ମୁମ୍ଵାଇ ୦୪।୧୦; ଜୟତୀ ଭାଟିଆ… ଟେଲିଭିଜନର ଲୋକପ୍ରିୟ ଅଭିନେତ୍ରୀ। ମନୋରଞ୍ଜନ ଜଗତରେ ସକ୍ରିୟ ରହିବା ସହିତ ସେ ୟୁଟ୍ୟୁବରେ ଭ୍ଲଗ୍ ମଧ୍ୟ କରନ୍ତି। ଯେଉଁ ଅଭିନେତ୍ରୀମାନେ ମାଆ ହୋଇନାହାନ୍ତି, ଜୟତୀ ସେମାନଙ୍କ ମଧ୍ୟରୁ ଅନ୍ୟତମ। ସବୁକିଛି ଥାଇ ମଧ୍ୟ ସେ ସନ୍ତାନ ନ ଜନ୍ମ କରିବାକୁ ନିଷ୍ପତ୍ତି ନେଇଥିଲେ। ଆସନ୍ତୁ ଜାଣିବା ଏହାର କାରଣ କ’ଣ।
‘ହଟରଫ୍ଲାଇ’ (Hauterrfly) ସହ ଏକ ଇଣ୍ଟରଭ୍ୟୁରେ ଜୟତୀ କହିଥିଲେ, “ଯେତେବେଳେ ମୋତେ ୪୫ ବର୍ଷ ବୟସ ହେଲା, ଲୋକମାନେ ଭାବିଲେ ଯେ ଏବେ ଆଉ ସନ୍ତାନ ହେବାର ସମ୍ଭାବନା ନାହିଁ। ଆମକୁ ସରୋଗେସି ପାଇଁ ମଧ୍ୟ ପରାମର୍ଶ ଦିଆଯାଇଥିଲା।”କିନ୍ତୁ କେହି ବି ଏହା ବୁଝିବାକୁ ଚାହୁଁନଥିଲେ ଯେ ମୁଁ ଏପରି ଏକ ସମୟରେ ବଡ଼ ହୋଇଥିଲି ଯେତେବେଳେ ଖବରକାଗଜ ଓ ବହିପତ୍ରରେ ରାଜନେତାମାନେ ଦେଶର ବଢୁଥିବା ଜନସଂଖ୍ୟା ବିଷୟରେ କ୍ରମାଗତ ଭାବେ ଆଲୋଚନା କରୁଥିଲେ।
ଜୟତୀ କହିଲେ, “ଅନେକ ସମୟରେ ମୋତେ ଲାଗୁଥିଲା ଯେ ମୋର ସନ୍ତାନ ହେବା ଉଚିତ୍। ଅନେକ ଲୋକ ମୋତେ ସନ୍ତାନ ଜନ୍ମ କରିବାକୁ ପରାମର୍ଶ ଦେଇଥିଲେ। ଥରେ ମୋ ମା’ ମଧ୍ୟ ପଚାରିଥିଲେ ଯେ ମୁଁ କାହିଁକି ସନ୍ତାନ ଜନ୍ମ କରିନାହିଁ ଏବଂ ମୋର ତାହା କରିବା ଉଚିତ୍। ସେତେବେଳେ ମୋ ପାଖରେ ଏହାର କୌଣସି ଉତ୍ତର ନଥିଲା।”
ଏହି ଅଭିନେତ୍ରୀ ଆହୁରି ମଧ୍ୟ କହିଲେ, “ନିଜ ମନର କଥା ବାରମ୍ବାର କହି କହି ମୁଁ ଥକି ପଡ଼ିଥିଲି। ମୁଁ ମୋର ବୃଦ୍ଧ ପିତାମାତାଙ୍କ ଯତ୍ନ ନେଉଥିଲି, ତେଣୁ ମୋ ସମୟର ଏକ ଅଂଶ ସେମାନଙ୍କ ସେବାରେ ହିଁ ବିତୁଥିଲା।” “ତେବେ, କେବଳ ପିତାମାତାଙ୍କ ଯତ୍ନ ନେଉଥିବାରୁ ଯେ ମୁଁ ସନ୍ତାନ ଜନ୍ମ କରିପାରିନଥିଲି, ତାହା ନୁହେଁ। ଜଣେ ବ୍ୟକ୍ତି ଭାବରେ ନିଜକୁ ସମ୍ପୂର୍ଣ୍ଣ ମନେ କରିବା ପାଇଁ ମୋତେ ସନ୍ତାନର ଆବଶ୍ୟକତା ନଥିଲା।
ମୁଁ ଯେପରି ଅଛି, ସେଥିରେ ହିଁ ସମ୍ପୂର୍ଣ୍ଣ ଓ ଖୁସି ଅଟେ। ମୁଁ ଅନେକ କଥା ଶୁଣିବାକୁ ପାଇଥିଲି। ଯେତେବେଳେ ଲୋକମାନେ ଜାଣିପାରିଲେ ଯେ ମୋ ବୟସ ୪୮ ବର୍ଷ ହୋଇଗଲାଣି ଏବଂ ସନ୍ତାନ ଜନ୍ମ କରିବା ପାଇଁ ବୋଧହୁଏ ବହୁତ ବିଳମ୍ବ ହୋଇସାରିଛି, କେବଳ ସେତେବେଳେ ହିଁ ସେମାନେ ଏ ବିଷୟରେ କଥା ହେବା ବନ୍ଦ କରିଦେଲେ।
ସେ କୁହନ୍ତି, “ଯେତେବେଳେ ମୋତେ ୧୬ କିମ୍ବା ୧୭ ବର୍ଷ ବୟସ ହୋଇଥିଲା, ସେତେବେଳେ ମୁଁ ଜଣେ ସୁନ୍ଦର ପୁରୁଷଙ୍କୁ ବିବାହ କରିବା, ଏକ କ୍ୟାରିଅର୍ ଗଢ଼ିବା ଏବଂ ଏକ ସନ୍ତାନର ମା’ ହେବା ବିଷୟରେ କଳ୍ପନା କରୁଥିଲି। ସେଇଟା ହିଁ ମୋର ସ୍ୱପ୍ନ ଥିଲା, ହେଲେ ସତ କହିବାକୁ ଗଲେ ମୁଁ ଜାଣେନାହିଁ ସେହି ସ୍ୱପ୍ନ କେଉଁଠି ପଛରେ ରହିଗଲା।
ଜୟତୀ ୧୯୯୨ ମସିହା ମାର୍ଚ୍ଚ ୧୨ ତାରିଖରେ ଥିଏଟର କଳାକାର କିରଣ ଭାଟିଆଙ୍କୁ ବିବାହ କରିଥିଲେ। ବିବାହର ୩୪ ବର୍ଷ ପରେ ମଧ୍ୟ, ମା’ ନ ହୋଇଥିବାରୁ ସେ ଖୁସି ଅଛନ୍ତି ଏବଂ ଜୀବନରେ ତାଙ୍କର କୌଣସି ଅନୁତାପ ନାହିଁ। କାରଣ ଜୟତଙ୍କ ପାଇଁ ଜୀବନର ସଫଳତାର ମାପକାଠି କେବଳ ‘ମା’ ହେବା ନୁହେଁ। ନିଜ ନିଷ୍ପତ୍ତିରେ ଖୁସି ରହିବା, ନିଜ ପରିଚୟରେ ବଞ୍ଚିବା ଏବଂ ନିଜକୁ ସମ୍ପୂର୍ଣ୍ଣ ମନେ କରିବା ଏହା ହିଁ ତାଙ୍କ ପାଇଁ ପ୍ରକୃତ ସୁଖ। ଠିକ୍ ଏହି କାରଣରୁ ହିଁ ସେ ପ୍ରଶଂସକମାନଙ୍କର ସେ ପ୍ରିୟ ଅଟନ୍ତି।
