ନୂଆଦିଲ୍ଲୀ: ଏଆଇ (AI) ଏବେ ଅନିୟନ୍ତ୍ରିତ ହେଉଥିବା ନେଇ ଖବର ଦୁନିଆକୁ ଅନିଶ୍ଚିତତା ଭିତରକୁ ଠେଲି ଦେଇଛି । ଏଆଇକୁ ନିୟନ୍ତ୍ରଣ କିଭଳି କରାଯାଇ ପାରିବ ତାକୁ ନେଇ ବିଚାର ବିମର୍ଶ ଜାରି ରହିଛି । ଏହାରି ମଧ୍ୟରେ ଚୀନ୍ର ଚିପ୍ ନିର୍ମାତା ଏନଭିଡିଆ ବଡ଼ ସଫଳତା ହାସଲ କରିଛି । ଚିପ୍ ନିର୍ମାତା କମ୍ପାନୀ ଏନଭିଡିଆ (Nvidia) ଏକ ନୂତନ ଓପନ୍-ସୋର୍ସ ସୁରକ୍ଷା ସିଷ୍ଟମ୍ ଉନ୍ମୋଚନ କରିଛି। କମ୍ପାନୀ ଦାବି କରିଛି ଯେ, ଏହି ଦୁଇ-ସ୍ତରୀୟ ସୁରକ୍ଷା ପ୍ରଣାଳୀ ହଗିଂ ଫେସ୍ ଏବଂ ଓପନ୍-ଏଆଇ ସମ୍ବନ୍ଧୀୟ ବଡ଼ ଧରଣର ସାଇବର୍ ଆକ୍ରମଣକୁ ଅଟକାଇବାରେ ସକ୍ଷମ । ଏନଭିଡିଆ ଦୁଇଟି ନୂତନ ଓପନ୍-ସୋର୍ସ ସଫ୍ଟୱେର୍ ସୁରକ୍ଷା ଟୁଲ୍ ଜାରି କରୁଛି, ଯାହା ଏହାର ନିଜସ୍ୱ ହାର୍ଡୱେରରେ କାର୍ଯ୍ୟ କରିପାରିବ।
ଏହି ନୂଆ ସୁରକ୍ଷା ପ୍ରଣାଳୀକୁ ‘ଓପନ୍ ଏଜେଣ୍ଟ ସେଫ୍ଟି ପ୍ଲାଟଫର୍ମ’ ନାମରେ ନାମିତ କରାଯାଇଛି। ଏହା ଏଆଇ ଏଜେଣ୍ଟଗୁଡ଼ିକର କାର୍ଯ୍ୟକଳାପକୁ ପ୍ରତ୍ୟକ୍ଷ ଭାବରେ ନିୟନ୍ତ୍ରଣ କରିବ । କୌଣସି ଏଆଇ ସିଷ୍ଟମ୍ ନିୟମ ଭଙ୍ଗ କଲେ ତାହାକୁ ସଙ୍ଗେ ସଙ୍ଗେ ବନ୍ଦ କରିଦେବ। ନିକଟରେ ସ୍ୱୟଂଚାଳିତ ଏଆଇ ଏଜେଣ୍ଟଗୁଡ଼ିକର ଅନିୟନ୍ତ୍ରିତ ବ୍ୟବହାରକୁ ନେଇ ସମଗ୍ର ଏଆଇ ଶିଳ୍ପରେ ଚିନ୍ତା ପ୍ରକାଶ ପାଇଥିଲା । ଏହି ସମସ୍ୟାର ସମାଧାନ ପାଇଁ ଏନଭିଡିଆ ସୁରକ୍ଷା ସଫ୍ଟୱେର୍ କ୍ଷେତ୍ରକୁ ନିଜର ପରିସର ବୃଦ୍ଧି କରିଛି।
ଏନଭିଡିଆର ଏଣ୍ଟରପ୍ରାଇଜ୍ ଏଆଇ ଭାଇସ୍ ପ୍ରେସିଡେଣ୍ଟ ଜଷ୍ଟିନ୍ ବୋଇଟାନୋ କହିଛନ୍ତି ଯେ, ଯଦି ଅଗ୍ରଣୀ ଏଆଇ ଗବେଷଣାଗାରଗୁଡ଼ିକ ନିଜର ଏଆଇ ମଡେଲଗୁଡ଼ିକୁ ପରୀକ୍ଷା କରିବା ପାଇଁ ପୂର୍ବରୁ ଏହି ପ୍ରଯୁକ୍ତିବିଦ୍ୟା ବ୍ୟବହାର କରିଥାନ୍ତେ, ତେବେ ହଗିଂ ଫେସ୍ ଆକ୍ରମଣ ବିଷୟରେ ପୂର୍ବରୁ ସୂଚନା ମିଳିପାରିଥାନ୍ତା। ତଥ୍ୟ ଅନୁଯାୟୀ, ଏହି ନୂତନ ସୁରକ୍ଷା ପ୍ଲାଟଫର୍ମ ସେହି ବିପଦପୂର୍ଣ୍ଣ ଆକ୍ରମଣକୁ ସମ୍ପୂର୍ଣ୍ଣ ରୂପେ ରୋକିବାରେ ସମର୍ଥ ହୋଇଥାନ୍ତା।
ସେପଟେ ଏନଭିଡିଆର ସିଇଓ ଜେନସେନ୍ ହୁଆଙ୍ଗ୍ ଏଆଇ ଉପରେ ନୂତନ ଆଇନଗତ ନିୟନ୍ତ୍ରଣ ବା କଡ଼ା ନିୟମାବଳୀ ଆବଶ୍ୟକତାକୁ ଏଡ଼ାଇ ଦେଇଛନ୍ତି। ସେ କହିଛନ୍ତି ଯେ, ଏଆଇ ସୁରକ୍ଷା ହେଉଛି ଏକ ବୈଷୟିକ ସମସ୍ୟା, ଯାହାକୁ ଇଞ୍ଜିନିୟରିଂ ଏବଂ ସଫ୍ଟୱେରର କଡ଼ା ପରୀକ୍ଷଣ ମାଧ୍ୟମରେ ସମାଧାନ କରାଯାଇପାରିବ। ସେ ଏଆଇ ଯୋଗୁଁ ମାନବ ସଭ୍ୟତା ବିଲୋପ ହେବାର ଆଶଙ୍କାକୁ ପ୍ରତ୍ୟାଖ୍ୟାନ କରିଛନ୍ତି । ହେଲେ ଏଆଇ ସିଷ୍ଟମଗୁଡ଼ିକର କଡ଼ା ସୁରକ୍ଷା ଯାଞ୍ଚ ହେବା ଆବଶ୍ୟକ ବୋଲି ସେ କହିଛନ୍ତି ।
