ବାରମ୍ବାର ମୁଲତବୀ, ଲୋକଙ୍କ ପ୍ରସଙ୍ଗ ଉଠିବ କେମିତି ? ଗୋଟିଏ ମିନିଟରେ ଅଢ଼େଇ ଲକ୍ଷ ଖର୍ଚ୍ଚ, ହେଲେ ଚାଲିପାରୁନି ସଂସଦ

ନୂଆଦିଲ୍ଲୀ:  ବିରୋଧୀ ନେତାଙ୍କ ହଙ୍ଗାମା ଯୋଗୁଁ ସଂସଦର ଶୂନ୍ୟକାଳ ଏବଂ ପ୍ରଶ୍ନକାଳ ବାରମ୍ବାର ବାଧାପ୍ରାପ୍ତ ହେଉଛି। ଏହାଦ୍ୱାରା ସାଂସଦମାନେ ଗୃହରେ ଗୁରୁତ୍ୱପୂର୍ଣ୍ଣ ପ୍ରଶ୍ନ ଉଠାଇପାରୁ ନାହାନ୍ତି । ବିଜେପି ସାଂସଦ ସମ୍ବିତ ପାତ୍ର ଏହି ଅଭିଯୋଗ କରିଛନ୍ତି । ସାଧାରଣତଃ ନାରାବାଜି, ହଟ୍ଟଗୋଳ ଏବଂ ହଙ୍ଗାମା ଯୋଗୁଁ ସଂସଦ ଅଧିବେଶନ ବାରମ୍ବାର ମୁଲତବୀ ରହେ। କିନ୍ତୁ ଏଥର ମୌସୁମୀ ଅଧିବେଶନ ଅଧିକ ବାଧାପ୍ରାପ୍ତ ହୋଇଛି ।

ଚଳିତ ବର୍ଷର ମୌସୁମୀ ଅଧିବେଶନ ଜୁଲାଇ ୨୦ ରୁ ଆରମ୍ଭ ହୋଇ ଅଗଷ୍ଟ ୧୩ ପର୍ଯ୍ୟନ୍ତ ଚାଲିବାର କାର୍ଯ୍ୟକ୍ରମ ରହିଛି। ଅଗଷ୍ଟ ୪ ତାରିଖ ସୁଦ୍ଧା ସଂସଦରେ ୧୨ ଦିନର ବୈଠକ ଅନୁଷ୍ଠିତ ହୋଇଛି। ତେବେ ନିଟ୍ (NEET) ପ୍ରଶ୍ନପତ୍ର ଲିକ୍ ଏବଂ ରାମ ମନ୍ଦିର ଦାନ ହେରଫେର ମାମଲାକୁ ନେଇ ପ୍ରତିବାଦ ଓ ନାରାବାଜି ଯୋଗୁଁ ଗୃହ କାର୍ଯ୍ୟ ବାରମ୍ବାର ବାଧାପ୍ରାପ୍ତ ହୋଇଛି।

ଅଧିବେଶନର ପ୍ରଥମ ସପ୍ତାହରେ ହିଁ ଲୋକସଭା ଏବଂ ରାଜ୍ୟସଭା ବହୁବାର ମୁଲତବୀ ରହିଥିଲା। ସ୍ଥିତି ଏପରି ହୋଇଥିଲା ଯେ, ଲୋକସଭା ମାତ୍ର ୧.୬ ଘଣ୍ଟା କାର୍ଯ୍ୟ କରିଥିଲା, ଯାହା ନିର୍ଦ୍ଧାରିତ ସମୟର ମାତ୍ର ୫ ପ୍ରତିଶତ। ଅନ୍ୟପଟେ, ରାଜ୍ୟସଭାରେ ମାତ୍ର ୧.୭ ଘଣ୍ଟା ଆଲୋଚନା ହୋଇପାରିଥିଲା, ଯାହା ମୋଟ ନିର୍ଦ୍ଧାରିତ ସମୟର ମାତ୍ର ୬ ପ୍ରତିଶତ।

ଜୁଲାଇ ୨୭ ରେ ଉଭୟ ରାଜ୍ୟସଭା ଏବଂ ଲୋକସଭାକୁ ଗୋଟିଏ ଦିନ ପାଇଁ ମୁଲତବୀ ରଖାଯାଇଥିଲା। ଜୁଲାଇ ୩୧ ରେ, ବିନା ଆଲୋଚନାରେ ଲୋକସଭାରେ ଜନ୍ମ ଓ ମୃତ୍ୟୁ ପଞ୍ଜୀକରଣ (ସଂଶୋଧନ) ବିଲ୍ ଆଗତ ହୋଇ ପାରିତ ହୋଇଥିଲେ ସୁଦ୍ଧା, ଉଭୟ ଗୃହକୁ ଶୀଘ୍ର ମୁଲତବୀ କରିଦିଆଯାଇଥିଲା। ପ୍ରଥମେ NEET ପ୍ରଶ୍ନପତ୍ର ଲିକ୍ ଏବଂ ପରେ ରାମ ମନ୍ଦିର ଦାନ ହେରଫେର ପ୍ରସଙ୍ଗକୁ ନେଇ କ୍ରମାଗତ ହୋହଲ୍ଲା ଯୋଗୁଁ ଏହି ଅଧିବେଶନରେ ଗୋଟିଏ ହେଲେ ଦିନ ପ୍ରଶ୍ନକାଳ କିମ୍ବା ଶୂନ୍ୟକାଳ ଚାଲିପାରି ନାହିଁ।

ଗୃହ ମୁଲତବୀ ଯୋଗୁଁ ଆର୍ଥିକ କ୍ଷତି

ଆକଳନ ଅନୁଯାୟୀ, ସଂସଦ ଚଲାଇବା ପାଇଁ ମିନିଟ୍ ପ୍ରତି ପ୍ରାୟ ୨.୫ ଲକ୍ଷ ଟଙ୍କା ଖର୍ଚ୍ଚ ହୋଇଥାଏ । ଗୋଟିଏ କାର୍ଯ୍ୟ ଦିବସରେ ପ୍ରାୟ ୯ କୋଟି ଟଙ୍କା ଖର୍ଚ୍ଚ ହୁଏ । ଏହି ଆନୁମାନିକ ଖର୍ଚ୍ଚ ମଧ୍ୟରେ ଭିତ୍ତିଭୂମି, କର୍ମଚାରୀଙ୍କ ବେତନ, ସୁରକ୍ଷା, ପରିବହନ ଏବଂ ସାଂସଦମାନଙ୍କ ଭତ୍ତା ଅନ୍ତର୍ଭୁକ୍ତ। ଗତ ୧୨ ଦିନର କାର୍ଯ୍ୟ ଦିବସ ମଧ୍ୟରେ ନିର୍ଦ୍ଧାରିତ ମୋଟ ୧୪୪ ଘଣ୍ଟାରୁ ପ୍ରାୟ ୯୫ ପ୍ରତିଶତ ସମୟ ଗୃହ ମୁଲତବୀ ଯୋଗୁଁ ନଷ୍ଟ ହୋଇଯାଇଛି। ଏହି ୯୫ ପ୍ରତିଶତ ନଷ୍ଟ ହୋଇଥିବା ସମୟର ମୂଲ୍ୟ କେବଳ ଏହି ଅଧିବେଶନରେ ପ୍ରାୟ ୧୫୦ ରୁ ୧୯୦ କୋଟି ଟଙ୍କା ହେବ।

ପୂର୍ବର ରେକର୍ଡ ଏବଂ ଆକଳନ ଅନୁଯାୟୀ, ଏହି ଅଧିବେଶନ ସବୁଠାରୁ କମ୍ କାର୍ଯ୍ୟକ୍ଷମ ଅଧିବେଶନଗୁଡ଼ିକ ମଧ୍ୟରୁ ଅନ୍ୟତମ ହେବାକୁ ଯାଉଛି, ଯାହା ୨୦୨୫ର ମୌସୁମୀ ଅଧିବେଶନ ତୁଳନାରେ ଅଧିକ ଖରାପ ସ୍ଥିତିକୁ ସୂଚାଉଛି ।

ଅନ୍ୟପଟେ ସଂସଦର ଏହି ମୌସୁମୀ ଅଧିବେଶନରେ ଦୁଇଟି ଗୁରୁତ୍ୱପୂର୍ଣ୍ଣ ବିଲ୍ ପାରିତ ହୋଇଛି, ସେଗୁଡ଼ିକ ହେଉଛି- ‘ଜାତୀୟ ସମ୍ମାନର ଅବମାନନା ନିରୋଧୀ (ବନ୍ଦେ ମାତରମ୍) ବିଲ୍’ ଏବଂ ପ୍ରଶ୍ନପତ୍ର ଲିକ୍ ବିରୋଧୀ ବିଲ୍’। ‘ବନ୍ଦେ ମାତରମ୍ ବିଲ୍’ ଅନୁସାରେ ଜାତୀୟ ପତାକା, ସମ୍ବିଧାନ, ଜାତୀୟ ସଙ୍ଗୀତ ଏବଂ ଏବେ ଜାତୀୟ ଗୀତ ‘ବନ୍ଦେ ମାତରମ୍’ର ଅବମାନନାକୁ ଅପରାଧ ବୋଲି ଧରାଯିବ । ଇଚ୍ଛାକୃତ ଭାବରେ ଏହି ଗୀତ ବୋଲିବାରେ ବାଧା ସୃଷ୍ଟି କରିବା କିମ୍ବା କୌଣସି ସଭାରେ ବ୍ୟାଘାତ ସୃଷ୍ଟି କଲେ ୩ ବର୍ଷ ପର୍ଯ୍ୟନ୍ତ ଜେଲ୍‌, ଜରିମାନା କିମ୍ବା ଉଭୟ ଦଣ୍ଡର ପ୍ରାବଧାନ ରହିଛି। ଏହି ବିଲ୍ ଜୁଲାଇ ୨୯ ରେ ରାଜ୍ୟସଭାରେ ଏବଂ ଜୁଲାଇ ୩୦ ରେ ଲୋକସଭାରେ ପାରିତ ହୋଇଥିଲା।

ସେହିପରି ‘ପ୍ରଶ୍ନପତ୍ର ଲିକ୍ ବିରୋଧୀ ବିଲ୍’ ପରୀକ୍ଷା ଜାଲିଆତି, ପ୍ରଶ୍ନପତ୍ର ଲିକ୍ ଏବଂ ଟେକ୍ନୋଲୋଜି ସାହାଯ୍ୟରେ ହେଉଥିବା କପି ରୋକିବା ପାଇଁ ୨୦୨୪ର ମୂଳ ଆଇନକୁ ଅଧିକ କଡ଼ାକଡ଼ି କରିବାକୁ ଅଣାଯାଇଛି। ଏହି ନୂତନ ସଂଶୋଧନରେ ଅଭିଯୁକ୍ତଙ୍କ ପାଇଁ କଠୋର ଦଣ୍ଡର ପ୍ରସ୍ତାବ ଦିଆଯାଇଛି। ଏହି ସଂଶୋଧନ ଅଧୀନରେ, ଅଭିଯୁକ୍ତଙ୍କୁ ୫ ରୁ ୧୦ ବର୍ଷ ପର୍ଯ୍ୟନ୍ତ ଜେଲ ଦଣ୍ଡ ଏବଂ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା କରାଯାଇପାରିବ।