্যাহ্বান জনাব পাৰে ।
সদনত অখিল গগৈ আৰু অতুল বৰাৰ বাকযুদ্ধ
এই বিষয়টোক কেন্দ্ৰ কৰি বিধানসভাৰ মজিয়াত এক উত্তপ্ত পৰিস্থিতিৰো সৃষ্টি হয় । ৰাইজৰ দলৰ বিধায়ক অখিল গগৈয়ে বৰ্তমান অসমত অবৈধভাৱে বসবাস কৰি থকা বিদেশীৰ সঠিক সংখ্যা কিমান, সেই সন্দৰ্ভত চৰকাৰৰ পৰা স্পষ্ট উত্তৰ দাবী কৰে ।
ইয়াৰ প্ৰত্যুত্তৰত মন্ত্ৰী অতুল বৰাই কয় যে চৰকাৰৰ ওচৰত বৰ্তমান অসমত থকা অবৈধ বিদেশীৰ এনে কোনো সঠিক তথ্য সদনত দাখিল কৰিব পৰাকৈ উপলব্ধ নাই । মন্ত্ৰীগৰাকীৰ এই উত্তৰত তীব্ৰ অসন্তুষ্টি প্ৰকাশ কৰে বিধায়ক অখিল গগৈয়ে ।
লগতে পঢ়ক : ৰাজ্যৰ ৮৩ হাজাৰ হেক্টৰ ভূমি চুবুৰীয়া ৰাজ্যৰ দখলত: বিধানসভাত বিস্ফোৰক তথ্য মন্ত্ৰী অতুল বৰাৰ
