ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই শনিবাৰে ৰাষ্ট্ৰীয় ৰাজধানী দিল্লীত প্ৰধানমন্ত্ৰী মোদী আৰু কেন্দ্ৰীয় মন্ত্ৰী অশ্বিনী বৈষ্ণৱক সাক্ষাৎ কৰে
অসমৰ সৰ্বাংগীন উন্নয়নৰ ধাৰাবাহিকতা অক্ষুণ্ণ ৰখাৰ লক্ষ্যৰে ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই শনিবাৰে ৰাষ্ট্ৰীয় ৰাজধানী দিল্লীত প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় মন্ত্ৰী অশ্বিনী বৈষ্ণৱক সাক্ষাৎ কৰে ।
দিল্লীত উপস্থিত হৈ মুখ্যমন্ত্ৰী ড০ শৰ্মাই প্ৰধানমন্ত্ৰী নৰেন্দ্ৰ মোদীক সাক্ষাৎ কৰে । প্ৰধানমন্ত্ৰীৰ কাৰ্যালয়ে (PMO) এই সাক্ষাতৰ বিষয়ে ‘এক্স’ যোগে তথ্য প্ৰকাশ কৰিছে । উল্লেখ্য যে, দ্বিতীয়বাৰৰ বাবে অসমৰ মুখ্যমন্ত্ৰীৰূপে শপত লোৱাৰ পিছত হিমন্ত বিশ্ব শৰ্মাই প্ৰধানমন্ত্ৰী মোদীক প্ৰথমবাৰৰ বাবে সাক্ষাৎ কৰে ।
প্ৰধানমন্ত্ৰীগৰাকীক সাক্ষাতৰ পিছত এক্স-ত মুখ্যমন্ত্ৰী ড০ হিমন্ত বিশ্ব শৰ্মাই লিখিছে- ‘আজি নতুন দিল্লীত সন্মানীয় প্ৰধানমন্ত্ৰী শ্ৰী নৰেন্দ্ৰ মোদী ডাঙৰীয়াক সাক্ষাৎ কৰিবলৈ পাই মই অতি গৌৰৱান্বিত অনুভৱ কৰিছোঁ । মই তেখেতক এন ডি এ ৩.০ চৰকাৰৰ অধীনত অসমত আমি আৰম্ভ কৰা কাম-কাজৰ অগ্ৰগতিৰ বিষয়ে অৱগত কৰিলোঁ, তেখেতৰ নিৰন্তৰ সমৰ্থনৰ বাবে ধন্যবাদ জনালোঁ আৰু অনাগত দিনবোৰত তেখেতৰ আশীৰ্বাদ তথা দিহা-পৰামৰ্শ লাভৰ বাবে প্ৰাৰ্থনা জনালোঁ ।‘
ইয়াৰ পিছতে কেন্দ্ৰীয় মন্ত্ৰী অশ্বিনী বৈষ্ণৱক সাক্ষাৎ কৰি মুখ্যমন্ত্ৰী ড০ শৰ্মাই এক্স-ত জনায়- ‘সন্মানীয় কেন্দ্ৰীয় মন্ত্ৰী শ্ৰী অশ্বিনী বৈষ্ণৱক ডাঙৰীয়াৰ সৈতে সাক্ষাৎ সদায় আনন্দদায়ক আৰু জ্ঞানবৰ্ধক । অসমত ৰে’ল নেটৱৰ্ক আৰু ৰে’ল আন্তঃগাঁথনি সম্প্ৰসাৰণৰ সন্দৰ্ভত আমি আলোচনা কৰিলোঁ- ইয়াৰ ভিতৰত চলি থকা ১,৩০০ কিলোমিটাৰৰো অধিক ট্ৰেক সম্প্ৰসাৰণ আৰু ৫০টাতকৈও অধিক অমৃত ভাৰত ষ্টেচনৰ কাম অন্তৰ্ভুক্ত আছে ।‘
উল্লেখ্য যে, ইয়াৰ পূৰ্বে ২৩ মে’ত মুখ্যমন্ত্ৰী ড০ শৰ্মাই দিল্লীত কেন্দ্ৰীয় বিত্ত মন্ত্ৰী নিৰ্মলা সীতাৰমণক সাক্ষাৎ কৰিছিল । মুখ্যমন্ত্ৰীগৰাকীয়ে কেন্দ্ৰীয় বিত্ত মন্ত্ৰী নিৰ্মলা সীতাৰমণক সাক্ষাৎ কৰি ৰাজ্যখনৰ বিকাশৰ গতিপথ সন্দৰ্ভত আলোচনাত মিলিত হয় ।
মুখ্যমন্ত্ৰী ড০ শৰ্মাই বিগত পাঁচ বছৰ ধৰি অসমৰ উন্নয়নত কেন্দ্ৰীয় চৰকাৰে আগবঢ়াই অহা নিৰন্তৰ সমৰ্থনৰ বাবে বিত্ত মন্ত্ৰীগৰাকীক ধন্যবাদ জনায় । তেওঁ লগতে এক্স-ত কয়, “আজি কেন্দ্ৰীয় বিত্ত মন্ত্ৰীগৰাকীক সাক্ষাৎ কৰি অনাগত দিনবোৰত অসমৰ বিকাশ আৰু উন্নয়নৰ যাত্ৰাৰ ৰোডমেপ সন্দৰ্ভত ফলপ্ৰসূ আলোচনা কৰিলোঁ ।”
