ପଶ୍ଚିମବଙ୍ଗ ଅର୍ଥମନ୍ତ୍ରୀଙ୍କ ଚାଞ୍ଚଲ୍ୟକର ବୟାନ, ବିଜେପି ସରକାରଙ୍କ ଯୋଗୁ ଦେବାଳିଆ ହେବାରୁ ବର୍ତ୍ତିଗଲା ରାଜ୍ୟ
କୋଲକାତା: ପଶ୍ଚିମବଙ୍ଗ ଅର୍ଥମନ୍ତ୍ରୀ ସ୍ୱପ୍ନ ଦାସଗୁପ୍ତା ଶନିବାର ବିଧାନସଭାରେ କହିଛନ୍ତି ଯେ ମେ ମାସରେ ବିଜେପି ରାଜ୍ୟ ଶାସନକୁ ଆସିବା ପରେ କେନ୍ଦ୍ରରୁ ୭୦,୦୦୦ କୋଟି ଟଙ୍କା ମିଳିଛି। ଫଳରେ ରାଜ୍ୟ ଦେବାଳିଆ ହେବାରୁ ବର୍ତ୍ତି ଯାଇଛି। ଦାସଗୁପ୍ତା କହିଛନ୍ତି ଯେ ମମତା ବାନାର୍ଜୀଙ୍କ ଟିଏମସି ସରକାର ରାଜ୍ୟ ଉପରେ ୮ଲକ୍ଷ କୋଟି ଟଙ୍କାରୁ ଅଧିକ ଋଣ ଛାଡି ଯାଇଛନ୍ତି। ଏଥିରେ ଯଦି କେନ୍ଦ୍ରରୁ ସହାୟତା ମିଳି ନଥାନ୍ତା ରାଜ୍ୟର ଅନେକ ଲୋକକଲ୍ୟାଣକାରୀ ଯୋଜନା ବନ୍ଦ ହୋଇଯାଇଥାନ୍ତା।
ବିଧାନସଭାରେ ଉପସ୍ଥାପନ କରାଯାଇଥିବା ବିନିଯୋଗ ବିଧେୟକ ଉପରେ ଚର୍ଚ୍ଚା କାଳରେ ସଦନକୁ ସମ୍ବୋଧିତ କରି ଦାସଗୁପ୍ତା କହିଛନ୍ତି ଯେ ରାଜ୍ୟ ସରକାରଙ୍କୁ କେନ୍ଦ୍ରରୁ ୭୦,୦୦୦ କୋଟି ଟଙ୍କା ମିଳିଛି। ରାଜ୍ୟ ସରକାରଙ୍କୁ ରାଜକୋଷରୁ ଅର୍ଥ ବ୍ୟୟ ପାଇଁ ଅନୁମତି ଦେଉଥିବା ବିଧେୟକ ଶନିବାର ବିଧାନସଭାରେ ଗୃହୀତ ହୋଇଯାଇଛି। ବିଧେୟକ ଉପରେ ଚର୍ଚ୍ଚା କାଳରେ ସ୍ୱପନ ଦାସଗୁପ୍ତା କହିଛନ୍ତି ଯେ ରାଜ୍ୟରେ ବିଜେପି ସରକାରଙ୍କୁ କେତେକ ଅତିରିକ୍ତ ପ୍ରାବଧାନ କରିବାକୁ ପଡିବ। ଏଥିରେ କାର ନିର୍ମାଣ ୟୁନିଟ୍ ସ୍ଥାପନା ନିମନ୍ତେ ଆବଣ୍ଟିତ ଜମି ସମ୍ପର୍କିତ ବିବାଦରେ ଟାଟା ମୋଟର୍ସ ପକ୍ଷରେ ଆସିଥିବା ନିଷ୍ପତ୍ତି ସମ୍ପର୍କିତ ପ୍ରାବଧାନ ମଧ୍ୟ ରହିଛି।
କୋର୍ଟଙ୍କ ଏହି ନିଷ୍ପତ୍ତିକୁ ପଶ୍ଚିମବଙ୍ଗ ଔଦ୍ୟୋଗିକ ବିକାଶ ନିଗମ କୋଲକାତା ଉଚ୍ଚ ନ୍ୟାୟାଳୟରେ ଚ୍ୟାଲେଞ୍ଜ କରିଛି। ଏହା ଛଡା ଶନିବାର ବିଧାନସଭାରେ ସିଏଜିଙ୍କ ୨୮ଟି ପେଣ୍ଡିଂ ରିପୋର୍ଟ ଉପସ୍ଥାପନ କରାଯାଇଛି। ଏହା ଉପରେ ଆଲୋଚନା ଲାଗି ବିଧାନସଭାର ଏକ ବିଶେଷ ଅଧିବେଶନ ଡକାଯିବ ବୋଲି ସରକାର କହିଛନ୍ତି। ସରକାର ଅଭିଯୋଗ କରିଛନ୍ତି ଯେ ଟିଏମସି ସରକାର ଏହି ରିପୋର୍ଟକୁ ସଦନରେ ଉପସ୍ଥାପନ ନ କରି ସାମ୍ବିଧାନିକ ଭୁଲ କରିଥିବାର ଅଭିଯୋଗ କରିଛନ୍ତି। ୨୦୨୦-୨୧ ଆର୍ଥିକ ବର୍ଷରୁ ୨୦୨୪-୨୫ ପର୍ଯ୍ୟନ୍ତ ସିଏଜି ରିପୋର୍ଟକୁ ବିଧାନସଭାରେ ଉପସ୍ଥାପନ କରି ସ୍ୱପନ ଦାସଗୁପ୍ତା କହିଛନ୍ତି ଯେ ଏହି ରିପୋର୍ଟ ରାଜ୍ୟର ଆର୍ଥିକ ଛବି ଉପରୁ ପର୍ଦ୍ଦା ହଟାଇବ।
