ମୁମ୍ବାଇ: ମହାରାଷ୍ଟ୍ରର ନାସିକ୍ ସ୍ଥିତ ଆଇଟି କମ୍ପାନୀ ‘ଟିସିଏସ୍’ (TCS) କାର୍ଯ୍ୟାଳୟରେ ଘଟିଥିବା ବହୁଚର୍ଚ୍ଚିତ ଧର୍ମାନ୍ତରୀକରଣ ଏବଂ ମହିଳା କର୍ମଚାରୀଙ୍କୁ ଯୌନ ନିର୍ଯାତନା ମାମଲାରେ ଏକ ବଡ଼ ଖବର ସାମ୍ନାକୁ ଆସିଛି। ସୋମବାର (୬ ଜୁଲାଇ) ଏକ ସେସନ୍ସ କୋର୍ଟ ଏହି ମାମଲାର ଅନ୍ୟତମ ଅଭିଯୁକ୍ତ ନିଦା ଖାନଙ୍କୁ ଜାମିନ ପ୍ରଦାନ କରିଛନ୍ତି। ଗିରଫ ହେବାର ଦୁଇ ମାସ ପରେ ତାଙ୍କୁ ଏହି ଆଶ୍ୱସ୍ତି ମିଳିଛି। ତେବେ ଅଦାଲତ ଏହି ମାମଲାର ମୁଖ୍ୟ ଅଭିଯୁକ୍ତ ଡାନିଶ୍ ଶେଖ୍ଙ୍କ ଜାମିନ ଆବେଦନକୁ ଖାରଜ କରିଦେଇଛନ୍ତି।
ଏହା ସହିତ କୋର୍ଟ ଅନ୍ୟ ଜଣେ ଅଭିଯୁକ୍ତ ତୌସିଫ୍ ଅଖତରଙ୍କୁ ମଧ୍ୟ ଜାମିନ ମଞ୍ଜୁର କରିଛନ୍ତି। ତୌସିଫ୍ଙ୍କ ଉପରେ ଯୌନ ନିର୍ଯାତନାର ଅଭିଯୋଗ ଥିବା ବେଳେ ଡାନିଶ୍ ଶେଖ୍ଙ୍କ ବିରୋଧରେ ବିବାହର ପ୍ରଲୋଭନ ଦେଖାଇ ଯୌନ ଶୋଷଣ କରିଥିବା ଭଳି ସଙ୍ଗୀନ ମାମଲା ରୁଜୁ ହୋଇଛି।
ନାସିକ୍ ପୋଲିସର ଏକ ସ୍ୱତନ୍ତ୍ର ତଦନ୍ତ ଟିମ୍ ଏହି ମାମଲାର ଯାଞ୍ଚ କରୁଛି। ଟିସିଏସ୍ ସଂସ୍ଥାରେ ମହିଳା କର୍ମଚାରୀମାନଙ୍କୁ ଶୋଷଣ, ଜବରଦସ୍ତ ଧର୍ମ ପରିବର୍ତ୍ତନ ପାଇଁ ଚାପ ପ୍ରୟୋଗ, ଧାର୍ମିକ ଭାବନାକୁ ଆଘାତ ପହଞ୍ଚାଇବା ଏବଂ ମାନସିକ ନିର୍ଯାତନା ଦେବା ଅଭିଯୋଗରେ ସମୁଦାୟ ୯ଟି ମାମଲା ରୁଜୁ କରାଯାଇଛି। ସେଥିମଧ୍ୟରୁ ଦେଓଲାଲି କ୍ୟାମ୍ପ ଥାନାରେ ଗୋଟିଏ ଏବଂ ମୁମ୍ବାଇ ନାକା ଥାନାରେ ୮ଟି ମାମଲା ରହିଛି।
କାହିଁକି ମିଳିଲା ଜାମିନ?
ନିଦା ଖାନଙ୍କ ନାମ ଦେଓଲାଲି କ୍ୟାମ୍ପ ମାମଲାରେ ସାମ୍ନାକୁ ଆସିଥିଲା। ତାଙ୍କ ଉପରେ ଜଣେ ହିନ୍ଦୁ ମହିଳା ସହକର୍ମୀଙ୍କୁ ଇସଲାମିକ ପରମ୍ପରା ପାଳନ କରିବାକୁ ବାଧ୍ୟ କରିବା ଏବଂ ପ୍ରଭାବିତ କରିବା ଭଳି ଅଭିଯୋଗ ରହିଥିଲା। ଗତ ମେ’ ୨୦୨୬ରେ ଯେତେବେଳେ ତାଙ୍କୁ ଗିରଫ କରାଯାଇଥିଲା, ସେତେବେଳେ ସେ ତିନି ମାସର ଗର୍ଭବତୀ ଥିଲେ।
ଅଦାଲତରେ ଶୁଣାଣି ସମୟରେ ନିଦାଙ୍କ ଓକିଲ ବାବା ସୟଦ୍ ଯୁକ୍ତି ଦର୍ଶାଇଥିଲେ ଯେ, ପୋଲିସ ଏହି ମାମଲାରେ ଚାର୍ଜସିଟ୍ ଦାଖଲ କରିସାରିଛି। ତେଣୁ ତାଙ୍କୁ ଆଉ ଜେଲ୍ରେ ରଖିବାର କୌଣସି ଆବଶ୍ୟକତା ନାହିଁ। ଏହାସହ ତାଙ୍କର ସ୍ୱାସ୍ଥ୍ୟାବସ୍ଥାକୁ ଦୃଷ୍ଟିରେ ରଖି ମାନବିକତା ଆଧାରରେ କୋର୍ଟ ତାଙ୍କୁ ଜାମିନ ପ୍ରଦାନ କରିଛନ୍ତି।
