ବିଶ୍ଵକପରେ ପ୍ଲେୟାର ଅଫ ଦ ଟୁର୍ଣ୍ଣାମେଣ୍ଟ, କେବଳ ୩ଟି ମ୍ୟାଚରେ ସୁଯୋଗ ପରେ ଦଳରୁ ଛୁଟି, ସଞ୍ଜୁଙ୍କ ସହ ପୁଣି…

ନୂଆଦିଲ୍ଲୀ: କ୍ରିକେଟ ପ୍ରେମୀଙ୍କ ପାଇଁ ଏକ ବଡ଼ ଖବର। ମାତ୍ର କିଛି ମାସ ତଳେ ଟି-୨୦ ବିଶ୍ୱକପ୍ରେ ଧମାକାଦାର ବ୍ୟାଟିଂ କରି ଟିମ୍ ଇଣ୍ଡିଆକୁ ଚାମ୍ପିଅନ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିବା ଷ୍ଟାର୍ ୱିକେଟକିପର ବ୍ୟାଟର ସଞ୍ଜୁ ସାମସନଙ୍କୁ ନେଇ ଚର୍ଚ୍ଚା ଜୋର୍ ଧରିଛି। ବିଶ୍ୱକପରେ ନିଜର ଦମଦାର ପ୍ରଦର୍ଶନ ପାଇଁ ‘ପ୍ଲେୟାର ଅଫ୍ ଦି ଟୁର୍ଣ୍ଣାମେଣ୍ଟ’ ବିବେଚିତ ହୋଇଥିବା ସଞ୍ଜୁ, ମାତ୍ର ୩ଟି ମ୍ୟାଚ୍ରେ ଫେଲ୍ ମାରିବା ପରେ ଏବେ ଦଳରୁ ବାଦ୍ ପଡ଼ିଛନ୍ତି। ଜିମ୍ବାୱେ ଗସ୍ତ ପାଇଁ ଘୋଷଣା ହୋଇଥିବା ଭାରତୀୟ ଟି-୨୦ ଦଳରୁ ତାଙ୍କୁ ସମ୍ପୂର୍ଣ୍ଣ ରୂପେ ବାହାର କରି ଦିଆଯାଇଛି। କ୍ରିକେଟ୍ ମଇଦାନରେ ସଞ୍ଜୁ ସାମସନଙ୍କ ଏହି ଉତଥାନ-ପତନ କାହାଣୀ ସମସ୍ତଙ୍କୁ ଆଶ୍ଚର୍ଯ୍ୟ କରିଛି।

୭ ମାସର ସେହି ରୋମାଞ୍ଚକର ଯାତ୍ରା

ଟି-୨୦ ବିଶ୍ୱକପ୍ ପୂର୍ବରୁ ସଞ୍ଜୁ ସାମସନ ଖରାପ ଫର୍ମ ଦେଇ ଗତି କରୁଥିଲେ। କିନ୍ତୁ ବିଶ୍ୱକପ୍ ଆରମ୍ଭ ହେବା ମାତ୍ରେ ତାଙ୍କ ବ୍ୟାଟରୁ ରନ୍ ବର୍ଷା ହୋଇଥିଲା। ନାମିବିଆ ବିପକ୍ଷ ଡେବ୍ୟୁ ମ୍ୟାଚ୍ରେ ସେ ମାତ୍ର ୮ ବଲରେ ୨୨ ରନ୍ ସଂଗ୍ରହ କରିଥିଲେ। ସେହିପରି ୱେଷ୍ଟଇଣ୍ଡିଜ୍ ବିପକ୍ଷ ‘କର ବା ମର’ ମ୍ୟାଚରେ ସେ ୫୦ ବଲରେ ଅପରାଜିତ ୯୭ ରନର ଏକ ମାରାଥନ୍ ଇନିଂସ ଖେଳି ଦଳକୁ ସେମିଫାଇନାଲ୍ ପହଞ୍ଚାଇଥିଲେ।

କେବଳ ଏତିକି ନୁହେଁ, ସେମିଫାଇନାଲ୍ରେ ଇଂଲଣ୍ଡ ବିପକ୍ଷରେ ୪୨ ବଲରୁ ୮୯ ରନ୍ ଏବଂ ନ୍ୟୁଜିଲ୍ୟାଣ୍ଡ ବିପକ୍ଷ ଫାଇନାଲ୍ରେ ୪୬ ବଲ୍ରେ ୮୯ ରନ୍ର ଦାୟିତ୍ୱବାନ ଇନିଂସ ଖେଳି ସେ ଦଳକୁ ବିଶ୍ୱବିଜେତା କରାଇଥିଲେ। ପୂରା ଟୁର୍ଣ୍ଣାମେଣ୍ଟରେ ନିଜର ଦମଦାର ବ୍ୟାଟିଂ ପାଇଁ ତାଙ୍କୁ ‘ପ୍ଲେୟାର ଅଫ୍ ଦି ଟୁର୍ଣ୍ଣାମେଣ୍ଟ’ ଆୱାର୍ଡ ମିଳିଥିଲା।

ମାତ୍ର ୩ଟି ମ୍ୟାଚ୍ ଏବଂ ଫେଲ୍ ମାରିଲେ ସଞ୍ଜୁ

ବିଶ୍ୱକପ୍ ସରିବା ପରେ ସଞ୍ଜୁଙ୍କ ଖରାପ ସମୟ ପୁଣି ଫେରିଆସିଥିଲା। ଆୟରଲ୍ୟାଣ୍ଡ ବିପକ୍ଷ ଦୁଇଟି ମ୍ୟାଚ୍ରେ ସେ ମାତ୍ର ୫ ରନ୍ (୫ ଏବଂ ୦) କରିବାକୁ ସକ୍ଷମ ହୋଇଥିଲେ। ଏହାପରେ ଇଂଲଣ୍ଡ ବିପକ୍ଷ ପ୍ରଥମ ଟି-୨୦ ମ୍ୟାଚ୍ରେ ମଧ୍ୟ ସେ ମାତ୍ର ୧ ରନ୍ କରି ପାଭିଲିୟନ ଫେରିଥିଲେ। ଅର୍ଥାତ୍ ଶେଷ ୩ଟି ଆନ୍ତର୍ଜାତୀୟ ଇନିଂସରେ ସେ ଦୁଇ ଅଙ୍କ ମଧ୍ୟ ଛୁଇଁପାରି ନଥିଲେ, ଯାହା ଚୟନକର୍ତ୍ତା ଓ ଟିମ୍ ମ୍ୟାନେଜମେଣ୍ଟର ଚିନ୍ତା ବଢ଼ାଇ ଦେଇଥିଲା।

ଟିମରୁ ଡ୍ରପ୍ ସହ ଜିମ୍ବାୱେ ସିରିଜରୁ ବି ବାଦ୍

ଇଂଲଣ୍ଡ ବିପକ୍ଷ ଦ୍ୱିତୀୟ ଟି-୨୦ର ପ୍ଲେଇଂ ଇଲେଭେନରୁ ପ୍ରଥମେ ସଞ୍ଜୁଙ୍କୁ ବାଦ୍ ଦିଆଯାଇ ଯୁବ ବିସ୍ଫୋରକ ବ୍ୟାଟର ଅଭିଷେକ ଶର୍ମା ଓ ବୈଭବ ସୂର୍ଯ୍ୟବଂଶୀଙ୍କ ଭଳି ଖେଳାଳିଙ୍କୁ ସୁଯୋଗ ଦିଆଗଲା। ଏହାର ଠିକ୍ ଦୁଇ ଦିନ ପରେ ଯେତେବେଳେ ବିସିସିଆଇ ଅଜିତ ଅଗରକରଙ୍କ ନେତୃତ୍ୱରେ ଜିମ୍ବାୱେ ଗସ୍ତ ପାଇଁ ୧୫ ଜଣିଆ ଭାରତୀୟ ଦଳ ଘୋଷଣା କଲା, ସେଥିରୁ ସଞ୍ଜୁଙ୍କ ନାଁ ସମ୍ପୂର୍ଣ୍ଣ ଗାୟବ ଥିଲା। କ୍ରିକେଟ୍ ମହଲରୁ ମିଳିଥିବା ସୂଚନା ଏବଂ ବିଭିନ୍ନ ଗଣମାଧ୍ୟମର ସମୀକ୍ଷା ଅନୁସାରେ, ସଞ୍ଜୁଙ୍କର ଏହି ହଠାତ୍ ବାଦ୍ ପଡ଼ିବା ପ୍ରଶଂସକଙ୍କୁ ବଡ଼ ଝଟକା ଦେଇଛି।

ସଞ୍ଜୁଙ୍କ ଫ୍ୟାନ୍ସ ଏବଂ ପୂର୍ବତନ କ୍ରିକେଟର କ୍ଷୁବ୍ଧ

ସଞ୍ଜୁ ସାମସନଙ୍କ ଭଳି ଜଣେ ମ୍ୟାଚ୍ ୱିନରଙ୍କୁ ମାତ୍ର ୩ଟି ମ୍ୟାଚ୍ର ପ୍ରଦର୍ଶନ ଆଧାରରେ ଦଳରୁ ବାଦ୍ ଦେବା ନିଷ୍ପତ୍ତିକୁ ସହଜରେ ଗ୍ରହଣ କରିପାରୁ ନାହାନ୍ତି କ୍ରିକେଟ ବିଶେଷଜ୍ଞ। ପୂର୍ବତନ କ୍ରିକେଟର ଆକାଶ ଚୋପ୍ରା ଏବଂ ସଞ୍ଜୟ ମାଞ୍ଜରେକର ଚୟନକର୍ତ୍ତାଙ୍କ ଏହି ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି। ମାଞ୍ଜରେକର କହିଛନ୍ତି ଯେ, ଯଦି ସଞ୍ଜୁ ଆହତ ହୋଇନାହାନ୍ତି, ତେବେ ତାଙ୍କୁ ଦଳରୁ ବାଦ୍ ଦେବା ସବୁଠାରୁ ଆଶ୍ଚର୍ଯ୍ୟଜନକ ନିଷ୍ପତ୍ତି।