ৰৌজ আলীৰ জানাজাত ভাগ নলয় গাঁওবাসীয়ে, ৰাজহুৱা কবৰস্থানতো কবৰস্থ কৰিবলৈ নিদিয়াৰ সিদ্ধান্ত
মুকালমুৱাৰ গংগাপুৰত সংঘটিত ভয়ংকৰ আক্ৰমণৰ ঘটনাৰ মূল অভিযুক্ত ৰৌজ আলিৰ পৰিয়ালক এঘৰীয়া কৰিছে ৰাইজে । ৰাজহুৱা কবৰস্থানতো সমাধিস্থ কৰিবলৈ দিয়া নহ’ব বুলি এক গুৰুত্বপূৰ্ণ সিদ্ধান্ত গ্ৰহণ কৰিছে স্থানীয় ৰাইজে ।
নলবাৰী জিলাৰ মুকালমুৱাৰ গংগাপুৰত সংঘটিত ভয়ংকৰ আক্ৰমণৰ ঘটনাৰ মূল অভিযুক্ত ৰৌজ আলিৰ পৰিয়ালক এঘৰীয়া কৰিছে ৰাইজে । অসম আৰক্ষীৰ এনকাউণ্টাৰত নিহত হোৱা ৰৌজ আলিৰ মৃতদেহ নিজ গাঁও দেহৰকালকুচিৰ ৰাজহুৱা কবৰস্থানত সমাধিস্থ কৰিবলৈ দিয়া নহ’ব বুলি এক গুৰুত্বপূৰ্ণ সিদ্ধান্ত গ্ৰহণ কৰিছে স্থানীয় ৰাইজে । এই ঘটনাৰ পিছতে ৰাইজে এঘৰীয়া কৰিছে ৰৌজ আলীৰ পৰিয়ালক । ৰৌজ আলীৰ পৰিয়ালৰ সৈতে গাঁওবাসীয়ে কোনো সম্পৰ্ক নৰখাৰ সিদ্ধান্ত গ্ৰহণ কৰিছে ।
৬ খন গাঁৱৰ যৌথ সিদ্ধান্ত :
প্ৰাপ্ত তথ্য অনুসৰি, এই সিদ্ধান্তটো কেৱল দেহৰকালকুচি গাঁৱৰ বাসিন্দাসকলেই নহয়, বৰঞ্চ ওচৰ-চুবুৰীয়া আন পাঁচখন গাঁৱৰ ৰাইজেও একগোট হৈ গ্ৰহণ কৰিছে । কেৱল কবৰস্থানত স্থান নিদিয়াই নহয়, অভিযুক্ত ৰৌজ আলিৰ জনাজাত (অন্ত্যেষ্টিক্ৰিয়া) বা কোনো ধৰণৰ ধৰ্মীয় ৰীতি-নীতিত গাঁৱৰ কোনো লোকে অংশগ্ৰহণ নকৰে বুলিও ৰাইজে একমুখে সংকল্প লৈছে ।
কেনেকৈ হৈছিল এনকাউণ্টাৰ ?
আৰক্ষীৰ এক সূত্ৰই প্ৰকাশ কৰা মতে, গংগাপুৰ আক্ৰমণ কাণ্ডৰ তদন্তৰ অংশ হিচাপে মুকালমুৱা অঞ্চলত আৰক্ষীয়ে এক অভিযান চলাইছিল । উক্ত অভিযানৰ সময়তে মূল অভিযুক্ত ৰৌজ আলি নামৰ দুৰ্বৃত্তটো আৰক্ষীৰ গুলীত নিহত হয় ।
আছিল কি এই গংগাপুৰ কাণ্ড ?
উল্লেখ্য যে, যোৱা শনিবাৰে নিশা মুকালমুৱা থানাৰ অন্তৰ্গত গংগাপুৰত এক অতি বৰ্বৰ ঘটনা সংঘটিত হৈছিল । স্কুটীৰে যাত্ৰা কৰি থকা অৱস্থাত দুগৰাকী যুৱক-যুৱতী ক্ৰমে- ১৯ বছৰীয়া মাধুৰ্য বৰ্মন আৰু ১৮ বছৰীয়া মৃদুমুদ্ৰা ডেকাৰ ওপৰত চোকা অস্ত্ৰৰে প্ৰাণঘাতী আক্ৰমণ চলাইছিল পাষাণ ৰৌজ আলীয়ে ।
এই প্ৰাণঘাতী আক্ৰকমণত গুৰুতৰভাৱে আঘাতপ্ৰাপ্ত যুৱকজনে চিকিৎসাধীন অৱস্থাতে শেষ নিশ্বাস ত্যাগ কৰে । আনহাতে বৰ্তমানো সংকটজনক অৱস্থাত হস্পিটালত চিকিৎসাধীন হৈ আছে মৃদুমুদ্ৰা ডেকা নামৰ যুৱতীগৰাকী । এই জঘন্য ঘটনাৰ মূল মাষ্টাৰমাইণ্ড হিচাপে তদন্তকাৰীকাৰী দলে ৰৌজ আলিক চিনাক্ত কৰিছিল ।
লগতে পঢ়ক : নলবাৰী কাণ্ডৰ অভিযুক্ত ৰোজ আলীক এনকাউণ্টাৰ
