Nagaon Lok Sabha bypoll: দেৱাশীষ শৰ্মাৰ হৈ প্ৰচাৰত হিমন্ত, ৰহাৰ সভাৰ পৰাই কংগ্ৰেছক পৰাজয়ৰ সকীয়নি
নগাঁও লোকসভা উপ-নিৰ্বাচনৰ বাবে বিজেপিৰ নিৰ্বাচনী প্ৰচাৰ তুংগত উঠিছে। সোমবাৰে নিৰ্বাচনী প্ৰচাৰত নামি বিজেপিৰ প্ৰাৰ্থী দেৱাশীষ শৰ্মাৰ হৈ প্ৰচাৰ চলায় মুখ্যমন্ত্ৰী ড০ হিমন্ত বিশ্ব শৰ্মাই (Nagaon Lok Sabha bypoll)।
ৰহাত এখন জনসভাৰে দেৱাশীষ শৰ্মাৰ হৈ প্ৰচাৰ অভিযান আৰম্ভ কৰে মুখ্যমন্ত্ৰীগৰাকীয়ে। ইয়াৰ পিছত তেওঁ চামগুৰি আৰু মৈৰাবাৰীত নিৰ্বাচনী সভাত অংশগ্ৰহণ কৰে (Nagaon by-election 2026)।
ৰহাৰ সভাত ভাষণ দি মুখ্যমন্ত্ৰী ড০ হিমন্ত বিশ্ব শৰ্মাই কয় যে এই উপ-নিৰ্বাচনৰ ফলত কেন্দ্ৰ বা ৰাজ্যৰ চৰকাৰ সলনি নহয়। বৰঞ্চ ভোটাৰসকলে বিজেপিৰ পক্ষত ভোটদান কৰিলে কেন্দ্ৰ আৰু ৰাজ্যৰ চৰকাৰ অধিক শক্তিশালী হ’ব।
তেওঁ কয়, “উপ-নিৰ্বাচনত বৰ্তমানৰ চৰকাৰ সলনি নহয়। এই নিৰ্বাচন নৰেন্দ্ৰ মোদী আৰু মামাৰ চৰকাৰক অধিক শক্তিশালী কৰাৰ বাবে। এই নিৰ্বাচনত বিজেপিক ভোট দিলে আমাৰ শক্তি বৃদ্ধি পাব (CM Election Campaign Nagaon)।”
মুখ্যমন্ত্ৰীগৰাকীয়ে কয় যে বিজেপিৰ নিৰ্বাচনী প্ৰচাৰৰ মূল বিষয় হ’ব উন্নয়ন আৰু চৰকাৰী আঁচনিসমূহৰ ধাৰাবাহিকতা। লগতে যুৱক-যুৱতীৰ বাবে নিয়োগ আৰু চৰকাৰী চাকৰিত নিযুক্তিৰ ক্ষেত্ৰত তেওঁৰ চৰকাৰে কাম কৰি যাব বুলি আশ্বাস দিয়ে। তেওঁ ২ লাখ নিযুক্তিৰ প্ৰতিশ্ৰুতিৰ কথাও উল্লেখ কৰে (Devasish Sharma Nagaon ByPoll)।
ৰহাৰ বাবে কেইবাটাও প্ৰস্তাৱিত উন্নয়নমূলক ব্যৱস্থাৰ কথাও ঘোষণা কৰে মুখ্যমন্ত্ৰীগৰাকীয়ে। তেওঁ কয়, “ৰহাত আৰু ১০ হাজাৰ হিতাধিকাৰীক অৰুণোদই আঁচনিৰ অধীনলৈ অনাৰ ব্যৱস্থা কৰিম, যাতে কোনো মাতৃ এই আঁচনিৰ সুবিধাৰ পৰা বঞ্চিত হৈ নাথাকে।”
আন্তঃগাঁথনিৰ ক্ষেত্ৰত মুখ্যমন্ত্ৰীগৰাকীয়ে কয় যে অসম মালা আঁচনিৰ অধীনত ৰহাত ১০০ কিলোমিটাৰ পথ নিৰ্মাণ কৰা হ’ব। তেওঁ কয় যে অঞ্চলটোৰ পথ যোগাযোগ ব্যৱস্থা উন্নত কৰাৰ প্ৰয়োজনীয়তাৰ ওপৰত তেওঁ পূৰ্বেও গুৰুত্ব আৰোপ কৰিছিল।
ৰহাৰ বিধায়ক শশীকান্ত দাসে উত্থাপন কৰা বিভিন্ন দাবীৰ কথা উল্লেখ কৰি মুখ্যমন্ত্ৰীগৰাকীয়ে কয় যে সমষ্টিটোত চিডিচি কাৰ্যালয়, ডিএছপি কাৰ্যালয়, ষ্টেডিয়াম, প্ৰেক্ষাগৃহ, ৰহা কলেজত বিজ্ঞান শাখা, উদ্যান, ৫০খন বিচনাযুক্ত চিকিৎসালয় আৰু চাপৰমুখ-মৰুৱাৰপট্টী সংযোগী এখন দলংৰ প্ৰয়োজন আছে।
তেওঁ কয়, “আপোনালোকে মোক মুখ্যমন্ত্ৰী বনাইছে আৰু এইবাৰ মই সকলো কাম সম্পূৰ্ণ কৰাৰ বাবে সম্পূৰ্ণ সাজু।”
ইয়াৰ উপৰি অঞ্চলটোৰ ছাত্ৰ-ছাত্ৰীৰ বাবে বিনামূলীয়া প্ৰশিক্ষণৰ সুবিধাসহ ADREৰ এটা কেন্দ্ৰ স্থাপনৰ বিষয়টোও চৰকাৰে বিবেচনা কৰিব বুলি মুখ্যমন্ত্ৰীগৰাকীয়ে কয়।
কংগ্ৰেছক লক্ষ্য কৰি মুখ্যমন্ত্ৰী ড০ হিমন্ত বিশ্ব শৰ্মাই অভিযোগ কৰে যে ক্ষমতাত থকা সময়ছোৱাত দলটোৱে হিন্দু আৰু মুছলমান উভয়কে বিমুখ কৰিছে। নগাঁৱৰ বটদ্ৰৱাৰ প্ৰাক্তন বিধায়ক শিৱামণি বৰাক কংগ্ৰেছে এই উপ-নিৰ্বাচনত প্ৰাৰ্থিত্ব প্ৰদান কৰিছে।
তেওঁ কয়, “মই আশাবাদী যে এইবাৰ নগাঁৱে কংগ্ৰেছক এনেদৰে পৰাজয়ৰ সোৱাদ দিব, যাৰ ফলত তেওঁলোকৰ সকলো চিন নাইকিয়া যাব। ইমান বছৰে কংগ্ৰেছে কেৱল শাসন কৰিলে। তেওঁলোকে হিন্দু বা মুছলমান- কাৰো বাবে ন্যায় নিশ্চিত কৰিব নোৱাৰিলে। তেওঁলোকে আমাৰ কাৰো সহায় কৰিব নোৱাৰিলে।”
লগতে পঢ়ক : Nimisha Thakuria death Case: নিমিষা ঠাকুৰীয়া ঘটনাক লৈ কি ক’লে মুখ্যমন্ত্ৰীয়ে?
