উত্তৰ-পূব পৰিষদৰ ৭৩ সংখ্যক পূৰ্ণাংগ অধিৱেশনত অংশগ্ৰহণ কৰি মুখ্যমন্ত্ৰীগৰাকীয়ে কয় যে বাণিজ্য, সংযোগ আৰু অৰ্থনৈতিক উন্নয়নৰ বাবে এই সমগ্ৰ অঞ্চলটোৱে এতিয়া এক গুৰুত্বপূৰ্ণ প্ৰৱেশদ্বাৰ হিচাপে আত্মপ্ৰকাশ কৰিছে ।
উত্তৰ-পূৰ্বাঞ্চলক এতিয়া ভাৰতৰ মূল ভূখণ্ডৰ পৰা থকা ভৌগোলিক দূৰত্বৰে নহয়, বৰঞ্চ দক্ষিণ-পূব এছিয়াৰ সৈতে থকা ইয়াৰ কৌশলগত নিকটতাৰেহে সংজ্ঞায়িত কৰা হয় । এই মন্তব্য মুখ্যমন্ত্ৰী ড° হিমন্ত বিশ্ব শৰ্মাৰ । বৃহস্পতিবাৰে মেঘালয়ৰ ৰাজধানী শ্বিলঙত অনুষ্ঠিত উত্তৰ-পূব পৰিষদৰ (NEC) ৭৩ সংখ্যক পূৰ্ণাংগ অধিৱেশনত অংশগ্ৰহণ কৰি মুখ্যমন্ত্ৰীগৰাকীয়ে কয় যে বাণিজ্য, সংযোগ আৰু অৰ্থনৈতিক উন্নয়নৰ বাবে এই সমগ্ৰ অঞ্চলটোৱে এতিয়া এক গুৰুত্বপূৰ্ণ প্ৰৱেশদ্বাৰ হিচাপে আত্মপ্ৰকাশ কৰিছে ।
কেন্দ্ৰীয় চৰকাৰৰ ‘এক্ট ইষ্ট পলিচী’, আন্তঃৰাষ্ট্ৰীয় বজাৰ, সংস্কৃতি আৰু নতুন নতুন সুযোগসমূহে ক্ৰমান্বয়ে উত্তৰ-পূবৰ ভৱিষ্যত সলনি কৰিছে বুলি উল্লেখ কৰি তেওঁ কয় যে বৰ্তমান অঞ্চলটোক লৈ চলি থকা চৰ্চাৰ ধাৰাটো সম্পূৰ্ণ সলনি হৈছে । পূৰ্বতে উত্তৰ-পূৰ্বাঞ্চল বুলিলে উগ্ৰপন্থী আৰু অস্থিৰতাৰ কথা চৰ্চা হৈছিল, কিন্তু এতিয়া ইয়াৰ পৰিৱৰ্তে কেৱল প্ৰগতি, সম্ভাৱনা আৰু উন্নয়নৰ কথাহে চৰ্চিত হয় ।
কেন্দ্ৰীয় গৃহমন্ত্ৰী অমিত শ্বাহৰ এক মন্তব্যৰ উদ্ধৃতি দি মুখ্যমন্ত্ৰী ড০ শৰ্মাই কয়, “আদৰণীয় গৃহমন্ত্ৰী ডাঙৰীয়াই উল্লেখ কৰাৰ দৰেই, উত্তৰ-পূবত এতিয়া আমাৰ মনোযোগ আইন-শৃংখলা ৰক্ষা কৰাৰ পৰা আঁতৰি নাগৰিকৰ অধিকাৰ সুৰক্ষিত কৰা আৰু উন্নয়নৰ গতি ক্ষিপ্ৰ কৰাৰ দিশলৈ স্থানান্তৰিত হৈছে ।”
অৰ্থনৈতিক চালিকা শক্তি হিচাপে অসম-
ভাষণ প্ৰসংগত মুখ্যমন্ত্ৰীগৰাকীয়ে অসমৰ অৰ্থনৈতিক প্ৰগতিৰ খতিয়ান দাঙি ধৰে । ছেমিকণ্ডাক্টৰ উদ্যোগ, অভ্যন্তৰীণ জলপথ পৰিবহণ, ঔদ্যোগিক কৰিডৰ আৰু আতিথ্য খণ্ডৰ অভূতপূৰ্ব বিকাশৰ কথা উল্লেখ কৰি তেওঁ কয় যে অসমে বৰ্তমান উত্তৰ-পূৰ্বাঞ্চলৰ অৰ্থনৈতিক মূল খুঁটি বা ‘এংকৰ’ হিচাপে কাম কৰিছে ।
এন ই চি-ৰ ভূমিকা আৰু ভৱিষ্যতৰ লক্ষ্য-
অঞ্চলটোৰ আন্তঃগাঁথনি উন্নয়নত উত্তৰ-পূব পৰিষদৰ ভূমিকাৰ শলাগ লৈ মুখ্যমন্ত্ৰীয়ে কয় যে পৰিষদে বিগত বৰ্ষসমূহত সমগ্ৰ অঞ্চলটোত ১০,৫০০ কিলোমিটাৰতকৈও অধিক পথ আৰু ২,৫০০ কিলোমিটাৰ বিদ্যুৎ পৰিবাহী লাইন নিৰ্মাণত বৃহৎ সহযোগিতা আগবঢ়াইছে । তেওঁ লগতে আহ্বান জনায় যে উত্তৰ-পূবৰ ভৱিষ্যত কোনো এক একক ৰাজ্যৰ সুকীয়া উন্নয়নৰ ওপৰত নিৰ্ভৰ কৰা নাই, বৰঞ্চ একত্ৰিত আন্তঃগাঁথনি, আন্তঃসংলগ্ন বজাৰ আৰু এক উমৈহতীয়া দৃষ্টিভংগীৰ ওপৰতহে নিৰ্ভৰশীল ।
ভৱিষ্যতৰ প্ৰত্যাহ্বান আৰু সুযোগৰ বাবে উত্তৰ-পূৰ্বাঞ্চলক সজোৱাৰ প্ৰসংগত তেওঁ কয়, “আৰ্টিফিচিয়েল ইণ্টেলিজেন্স, মেচিন লাৰ্নিং, ব্লকচেইন প্ৰযুক্তিৰ পৰা আৰম্ভ কৰি বৈদেশিক বাণিজ্য আৰু স্বাস্থ্য পৰ্যটনলৈকে আধুনিক যুগৰ সকলো সম্ভাৱনাক আঁকোৱালি লৈ অঞ্চলটোক আগুৱাই নিয়াত চৰকাৰে গুৰুত্ব আৰোপ কৰিছে ।”
উল্লেখ্য যে, কেন্দ্ৰীয় গৃহমন্ত্ৰী অমিত শাহৰ অধ্যক্ষতাত অনুষ্ঠিত এই গুৰুত্বপূৰ্ণ পূৰ্ণাংগ অধিৱেশনত উত্তৰ-পূবৰ আটাইকেইখন ৰাজ্যৰ মুখ্যমন্ত্ৰী, ৰাজ্যপাল, জ্যেষ্ঠ বিষয়াসকল আৰু কেন্দ্ৰীয় চৰকাৰৰ উচ্চপদস্থ প্ৰতিনিধিসকল উপস্থিত আছিল ।
লগতে পঢ়ক : সমগ্ৰ অসমতে কাৰ্যকৰী হ’ব ‘চেল ব্ৰডকাষ্ট চিষ্টেম’; দুৰ্যোগৰ মুহূৰ্ততে মোবাইলত বাজিব সতৰ্কঘণ্টা
