ଭାରତକୁ ଯଦି ଭଲ ପାଉଛ, ଦୁବାଇରେ କାହିଁକି ରହୁଛ ? ବିବେକ ଓବରୟ ଏବଂ ଆର ମାଧବନଙ୍କୁ କଟାକ୍ଷ କଲେ ରାଜ୍ ଠାକରେ
ମୁମ୍ବାଇ: ମହାରାଷ୍ଟ୍ର ନବନିର୍ମାଣ ସେନା (MNS) ମୁଖ୍ୟ ରାଜ ଠାକରେ ଅଭିନେତା ବିବେକ ଓବରୟ ଏବଂ ଆର ମାଧବନଙ୍କ ଦୁବାଇ ରହଣିକୁ ନେଇ କଡ଼ା ସମାଲୋଚନା କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତର ବିକାଶକୁ ପ୍ରଶଂସା କରୁଥିବା ଏହି ଅଭିନେତାମାନେ କାହିଁକି ଦେଶ ଛାଡ଼ି ବିଦେଶରେ ରହୁଛନ୍ତି ବୋଲି ସେ ପ୍ରଶ୍ନ ଉଠାଇଛନ୍ତି। ମୁମ୍ବାଇରେ MNSର ଛାତ୍ର ଶାଖା (ମହାରାଷ୍ଟ୍ର ନବନିର୍ମାଣ ବିଦ୍ୟାର୍ଥୀ ସେନା) ଦ୍ୱାରା ଆୟୋଜିତ ଏକ କାର୍ଯ୍ୟକ୍ରମରେ ଉଦ୍ବୋଧନ ଦେଇ ରାଜ ଠାକରେ କହିଛନ୍ତି ଯେ, ଦେଶର ହଜାର ହଜାର ଶିଳ୍ପପତି ବିଦେଶ ଚାଲିଯାଉଛନ୍ତି।
ପ୍ରଧାନମନ୍ତ୍ରୀ ମୋଦୀଙ୍କ ବାୟୋପିକରେ ଅଭିନୟ କରିଥିବା ବିବେକ ଓବରୟ ଏବଂ ପ୍ରଧାନମନ୍ତ୍ରୀଙ୍କ ବିକାଶ ନୀତିକୁ ପ୍ରଶଂସା କରୁଥିବା ଆର ମାଧବନ ନିଜ ପରିବାର ସହ ଦୁବାଇରେ ରହୁଛନ୍ତି। ଯଦି ଭାରତରେ ସବୁକିଛି ଭଲ ଚାଲିଛି, ତେବେ ସେମାନେ ନିଜ ଦେଶ ଛାଡ଼ି ବିଦେଶରେ କାହିଁକି ରହୁଛନ୍ତି ? ସେମାନେ ଭାରତ ଆସି ସରକାରୀ ସମର୍ଥିତ ଫିଲ୍ମରେ କାମ କରିବେ ଏବଂ ପୁଣି ଦୁବାଇ ଫେରିଯିବେ ବୋଲି କହିଛନ୍ତି ।
ଆର ମାଧବନ ନିଜ ପୁଅର ସନ୍ତରଣ (Swimming) କ୍ୟାରିୟର ଓ ତାଲିମ ପାଇଁ କୋଭିଡ-୧୯ ମହାମାରୀ ସମୟରେ ଦୁବାଇ ଯାଇଥିବା ବେଳେ, ବିବେକ ଓବରୟ ସେଠାରେ ବ୍ୟବସାୟ ଆରମ୍ଭ କରିବା ପାଇଁ ରହୁଥିବା ପୂର୍ବରୁ କହିଛନ୍ତି। ଦିଲ୍ଲୀର ଜନ୍ତର-ମନ୍ତରଠାରେ ହୋଇଥିବା ବିକ୍ଷୋଭ ସମୟରେ ପ୍ରଧାନମନ୍ତ୍ରୀଙ୍କ ବିରୋଧରେ ବ୍ୟବହୃତ ହୋଇଥିବା ଅଶୋଭନୀୟ ଭାଷାକୁ ରାଜ ଠାକରେ ନିନ୍ଦା କରିବା ସହ ବିଜେପିର ଟ୍ରୋଲ ବାହିନୀକୁ ମଧ୍ୟ ଘେରିଛନ୍ତି । ପ୍ରଧାନମନ୍ତ୍ରୀଙ୍କ ବିରୋଧରେ କୌଣସି ନିମ୍ନମାନର ବା ଅଶୋଭନୀୟ ଭାଷା ବ୍ୟବହାର କରାଯିବା ଅନୁଚିତ ବୋଲି ସେ କହିଛନ୍ତି।
ବିଜେପିର ଟ୍ରୋଲ ଟିମ୍ ମହାତ୍ମା ଗାନ୍ଧୀ, ଜବାହରଲାଲ ନେହେରୁ, ଇନ୍ଦିରା ଗାନ୍ଧୀ ଏବଂ ଠାକରେ ପରିବାର ପରି ଜାତୀୟ ନେତା ଓ ଆଇକନ୍ମାନଙ୍କୁ ନିୟମିତ ଟାର୍ଗେଟ୍ କରିଥାନ୍ତି। ପ୍ରଧାନମନ୍ତ୍ରୀ ନିଜ ଦଳର ଲୋକଙ୍କୁ ମଧ୍ୟ ଏପରି ଖରାପ ଭାଷା ଓ ଟ୍ରୋଲିଂ ବ୍ୟବହାରରୁ ନିବୃତ୍ତ ରହିବାକୁ ନିର୍ଦ୍ଦେଶ ଦେବା ଉଚିତ। ଏହା ବ୍ୟତୀତ NEET ପ୍ରଶ୍ନପତ୍ର ଲିକ୍ ପ୍ରସଙ୍ଗ ଏବଂ ସାଧାରଣ ଜନତାଙ୍କ ମନରେ ବହୁ ବର୍ଷରୁ ସଞ୍ଚିତ ହୋଇ ରହିଥିବା ଅସନ୍ତୋଷ କାରଣରୁ ନିକଟରେ ବିକ୍ଷୋଭ ପ୍ରଦର୍ଶନକୁ ବ୍ୟାପକ ସମର୍ଥନ ମିଳିଥିଲା ବୋଲି MNS ମୁଖ୍ୟ ପ୍ରକାଶ କରିଛନ୍ତି।
