Assam Education Minister: চৰকাৰী বিদ্যালয়ত প্ৰৱেশত নাই কোনো বাধা, স্পষ্ট কৰিলে শিক্ষামন্ত্ৰীয়ে
Assam Education Minister: চৰকাৰী বিদ্যালয়লৈ অভিভাৱক-নাগৰিকৰ যাতায়াতত নাই নিষেধাজ্ঞা: ৰণোজ পেগু
শিক্ষামন্ত্ৰী ৰণোজ পেগুৱে বুধবাৰে স্পষ্ট কৰি দিয়ে যে ৰাজ্যৰ চৰকাৰী বা প্ৰাদেশীকৃত বিদ্যালয়সমূহলৈ অভিভাৱক, নাগৰিক বা নাগৰিক সমাজৰ সদস্যসকলৰ যাতায়াতত বাধা আৰোপ কৰি বিদ্যালয় শিক্ষা বিভাগে কোনো জাননী বা নিৰ্দেশ জাৰি কৰা নাই (Assam Education Minister)।
মন্ত্ৰী পেগুৱে কয় যে বিভাগে এনে কোনো নিষেধাজ্ঞা আৰোপ কৰাৰ বুলি প্ৰকাশিত বাতৰি সত্য নহয়।
ছ’চিয়েল মিডিয়াত প্ৰকাশ কৰা এটা পোষ্টত শিক্ষামন্ত্ৰীগৰাকীয়ে কয়, “মই স্পষ্ট কৰি দিব বিচাৰিছোঁ যে বিদ্যালয় শিক্ষা বিভাগে চৰকাৰী বা প্ৰাদেশীকৃত বিদ্যালয়লৈ কোনো লোকৰ যাতায়াতত বাধা আৰোপ কৰি কোনো জাননী বা নিৰ্দেশ জাৰি কৰা নাই। ইয়াৰ বিপৰীত দাবী কৰি সংবাদ মাধ্যমৰ এটা অংশত প্ৰকাশিত বাতৰি অসত্য (Education Minister Ranoj Pegu)।”
তেওঁ কয় যে অভিভাৱক আৰু নাগৰিকসকল বিদ্যালয়লৈ আহি গঠনমূলক পৰামৰ্শ আগবঢ়াব পাৰে। অৱশ্যে এনে ভ্ৰমণে যাতে নিয়মীয়া পাঠদানত ব্যাঘাত নঘটায় আৰু শৈক্ষিক পৰিৱেশত কোনো প্ৰভাৱ নপৰে, সেই কথা নিশ্চিত কৰিব লাগিব (Assam School Education Department)।
মন্ত্ৰী পেগুৱে কয়, “অভিভাৱক আৰু নাগৰিকসকল আমাৰ বিদ্যালয়সমূহলৈ আহি পৰামৰ্শ আগবঢ়াব পাৰে। কিন্তু দৰ্শনাৰ্থীসকলে নিশ্চিত কৰিব লাগিব যে নিয়মীয়া পাঠদানত কোনো ব্যাঘাত নঘটে আৰু শৈক্ষিক পৰিৱেশ অটুট থাকে।”
ইফালে শিক্ষামন্ত্ৰীগৰাকীয়ে জনায় যে বিদ্যালয়লৈ নাগৰিক সমাজৰ সদস্যসকলৰ যাতায়াতত বাধা আৰোপ কৰা হৈছে বুলি হোৱাটছএপত ভুৱা বাৰ্তা প্ৰচাৰ কৰাৰ অভিযোগত নুৰুল হুছেইন নামৰ এগৰাকী ক্লাষ্টাৰ ৰিছ’ৰ্চ চেণ্টাৰ কো-অৰ্ডিনেটৰ-ক কাৰণ দৰ্শোৱাৰ জাননী জাৰি কৰা হৈছে।
অসমত ককৰোচ জনতা পাৰ্টিৰ এটা প্ৰতিনিধি দলে ‘School Theek Karo’ অভিযানৰ অংশ হিচাপে বিভিন্ন বিদ্যালয় পৰিদৰ্শন কৰাৰ বাতৰিৰ মাজতে শিক্ষামন্ত্ৰীগৰাকীয়ে এই স্পষ্টীকৰণ আগবঢ়ায়।
লগতে পঢ়ক: মেট্ৰিক আৰু HS চূড়ান্ত পৰীক্ষাক লৈ ডাঙৰ সিদ্ধান্ত!
