ଆସନ୍ତା ୮ରେ କଂଗ୍ରେସର ‘ଓଡ଼ିଶା ବନ୍ଦ’ ଡାକରା: ଏମଏମଡିଆ ଆକ୍ଟ ସହ ଏସବୁ ପ୍ରସଙ୍ଗରେ ରାଜ୍ୟ ସରକାରଙ୍କୁ ଘେରିବ

ଭୁବନେଶ୍ୱର: ରାଜ୍ୟରେ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ ସରକାରଙ୍କ ବିରୋଧରେ ଆଭିମୁଖ୍ୟ କଡ଼ା କରିଛି ପ୍ରଦେଶ କଂଗ୍ରେସ କମିଟି (ପିସିସି)। ଆସନ୍ତା ୮ରେ ସାରା ରାଜ୍ୟରେ ‘ଓଡ଼ିଶା ବନ୍ଦ’ ଡାକରା ଦେଇଛି ଦଳ। ମଙ୍ଗଳବାର ଆୟୋଜିତ ଏକ ବୃହତ୍ ପ୍ରତିବାଦ ସଭାରେ ପିସିସି ସଭାପତି ଭକ୍ତ ଚରଣ ଦାସ ଏହି ବଡ଼ ଘୋଷଣା କରିଛନ୍ତି।

ସୂଚନା ଅନୁଯାୟୀ, ଏମଏମଡିଆର ଆକ୍ଟ, ସିଇସି ଏବଂ ସ୍କୁଲ ପାଠ୍ୟପୁସ୍ତକରେ ହୋଇଥିବା ଗୁରୁତର ତ୍ରୁଟି ବିରୋଧରେ କଂଗ୍ରେସ ପକ୍ଷରୁ ଏହି ପ୍ରତିବାଦ ପ୍ରଦର୍ଶନ କରାଯାଇଥିଲା। ସରକାରଙ୍କ ଜନବିରୋଧୀ ନୀତି ଏବଂ ଶିକ୍ଷା ବ୍ୟବସ୍ଥାରେ ଅବହେଳାକୁ ନେଇ କଂଗ୍ରେସ ନେତା ଓ କର୍ମୀମାନେ ଜୋରଦାର ସ୍ୱର ଉତ୍ତୋଳନ କରିଛନ୍ତି।

Also Read: CECଙ୍କ ଉପରେ ବର୍ଷିଲେ ରାହୁଲ ଗାନ୍ଧି, କହିଲେ-ତାଙ୍କ ଦ୍ୱାରା ଏହି କାମ କରାଇଥିବା ସିଷ୍ଟମର ହେବ ହିସାବ

ଜୋରଦାର ହେବ ଆନ୍ଦୋଳନ

ପିସିସି ସଭାପତି ଭକ୍ତ ଦାସ ସରକାରଙ୍କୁ ସମାଲୋଚନା କରି କହିଛନ୍ତି ଯେ, ସାଧାରଣ ଜନତା, ଖଣିଜ ସମ୍ପଦ ଏବଂ କୋମଳମତି ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳାଯାଉଥିବାରୁ ଦଳ ନୀରବ ରହିବ ନାହିଁ। ଏହିସବୁ ଦାବିର ପ୍ରତିବାଦରେ ଏବଂ ସରକାରଙ୍କ ଉପରେ ଚାପ ସୃଷ୍ଟି କରିବା ପାଇଁ ଆସନ୍ତା ୮ ତାରିଖରେ ୧୨ ଘଣ୍ଟିଆ ଓଡ଼ିଶା ବନ୍ଦ କରାଯିବ।

ଏହି ବନ୍ଦ ଡାକରାକୁ ସଫଳ କରିବା ପାଇଁ ସାରା ରାଜ୍ୟର ଦଳୀୟ କର୍ମୀ, ନେତା ଏବଂ ଆଞ୍ଚଳିକ ସଂଗଠନଗୁଡ଼ିକୁ ସାମିଲ ହେବାକୁ କଂଗ୍ରେସ ପକ୍ଷରୁ ନିବେଦନ କରାଯାଇଛି। ସେହିପରି ଜନସାଧାରଣଙ୍କ ସହଯୋଗ ମଧ୍ୟ ଲୋଡ଼ାଯାଇଛି।