পূৰ্বানুমতি অবিহনে লোকপিয়লৰ কৰ্তব্যত নিয়োজিত কোনো কৰ্মচাৰীক কোনো ধৰণৰ ছুটি মঞ্জুৰ কৰা নহ’ব
দেশজুৰি হ’বলগীয়া লোকপিয়ল ২০২৭ প্ৰক্ৰিয়া সুচাৰুৰূপে চলাই নিবলৈ গুৱাহাটী পৌৰ নিগমে (GMC) এক অত্যন্ত গুৰুত্বপূৰ্ণ আৰু কঠোৰ পদক্ষেপ গ্ৰহণ কৰিছে । নিগমৰ তৰফৰ পৰা এক চৰকাৰী নিৰ্দেশনা জাৰি কৰি স্পষ্ট কৰি দিয়া হৈছে যে সক্ষম কৰ্তৃপক্ষৰ পূৰ্বানুমতি অবিহনে লোকপিয়লৰ কৰ্তব্যত নিয়োজিত কোনো কৰ্মচাৰীক কোনো ধৰণৰ ছুটি মঞ্জুৰ কৰা নহ’ব ।
লোকপিয়লৰ দৰে এক বৃহৎ ৰাষ্ট্ৰীয় কাৰ্যসূচীৰ গুৰুত্বক লক্ষ্য ৰাখি আজি GMC-ৰ আয়ুক্ত তথা প্ৰধান লোকপিয়ল বিষয়া চিন্ময় প্ৰকাশ ফুকনে সকলো বিভাগীয় মুৰব্বীক এই নিৰ্দেশনা কঠোৰভাৱে পালন কৰাটো নিশ্চিত কৰিবলৈ নিৰ্দেশ দিয়ে ।
পূৰ্বানুমতি অবিহনে কোনেও ল’ব নোৱাৰিব ছুটি:
চৰকাৰী নিৰ্দেশনাটোত উল্লেখ কৰা অনুসৰি, লোকপিয়ল ২০২৭-ৰ বাবে প্ৰশিক্ষক, পৰ্যবেক্ষক (ছুপাৰভাইজাৰ), গণনাকাৰী (এনুমেৰেটৰ) আৰু অন্যান্য বিষয়া হিচাপে নিয়োজিত কোনো এজন কৰ্মচাৰীক পূৰ্বানুমতি নোলোৱাকৈ লোকপিয়ল সংক্ৰান্তীয় কৰ্তব্যৰ পৰা ৰেহাই দিব নোৱাৰিব । ক্ষেত্ৰভিত্তিক কৰ্মচাৰীসকলৰ পূৰ্ণ অংশগ্ৰহণ নিশ্চিত কৰিবলৈকে এই সিদ্ধান্ত লোৱা হৈছে ।
নথিপত্ৰৰ হেৰফেৰ কৰিলে হ’ব তিনি বছৰৰ জেল:
ছুটি বাতিল কৰাৰ উপৰিও, GMC-য়ে বিষয়াসকলক লোকপিয়লৰ নথিপত্ৰৰ সুৰক্ষা সন্দৰ্ভতো কঠোৰ সকীয়নি প্ৰদান কৰিছে । নিৰ্দেশনাত সোঁৱৰাই দিয়া হৈছে যে ‘লোকপিয়ল আইন, ১৯৪৮’ উলংঘা কৰিলে যিকোনো কৰ্মচাৰী কঠোৰ শাস্তিৰ সন্মুখীন হ’ব লাগিব । এই আইনৰ ১১ নম্বৰ ধাৰাৰ অধীনত, যদিহে কোনো ব্যক্তিয়ে লোকপিয়লৰ চৰকাৰী নথিপত্ৰ বা ৰেকৰ্ডৰ সৈতে কোনো ধৰণৰ হেৰফেৰ কৰে, তেন্তে তেওঁ তিনি বছৰ পৰ্যন্ত কাৰাদণ্ড, ১,০০০ টকা পৰ্যন্ত জৰিমনা বা উভয় দণ্ডৰে দণ্ডিত হ’ব পাৰে ।
ইতিমধ্যে লোকপিয়ল ২০২৭-ৰ কাৰ্যসূচী যাতে কোনো ধৰণৰ বাধা নোহোৱাকৈ ৰূপায়ণ হয়, তাৰ বাবে এই কঠোৰ নিৰ্দেশনাটো GMC-ৰ সকলো শাখা বিষয়া, লোকপিয়ল পৰ্যবেক্ষক, প্ৰশিক্ষক আৰু সংশ্লিষ্ট বিষয়াবৰ্গলৈ প্ৰেৰণ কৰা হৈছে ।
লগতে পঢ়ক : পুনৰ প্ৰচণ্ড বানত বুৰিল যোৰাবাট
