ମୁମ୍ୱାଇ: ବଲିଉଡ୍ ଓ ସାଉଥ୍ ଫିଲ୍ମର ଜଣାଶୁଣା ଅଭିନେତ୍ରୀ ରଶ୍ମିକା ମନ୍ଦାନାଙ୍କ ସହ ବଡ଼ ଅଘଟଣ ଘଟିଛି । ତାଙ୍କର ପରବର୍ତ୍ତୀ ଫିଲ୍ମର ସୁଟିଂ ସମୟରେ ଏକ ଡାନ୍ସ ସିକ୍ଵେନ୍ସ ବେଳେ ସେ ଗୁରୁତର ଆହତ ହୋଇଛନ୍ତି । ରିପୋର୍ଟ ଅନୁସାରେ, ଏହି ଦୁର୍ଘଟଣାରେ ତାଙ୍କର ହିପ୍ ଟେଣ୍ଡନ୍ (ଅଣ୍ଟା ଏବଂ ଜଙ୍ଘକୁ ଯୋଡ଼ୁଥିବା ସ୍ନାୟୁ) ସମ୍ପୂର୍ଣ୍ଣ ଅଲଗା ହୋଇଯାଇଛି ।
ଏହି ଆଘାତ ଏତେ ବଡ଼ ଯେ ଡାକ୍ତରମାନେ ଦେଖି ଆଶ୍ଚର୍ଯ୍ୟ ହୋଇଗଲେ । ଡାକ୍ତରମାନେ ତାଙ୍କୁ ତୁରନ୍ତ କାମ ବନ୍ଦ କରି ଅତି କମରେ ୬ ସପ୍ତାହ ପର୍ଯ୍ୟନ୍ତ ବେଡ୍ ରେଷ୍ଟ୍ ଏବଂ ଫିଜିକାଲ୍ ଥେରାପି ନେବାକୁ ପରାମର୍ଶ ଦେଇଛନ୍ତି । ଏହି ଖବର ଆସିବା ପରେ ତାଙ୍କ ଫ୍ୟାନ୍ସମାନେ ଚିନ୍ତିତ ହୋଇପଡ଼ିଛନ୍ତି ।
ଡାନ୍ସ ଓ ଆକ୍ସନ୍ ସିନ୍ ସମୟରେ ଦୁର୍ଘଟଣା
ରିପୋର୍ଟ ଅନୁସାରେ, ରଶ୍ମିକାଙ୍କୁ ଏହି ଗମ୍ଭୀର ଆଘାତ ତାଙ୍କ ଆଗାମୀ ଫିଲ୍ମ ‘ରଣବାଲି’ ଏବଂ ‘ମ୍ୟସା’ର ଆକ୍ସନ୍ ଓ ଜଟିଳ ଡାନ୍ସ ସିନ୍ ସୁଟିଂ ସମୟରେ ଲାଗିଛି । କ୍ରମାଗତ ଭାବେ ହେଉଥିବା ଅତ୍ୟଧିକ ଶାରୀରିକ ପରିଶ୍ରମ ଯୋଗୁଁ ତାଙ୍କ ଶରୀର ଉପରେ ଚାପ ପଡ଼ିଥିଲା । ଡାକ୍ତରମାନେ ସ୍ପଷ୍ଟ କରିଛନ୍ତି ଯେ, ତାଙ୍କୁ ସମ୍ପୂର୍ଣ୍ଣ ସୁସ୍ଥ ହେବା ପାଇଁ ପୂରା ସମୟ ଦେବାକୁ ପଡ଼ିବ ।
ମେଡିକାଲ୍ ବିଶେଷଜ୍ଞମାନେ ରଶ୍ମିକାଙ୍କ ଆହତ ଦେଖି ଆଶ୍ଚର୍ଯ୍ୟ ହୋଇଛନ୍ତି । ସାଧାରଣତଃ ଏପରି ହିପ୍ ଟେଣ୍ଡନ୍ ସମ୍ପୂର୍ଣ୍ଣ ଅଲଗା ହୋଇଯିବା ଘଟଣା ଜଣେ ପ୍ରଫେସନାଲ୍ ଆଥଲେଟ୍ଙ୍କ କ୍ଷେତ୍ରରେ ଦେଖିବାକୁ ମିଳିଥାଏ । ଏଥିରୁ ସ୍ପଷ୍ଟ ଜଣାପଡ଼ୁଛି ଯେ ଫିଲ୍ମର କଠିନ୍ ସିନଗୁଡ଼ିକୁ ପରଫେକ୍ଟ କରିବା ପାଇଁ ରଶ୍ମିକା ସୁଟିଂ ସେଟରେ ଶାରୀରିକ ଚାପ ସହୁଥିଲେ ।
ଡାକ୍ତରମାନେ ରଶ୍ମିକାଙ୍କୁ ଏକ ସ୍ୱତନ୍ତ୍ର ରିହାବିଲିଟେସନ୍ ପ୍ରୋଗ୍ରାମ୍ କରିବାକୁ ପରାମର୍ଶ ଦେଇଛନ୍ତି । ବର୍ତ୍ତମାନ ଆଗାମୀ କିଛି ସପ୍ତାହ ପର୍ଯ୍ୟନ୍ତ ତାଙ୍କର ସମ୍ପୂର୍ଣ୍ଣ ଧ୍ୟାନ କେବଳ ବିଶ୍ରାମ ଏବଂ ସୁସ୍ଥ ହେବା ଉପରେ ରହିବ । ସେଟରେ ଘଟିଥିବା ଏହି ଦୁର୍ଘଟଣାକୁ ନେଇ ରଶ୍ମିକା କିମ୍ବା ତାଙ୍କ ଟିମ୍ ତରଫରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ବୟାନ ଜାରି କରାଯାଇ ନାହିଁ ।
ବିଜୟ ଦେବରକୋଣ୍ଡାଙ୍କୁ ବିବାହ କରିବା ପରେ ରଶ୍ମିକା ନିକଟରେ ତାଙ୍କ ନୂଆ ଫିଲ୍ମ ‘ମ୍ୟସା’ର ସୁଟିଂ ପୁଣି ଆରମ୍ଭ କରିଥିଲେ । ‘ଅନ୍ଫୋର୍ମୁଲା ଫିଲ୍ମସ’ ବ୍ୟାନରରେ ତିଆରି ହେଉଥିବା ଏହି ଆକ୍ସନ୍-ଥ୍ରିଲର୍ ଫିଲ୍ମର ସେଟରୁ ରଶ୍ମିକା ନିଜେ ମଧ୍ୟ ଏକ ଝଲକ୍ ସୋସିଆଲ୍ ମିଡିଆରେ ସେୟାର୍ କରିଥିଲେ ।
ସେହିପରି ଚଳିତ ବର୍ଷ ସାଧାରଣତନ୍ତ୍ର ଦିବସ ଅବସରରେ ରଶ୍ମିକା ଏବଂ ତାଙ୍କ ସ୍ୱାମୀ ବିଜୟ ଦେବରକୋଣ୍ଡା ଆଉ ଏକ ବଡ଼ ଫିଲ୍ମ ‘ରଣବାଲି’ର ଟାଇଟଲ୍ ଏବଂ ରିଲିଜ୍ ଡେଟ୍ ଘୋଷଣା କରିଥିଲେ । ନିର୍ଦ୍ଦେଶକ ରାହୁଲ ସାଂକୃତ୍ୟାୟନଙ୍କ ଏହି ଫିଲ୍ମ ୧୧ ସେପ୍ଟେମ୍ବରରେ ସିନେମାଘରେ ମୁକ୍ତିଲାଭ କରିବ ।
